يەر شارى تورى مۇخبىرى ۋاڭ خۈەن خەۋىرى: ياپونىيە «سانكېي خەۋەرلىرى» نىڭ 21- سېنتەبردىكى خەۋىرىدە ئېيتىلىشچە، ياپونىيە ھۆكۈمىتى دىياۋيۈ ئارىلىنى «دۆلەت ئىلكىگە ئۆتكۈزۈۋېلىش» فاڭجېنىنى يولغا قويغاندىن كېيىن، 20-سېنتەبر تۇنجى قېتىم دىياۋيۈ ئارىلىنىڭ ئەتراپىدىكى دېڭىز تەۋەلىكىدە جۇڭگو دېڭىز ئارمىيەسىنىڭ ھەربىي پاراخوتىنىڭ چارلاۋاتقانلىقىنى دەلىللىدى. بۇنىڭغا قارىتا، ياپونىيە قوغدىنىش ئەترىتى بىر قانچە ھاۋا رازۋېدكا ئايروپىلانى ئەۋەتىپ تاقابىل تۇردى. شۇ كۈنى يەنە رۇسىيە ھاۋا ئارمىيەسىنىڭ ئىككى دانە ئۇرۇش ئايروپىلانى ياپون دېڭىزىنى بويلاپ ياپونىيە ھاۋا بوشلۇقىدا چارلاش ئېلىپ باردى. «جۇڭگو ۋە رۇسىيە ئارمىيەسى ياپونىيە قوغدىنىش ئەترىتىنى ئىككى تەرەپتىن تەھدىتكە ئۇچرايدىغان قىيىن ئەھۋالدا قويدى».
«سانكېي خەۋەرلىرى» نىڭ ئاخباراتىدا مۇنداق دېيىلدى: ياپونىيە ھۆكۈمىتىدىكى يۇقىرى دەرىجەلىك ئەمەلدارنىڭ دەلىللىشىچە، جۇڭگو دېڭىز ئارمىيەسىنىڭ ئىككى ھەربىي پاراخوتى 19-، 20- سېنتەبر دىياۋيۈ ئارىلى دېڭىز تەۋەلىكىدە چارلاش ئېلىپ بارغان، يەنە ئىككى ھەربىي پاراخوت دىياۋيۈ ئارىلىغا «تۇتىشىدىغان دېڭىز تەۋەلىكى» ۋە «ياپونىيە دېڭىز تەۋەلىكى» گە كىرمىگەن. بۇنىڭغا قارىتا، ياپونىيە ھۆكۈمىتى بىر قانچە رازۋېدكا ئايروپىلانى ئەۋەتىپ، جۇڭگو تەرەپنىڭ ھەربىي پاراخوتلىرىنى «ئاگاھلاندۇرىدىغانلىقى» نى بىلدۈردى.
يەنە بىر تەرەپتىن، رۇسىيەنىڭ بىر دانە IL-20تىپلىق رازۋېدكا ئايروپىلانى ۋە بىر دانە سۇ - 24تىپلىق رازۋېدكا ئايروپىلانى 20- سېنتەبر ياپون دېڭىزىنى بويلاپ ياپونىيە ھاۋا بوشلۇقىدا چارلاش ئېلىپ باردى، ھەمدە ئۈزلۈكسىز تۈردە ياپونىيە ھاۋا بوشلۇقىدىكى پەرقلەندۈرۈش چەمبىرىكى سىرتىدا ئۇچۇپ يۈردى.
«سانكېي خەۋەرلىرى» نىڭ ئاخباراتىدا مۇنداق دېيىلدى: «11- مارت» ياپونىيەدىكى زور يەر تەۋرەش ئاپىتىدىن كېيىن، جۇڭگونىڭ ھەربىي ئايروپىلانلىرى ياپونىيە دېڭىزىدىكى قوغداش كېمىلىرىگە «باشقىچىلا يېقىن» ئۇچقانىدى، رۇسىيە ھاۋا ئارمىيەسىنىڭ ئۇرۇش ئايروپىلانلىرىمۇ ئۈزلۈكسىز ياپونىيە ھاۋا بوشلۇقىغا يېقىن ئۇچقانىدى. «جۇڭگو ۋە رۇسىيە ئارمىيەسىنىڭ تەڭلا قورقاق سېلىشى، ياپونىيە قوغدىنىش ئەترىتىنى ئىككى تەرەپتىن تەھدىتكە ئۇچرايدىغان قىيىن ئەھۋالدا قويدى».
