‹‹ ھەر يەتتە نەپەر ئامېرىكىلىق ئىچىدە بىرسى نامرات ھالەتتە تۇرماقتا ›› . ئامېرىكا نوپۇسنى ئومۇميۈزلۈك تەكشۈرۈش ئىدارىسىنىڭ 16–سېنتەبىر ئېلان قىلغان تەكشۈرۈش سانلىق مەلۇماتىغا ئاساسلانغاندا ، ئامېرىكىدا 2009–يىلى نامراتلار نوپۇسى %14.3 كۆپىيىپ ، نامراتلارنىڭ ئومۇمىي سانى 43 مىليون 600 مىڭغا يېتىپ ، يېرىم ئەسىردىن بۇيانقى تارىختىكى ئەڭ يۇقىرى چەككە يەتتى .
ئامېرىكا مەمۇرىي باشقۇرۇش ۋە خام چوت ئىشخانىسىنىڭ ئېنىقلىمىسىغا ئاساسلانغاندا ، ئەگەر ئامېرىكىدىكى بىر تۆت نوپۇسلۇق ئائىلىنىڭ 2009–يىلىدىكى يىللىق كىرىمى 21 مىڭ 954 ئامېرىكا دوللىرىدىن تۆۋەن ياكى شەخىسنىڭ يىللىق كىرىمى 10 مىڭ 956 يۈەندىن تۆۋەن بولسا ، ئۇنداقتا بۇ ئائىلە نامراتلىق ھالىتىدە تۇرغان بولىدىكەن .
ئامېرىكا ئاخبارات ۋاستىلىرى ۋە تەھلىلچىلەر ئومۇميۈزلۈك مۇنداق دەپ قارىغان : 2008 –يىلى باشلانغان پۇل مۇئامىلە كىرزىسى ئېنىقكى ئامېرىكىدىكى نامراتلارنىڭ كۆپىيىپ كېتىشىدىكى مۇھىم بىر سەۋەب . ئىشسىزلىق نىسبىتىنىڭ ئېشىشىمۇ نامراتلار نىسبىتىنى ئاشۇرۇۋەتتى . 2009–يىلى ، ئامېرىكىدا ئىشسىزلىق نىسبىتى بىراقلا %10 ئاشقان بولۇپ ، نۆۋەتتە ، ئىشسىزلىق نىسبىتى يەنىلا %9.6 دىن يۇقىرى بولماقتا . ئىلگىركىگە ئوخشىمايدىغان يېرى شۇكى ، كۆپ مىقداردىكى ئالىي مائارىپ تەربىيەسى ئالغان زىيالىلار توپى بۇ مەيدان تارىختا كۆرۈلۈپ باقمىغان ئىقتىسادىي كىرزىسنىڭ زەربىسىدە نامراتلار قاتارىغا قوشۇلۇشقا مەجبۇر بولدى .
تەھلىلچىلەرنىڭ پەرەز قىلىشىچە ، ئەڭ يېڭى ئېلان قىلىنغان نامراتلار نوپۇسىنىڭ ئېشىشىغا ئالاقىدار خەۋەر شەك–شۈبھىسىزكى يېقىندا ئۆتكۈزۈلىدىغان ئامېرىكا دۆلەت پارلامېنتىنىڭ ئوتتۇرا مەزگىللىك سايلىمىغا تەسىر كۆرسىتىدىكەن . ئامېرىكا زۇڭتۇڭى ئوباما بۇ قېتىمقى تەكشۈرۈش نەتىجىسىگە قارىتىلغان بىر باياناتىدا مۇنۇلارنى بىلدۈرگەن : نوپۇسنى ئومۇميۈزلۈك تەكشۈرۈش ئىدارىسىنىڭ سانلىق مەلۇماتى 2009–يىلىنىڭ ئامېرىكىلىقلارغا نىسبەتەن ھەقىقەتەن جاپالىق بىر يىل بولغانلىقىنى تولۇق كۆرسىتىپ بەردى . بىراق ئۇلار بۇ سانلىق مەلۇماتلارنىڭ ھۆكۈمەتنىڭ ئىقتىسادىي سىياسىتىنى ئاقلاشقا ياردىمى بولىدىغانلىقىنى ئۇنتۇپ قالماسلىقى كېرەك . ئىقتىسادنى ئەسلىگە كەلتۈرۈش قانۇن لايىھەسى ۋە باشقا ئىقتىسادنى قوزغىتىش پىلانى زور كۈچ بىلەن قوللىغانلىقتىن ، تېخىمۇ كۆپ ئامېرىكىلىقلار نامراتلىقتىن قۇتۇلۇپ قالدى . ئوباما تەكىتلەپ مۇنداق دېگەن : ئىقتىسادىي كىرزىستىن بۇرۇن ، ئامېرىكا ئوتتۇرا بۇرژۇئازىيە كىرىمىنىڭ ئېشىشىمۇ توختاپ قېلىش ھالىتىدە بولۇپ ، ئامېرىكىدىكى نامراتلارنىڭ سانى كىشىنى چۆچۈتكىدەك دەرىجىدە يۇقىرى بولۇپ ، بۈگۈنكى سانلىق مەلۇمات خىزمىتىمىزنىڭ ئەمدىلا باشلانغانلىقى ، بىزنىڭ داۋاملىق ئىجتىمائىي كاپالەت ۋە ئاساسىي ئەسلىھەلەرگە بولغان سېلىنمىنى زور كۈچ بىلەن ئاشۇرۇشىمىز كېرەكلىكىنى كۆرسىتىپ بېرىدۇ .
بىراق ، جۇمھۇرىيەتچىلەر پارتىيەسىدىكى پارلامېنت ئەزالىرى ھەمدە ئوبامانىڭ ئىقتىسادنى قوزغىتىش سىياسىتىگە قارشى زاتلار مۇنداق قارىغان : بۇ سانلىق مەلۇماتلار ئوباما ھۆكۈمىتى ۋە دېموكراتلار پارتىيە رەھبەرلىكىدىكى دۆلەت پارلامېنتىنىڭ ئامېرىكا ئىقتىسادىنى قۇتقۇزۇش جەھەتتە مەغلۇب بولغانلىقىنى يەنە بىر قېتىم ئىسپاتلاپ بەردى .
دۆلەت پارلامېنتى ئوتتۇرا مەزگىللىك سايلىمىنىڭ كۈندىن كۈنگە يېقىنلاپ كېلىشىگە ئەگىشىپ ، پارتىيە–گۇرۇھلار ئوتتۇرىسىدىكى رىقابەت كۈندىن كۈنگە كۈچەيگەن بولۇپ ، ھەر قانداق بىر ئىقتىسادىي ۋە خەلقنىڭ ئىجتىمائىي تۇرمۇشىغا مۇناسىۋەتلىك ئۇچۇرنىڭ ھەممىسى سايلام جېڭىدىكى قىزىق نۇقتىغا ئايلىنىپ قېلىشى مۇمكىن .
مۇناسىۋەتلىك سۈرەتلەر:
نامراتلار ئولتۇراق رايونى
ئامېرىكىدىكى نامراتلار
