شىنخۇا تورىنىڭ 17- سېنتەبر توكيودىن ئەۋەتكەن تېلېگراممىسى: ياپونىيەدە زىيارەتتە بولۇۋاتقان ئامېرىكىنىڭ دۆلەت مۇداپىئە مىنىستىرى  پانېتتا 17- سېنتەبر ئىلگىرى- كېيىن بولۇپ ياپونىيەنىڭ تاشقى ئىشلار ۋەزىرى كوئىچىرو گېنبا، مۇداپىئە ۋەزىرى ساتوشى مورىموتو بىلەن سۆھبەتلەشكەندە، ئامېرىكا- ياپونىيە ئىتتىپاقىنى كۈچەيتىشنى مۇراجىئەت قىلدى، ھەمدە ياپونىيە ۋە جۇڭگونىڭ ئۆزىنى تۇتۇۋېلىپ، سېنكاكۇ ئارىلى (يەنى جۇڭگونىڭ دىياۋيۈ ئارىلى ۋە ئەتراپىدىكى ئاراللار) نىزاسىنى قۇرۇلۇش خاراكتېرىدە ھەل قىلىشنى ئۈمىد قىلدى.
ئامېرىكىنىڭ دۆلەت مۇداپىئە مىنىستىرى پانېتتا ياپونىيەنىڭ تاشقى ئىشلار ۋەزىرى كوئىچىرو گېنبا بىلەن ئۆتكۈزگەن سۆھبىتىدە مۇنداق دېدى: ئاسىيا- تىنچ ئوكيان رايونىنىڭ بىخەتەرلىكى ۋە گۈللىنىشىنى كاپالەتلەندۈرۈش ئۈچۈن، ھازىر ئامېرىكا بىلەن ياپونىيەنىڭ ئىتتىپاقىنى كۈچەيتىدىغان پەيت كەلدى.
كوئىچىرو گېنبا مۇنداق دېدى: ياپونىيە- ئامېرىكىنىڭ بىخەتەرلىك قوغداش تۈزۈلمىسى ياپونىيەنىڭ بىخەتەرلىكى ۋە ئاسىيا- تىنچ ئوكيان رايونىنىڭ مۇقىملىقىنى قوغداشتا كەم بولسا بولمايدىغان ئامىل. بۇنىڭدىن كېيىن ياپونىيە- ئامېرىكا مۇناسىۋىتىنى داۋاملىق چوڭقۇرلاشتۇرۇش كېرەك، ياپونىيە ئومۇمىيەت قارىشى بويىچە ياپونىيە- جۇڭگو مۇناسىۋىتىنى سۇغۇققانلىق بىلەن بىر تەرەپ قىلىدۇ.
پانېتتا ياپونىيەنىڭ مۇداپىئە ۋەزىرى ساتوشى مورىموتو بىلەن ئۆتكۈزگەن سۆھبىتىدە: ئامېرىكا بىلەن ياپونىيە چوقۇم ئىتتىپاقداشلىقتىكى رول، مەسئۇلىيەت، ئىقتىدارنى قايتىدىن تونۇپ، ئۇچۇر بىخەتەرلىكى، ئالەمدىن پايدىلىنىش، تور بىخەتەرلىكى، باشقۇرۇلىدىغان بومبىدىن مۇداپىئەلىنىش قاتارلىق جەھەتلەردە ئىتتىپاقداشلىق مۇناسىۋەتنى چوڭقۇرلاشتۇرۇشى كېرەك، دېدى، ھەمدە بۇنىڭدىن كېيىن ئامېرىكا- ياپونىيە بىخەتەرلىك قوغداش پروگراممىسىغا تۈزىتىش كىرگۈزۈش مۇمكىنچىلىكىدىن بېشارەت بەردى.
پانېتتا يەنە مۇنداق دېدى: ياپونىيەدە MV－22تىپلىق «دېڭىز بۈركۈتى» ناملىق ئايروپىلان ئورۇنلاشتۇرۇش ياپونىيەنىڭ مۇداپىئە ئىشلىرىنى قانات يايدۇرۇشىدا تولىمۇ مۇھىم. ئامېرىكا تەرەپ بۇ جەڭ ئايروپىلانىنىڭ بىخەتەرلىك فۇنكىسىيەسى تىرىشىپ كاپالەتلىك قىلىدۇ.
ساتوشى مورىموتو مۇنداق دېدى: ياپونىيە بىلەن ئامېرىكا بۇنىڭدىن كېيىن تۈرلۈك ھەربىي مانېۋىر ئارقىلىق ھەرىكەتچان قوغدىنىش ئىقتىدارىنى ئۆستۈرىدۇ.
پانېتتا يەنە مۇنداق دېدى: ئامېرىكا سېنكاكۇ ئارىلى (يەنى جۇڭگونىڭ دىياۋيۈ ئارىلى ۋە ئەتراپىدىكى ئاراللار) نىڭ ئىگىلىك ھوقۇقى تەۋەلىكى مەسىلىسىدە مەيدان تۇتمايدۇ. ئامېرىكا ياپونىيە بىلەن جۇڭگونىڭ بۇ مەسىلىدىكى قارشىلىشىشىدىن ئەندىشە قىلىدۇ. ئىككى دۆلەتنىڭ دېپلوماتىيە ۋاسىتىسى ئارقىلىق ماجرانى سوغۇققانلىق بىلەن، تىنچ، قۇرۇلۇش خاراكتېرىدە ھەل قىلىشىنى ئۈمىد قىلىدۇ، بۇ شۇنداقلا يەنە ياپونىيە ۋە جۇڭگونىڭ دۆلەت مەنپەئەتىگىمۇ ئۇيغۇن.