ئوتتۇرا شەرق ۋە پارس قولتۇقىدىكى ئەرەب دۆلەتلىرى ۋە ئىسلام دۆلەتلىرىنىڭ ۋەزىيىتى خەلقئارا جەمئىيەتنىڭ قاتتىق دېققىتىنى قوزغىدى

سەئۇدى ئەرەبىستانى ئىران بىلەن بولغان دىپلوماتىك مۇناسىۋىتىنى ئۈزگەنلىكىنى جاكارلىغاندىن كىيىن، بەھرەين بىلەن سۇدان 4-يانۋار ئىران بىلەن بولغان دىپلوماتىك مۇناسىۋىتىنى ئۈزگەنلىكىنى ئارقا-ئارقىدىن جاكارلىدى، ئەرەب بىرلەشمە خەلىپىلىكى ھۆكۈمىتى ئىران بىلەن بولغان دىپلوماتىك مۇناسىۋىتىنىڭ دەرىجىسىنى تۆۋەنلەتكەنلىكىنى جاكارلىدى. سەئۇدى ئەرەبىستانى بىلەن ئىراننىڭ دىپلوماتىك مۇناسىۋىتىنىڭ ئۈزۈلۈشى ھەر قايسى تەرەپلەرنىڭ ئەندىشىسىنى پەيدا قىلدى، خەلقئارا جەمئىيەت بەس بەستە ئىككى دۆلەتنىڭ ئۆزلىرىنى تۇتۇۋېلىپ، ئوتتۇرا شەرق رايونى ۋەزىيىتىنىڭ جىددىيلىشىشىدىن ساقلىشىنى مۇراجىئەت قىلدى.

بىرلەشكەن دۆلەتلەر تەشكىلاتىنىڭ باش كاتىپى بان كېمون 4- يانۋار باياناتچى ئىشخانىسى ئارقىلىق بايانات ئېلان قىلىپ مۇنداق دېدى: مەن، سەئۇدى ئەرەبىستانىنىڭ دىپلوماتىيە ۋەزىرى جۇبەر ۋە ئىراننىڭ دىپلوماتىيە مىنىستىرى زەرىف بىلەن ئايرىم ئايرىم تېلېفونلىشىپ،ئىككى تەرەپنى ۋەزىيەتنى يەنىمۇ يامانلاشتۇرۇۋېتىدىغان ھەرقانداق ھەرىكەتلەرنى قوللىنىشىدىن ساقلىنىشقا دەۋەت قىلدىم، ھەمدە ئىككى دۆلەتنىڭ مەزكۇر رايوننىڭ مەنپەئەتى ئۈچۈن داۋاملىق ئىجابىي تۆھپە قوشۇشنى تەكىتلىدىم.

ياۋروپا ئەللىرى ئىتتىپاقىنىڭ دىپلوماتىيە ۋە بىخەتەرلىك سىياسىتى بويىچە يۇقىرى دەرىجىلىك ۋەكىلى موگەيرىنى 4-يانۋار ئىراننىڭ دىپلوماتىيە مىنىستىرى زەرىف بىلەن سەئۇدى ئەرەبىستانى ۋە ئىران ۋەزىيىتى توغرىسىدا تېلېفونلىشىپ، ھەر قايسى تەرەپلەرنىڭ ئۆزلىرىنى تۇتۇۋېلىشىنى مۇراجىئەت قىلدى.

ياۋروپا ئەللىرى ئىتتىپاقنىڭ دىپلوماتىيە ئىشلىرى بۆلۈمى باياناتىدا مۇنداق دېدى: ھەر قايسى تەرەپلەر جىددىي ۋەزىيەتنى يەنىمۇ كەسكىنلەشتۈرۈۋېتىشىدىن تىرىشىپ ساقلىنىشى كېرەك. خەلقئارا جەمئىيەت ۋە رايوندىكى ئاساسلىق دۆلەتلەر پائال ھەمكارلىشىپ، سۇرىيە كىرىزىسىنى سىياسىي يول بىلەن ھەل قىلىش ھەمدە ئىتتىپاقلىشىپ تېررورچى تەشكىلاتلارغا زەربە بېرىشىگە توغرا كېلىدۇ، بۇ تىرىشچانلىقلار يېڭى مۇقىمسىزلىق ۋەزىيىتىنىڭ بۇزغۇنچىلىق قىلىشىغا ئۇچرىماسلىقى كېرەك.

ئەلدىيار تورى ئۈندىدار سالونى : eldiyar99