ئامېرىكا تور ھۇجۇمىنى تېرورلۇق ھۇجۇمى قاتارىغا كىرگۈزدى - huxhuy online----Sports|world News|it News|china News|Local News Business

[ئامېرىكا «مۇداپىئە ئىشلىرى ھەپتىلىك ژۇرنىلى» تورىنىڭ 21-سېنتەبىر خەۋىرى] ئامېرىكا گوۋۇيۈەنىنىڭ ئالى ئادۋوكاتى بۈگۈن: ئامېرىكا ھۆكۈمىتى تور ھۇجۇمىنى قوراللىق ھۇجۇم بىلەن باراۋەر دەپ قارايدۇ، شۇڭا ئۇ خەلقئارا ئىنسانپەرۋەرلىك قانۇنى ۋە ئۇرۇش قانۇنىنىڭ چەكلىمىسىگە ئۇچرىشى كېرەك، دېدى.
   ئامېرىكا تور ئىشلىرى قوماندانلىق ئىشتابى مىد قورغىنىدا ئۆتكۈزگەن يىغىندا، ئامېرىكا گوۋۇيۈەنىنىڭ باش قانۇن مەسلىھەتچىسى گاۋ خۇڭجۇ ئامېرىكا ھۆكۈمىتىنىڭ تور ئۇرۇشىنىڭ قانداق قانۇنلارنىڭ چەكلىمىسىگە ئۇچرايدىغانلىقى توغرىسىدىكى مەيدانىنى بايان قىلدى. گاۋ خۇڭجۇ: ئامېرىكا ھۆكۈمىتى بەزى تور ھۇجۇملىرىنى «قورال ئىشلەتكەنلىك»بىلەن باراۋەر دەپ قارايدۇ، لېكىن «قورال ئىشلىتىش» «ب د ت نىزامنامىسى»دا تەبىر بېرىلگەن قانۇنىي ئۇقۇم. بۇنداق ھۇجۇم ب د ت ھوقۇق بەرگەن ياكى ئۆزىنى قوغداش ئۈچۈن قوللانغان ئەھۋالدىلا قانۇنلۇق بولىدۇ، دېدى.
    بىر نەچچە يىل ئىلگىرى، كىشىلەرنىڭ تور ئۇرۇشى ئۇقۇمى توغرىسىدىكى چۈشەنچىسى ئانچە چوڭقۇر ئەمەس ئىدى، لېكىن تېخنىكىنىڭ ئۇچقاندەك تەرەققىي قىلىشىغا ئەگىشىپ، ھازىر تور قوراللىرىنى ئورۇنلاشتۇرۇشمۇ قانۇننىڭ نازارىتىنى تەلەپ قىلىدىغان بولدى. ئامېرىكا دۆلەت مۇداپىئە مىنىستىرلىقى بۇ مەسىلىنى ھەل قىلىش ئۈچۈن داۋاملىق تىرىشىۋاتىدۇ. يېقىندا، تور ئىشلىرى قوماندانلىق ئىشتابىنىڭ ئەمەلدارى مارگىرىت كرايىن: تورنى قورال دەپ بىلىش توغرىسىدا «ئېنىق قانۇنىي ئاساس كەم بولۇۋاتىدۇ»، دەپ ئاغرىندى.
     گاۋ خۇڭجۇ: ھەر قانداق بىر دۆلەت تور قورالىدىن پايدىلانغاندا، «ھەربىي نىشان بىلەن پۇقرالار نىشانىنى ئېنىق پەرقلەندۈرۈشى»، خەلق ئەسلىھەلىرىنى زەربە بېرىش ئوبيېكتى قىلىشتىن قەتئىي ساقلىنىشى كېرەك، دېدى.