فرانسىيىلىك ئىككى ياش دىگون بىلەن جۈيى 24-سېنتەبىر توكسىكىلىت بىلەن يەرشارىنى ئايلىنىش مۇساپىسىنى غەلىبىلىك تاماملاپ، فرانسىيىنىڭ شەرقىدىكى شەھەر سىچۈرەسبورىگقا يېتىپ بارغان.
بۇ ئىككى ياش بۇ يىل 2-ئاينىڭ 11-كۈنى بىر توكسىكىلىتنى مىنىپ، سىچۈرەسبورىگدىن يولغا چىقىپ ئۆزلىرىنىڭ يەرشارىنى ئايلىنىش سەپىرىنى باشلىۋەتكەن. ئۇلارنىڭ بۇ سەپىرىنىڭ مەقسىتى توكسىكىلىتتەك مۇھىت ئاسرايدىغان قاتناش قورالىنى تەشۋىق قىلىش ئىكەن. ئۇلار ئىلگىرى-كېيىن بولۇپ لۇكسىمبورىگ، بېلگىيە، گوللاندىيە، ئامېرىكا، ياپونىيە، سىنگاپور، مالايشىيا، تايلاند، لائۇس، ۋىيتنام، جۇڭگو، قازاقىستان ۋە رۇسىيە قاتارلىق 17 دۆلەتتىن ئۆتكەن بولۇپ، بۇنىڭغا يەتتە ئاي 13 كۈن ۋاقىت كەتكەن. ئۇلار بېسىپ ئۆتكەن مۇساپە 250 مىڭ كىلومېتىر ئىكەن.
دىگون بىلەن جۈيى سىچۈرەسبورىگقا قايتىپ كەلگەن ۋاقىتتا، سىچۈرەسبورىگنىڭ شەھەر باشلىقى رولاند.لىيىسنىڭ قىزغىن قارشى ئېلىشىغا ئېرىشتى. 27 ياشلىق دىگون بىلەن 28 ياشلىق جۈيى شۇ كۈنى مۇخبىرلارنى كۈتۈۋېلىش يىغىنىدا ئۆزلىرىنىڭ ئېگىز تاغ چوققىلىرىدىن، دەشتى-قۇملۇقلاردىن ئۆتۈپ بۇ مۇساپىنى تاماملىغانلىقىنى، بۇنىڭ توكسىكىلىتنىڭمۇ كىشىلەرنىڭ ئىشقا بېرىش-كېلىش جەھەتتىكى، نەرسىلەرنى توشۇش، بالىلىرىنى مەكتەپكە ئاپىرىپ-ئەكىلىش جەھەتتىكى بارلىق ئېھتىياجىنى قامدىيالايدىغانلىقىنى چۈشەندۈرۈپ بېرىدىغانلىقىنى ئېيتتى. بۇ قېتىمقى سەپىرى ئارقىلىق ئۇلار توكسىكىلىتنىڭ كەلگۈسىدىكى ئاساسلىق قاتناش ۋاسىتىسى ئىكەنلىكىدەك ھەقىقەتنى يەنىمۇ بىر قەدەم ئىلگىرىلىگەن ھالدا ئىسپاتلىدى.
تونۇشتۇرۇشلارغا ئاساسلانغاندا، ئۇلارنىڭ مىنگىنى شۆتىيېلۇڭ C-ZERO ماركىلىق توكسىكىلىت بولۇپ، يەتتە ئاي سەپەر جەريانىدا بۇ توكسىكىلىتقا ئارانلا 250 قېتىمدىن ئارتۇقراق توك قاچىلىغان. ھەمدە بۇ توكسىكىلىتتا ھېچقانداق كاشىلا كۆرۈلمىگەن. پەقەت ئادەم شالاڭ، قۇملۇق ۋە تاغلىق رايونلاردا توك مەنبەسىنى تېپىش سەل تەسكە چۈشكەن. ئۇلار بېسىپ ئۆتكەن يەرلەردىكى خەلقلەر ناھايىتى قىزغىن بولۇپ، ئۇلارنىڭ سەپىرىگە كۆپ ياردەملەرنى قىلغان.