Dunyakara

版权声明：转载时请以超链接形式标明文章原始出处和作者信息及本声明
logs/32071605.html

خاتالاشمىسام 10-ئايدىن باشلاپ يۈكسەل بلوگى ئۆز ئىختىيارلىقى بىلەن "ئۇيغۇرلاردىكى 10چوڭ بلوگ"ناملىق پائالىيەتنى ئويۇشتۇرۇپ بىرقانچە باسقۇچلار بويىچە ئاخىرقى نەتىجىنى كۆپچىلىكنىڭ ئوتتۇرىغا خالىسانە قويماقچى. ھازىر نامزات كۆرسىتىش تۈگەپ ئاۋازغا قويۇش ئېلىپ بېرىلىۋاتىدۇ، ئارقىدىن يەنە ئۇنۋېرسال باھالاش ئېلىپ بېرىلسا يىل ئاخىرىدا نەتىجىسى ئېلان قىلىنىدۇ. دىمەك مەن بۇ پائالىيەتكە باشتىن ئاخىر دىققەت قىلىپ كېلىۋاتقان بولساممۇ لېكىن پائالىيەتنىڭ ئېلىپ بېرىلىش جەريانلىرىغا ھەم-دەمدە بولالماي كەلدىم.

مۇشۇ بىرنەچچە كۈندىن بۇيان "ئۇيغۇرلاردىكى 10چوڭ بلوگ" قا رەسمى "بېلەت تاشلاش" ئېلىپ بېرىلىۋېتىپتۇ. يۈكسەل بلوگىدىكى مەزكۇر پائالىيەتكە قالدۇرۇلغان ئىنكاسلارنىمۇ كۆرۈپ چىقتىم. شۇنىڭ بىلەن "داڭلىق بلوگ" بولۇشنىڭ زادى قانداق ئۆلچەملىرى بار؟ باھالاش جەريانى قانداق بولىدۇ؟ باھالاش ئۇسۇلى قانداق ئېلىپ بېرىلىدۇ؟ دىگەن بىر قاتار مەسىلىلەر ئۈستىدە تورلاردىن ئىزدەپ خېلى "يارمىداپ" باقتىم. ئەمدى تۆۋەندە مۇشۇ توغۇرلۇق ھېس قىلغانلىرىمنى سۆزلەپ ئۆتەي، باشقا بلوگگىرلادا مۇشۇ توغۇرلۇق بىر ئورتاق چۈشەنچىنىڭ ھاسىل بولۇپ قېلىشىنى ئۈمىد قىلىمەن ھەم مەزكۇر پائالىيەتنى ئۇيۇشتۇرغۇچى ساھىپخانا بولغان يۈكسەل ئەپەندىنىڭ باھالاش ئېلىپ بېرىش مۈشكۈل ئەمما ئەھمىيەتلىك بولغان بۇ پائالىيىتىنىڭ ئوڭۇشلۇق، توغرا، ئادىل ئېلىپ بېرىشىغا ئاز-تولا ياردىمى بولۇپ قالار دىگەن ئۈمىدتىمەن.

مەيلى "10چوڭ بلوگ" دەيلى ۋە مەيلى "داڭلىق" بلوگ دەيلى ئومومەن قىلىپ ئېيتقاندا بۇ بلوگلار ئارا سېلىشتۇرۇش ئېلىپ بېرىلىدىغان ،ئۇنۋېرسال كۆرسەتكۈچلەر بويىچە ئاخىرى رەتكە تۇرغۇزىلىدىغان بىر خىل پائالىيەت بولۇپ بۇ پائالىيەتنىڭ ئاخىرقى نىشانى بارلىق بلوگگىرلارنى توغرا نىشان ھەم توغرا بولغان يۈنۈلۈشكە يېتەكلەشتىن ئىبارەتتۇر، شۇنداق بولغان ئىكەن بىز ئۇنۋېرسال كۆرسەتكۈچتىن ئىبارەت بۇ بىر ئومومىلىقنى ئەتراپلىق ئويلىشىشىمىز كېرەك، شۇندىلا بلوگلار ئارا ئېلىپ بېرىلىدىغان بۇ پائالىيەتنى توغرا، ئادىل ، ھەققانىي ئېلىپ بارغىلى بولىدۇ.

"10 چوڭ بلوگ" بولۇشنىڭ ئۇنۋېرسال كۆرسەتكۈچلىرى مېنىڭچە رەسىمدىكى گىرافىدا كۆرسۈتۈلگەندەك مەزمونلارنى ۋە سالماقنى ئۆز ئىچىگە ئېلىشى مۇمكىن.

كۆرسەتكۈچلەرنىڭ چۈشەندۈرۈلىشى:

خەلق رايى %40:_ كۆرسەتكۈچلەرنىڭ ئىچىدىكى ئەڭ زور سالماق يەنىلا بلوگ كۆرگۈچىلىرىدىن ئىبارەت. ئاساسى سالماقنى ئىگەللىشىدىكى سەۋەپ  بلوگنىڭ كۆرۈرمەنلەر ئۈچۈن نەپ يەتكۈزۈشچانلىقى ۋە ئۇلار ئۈچۈن پايدىلىق بولغان ھەقلىق ۋە ياكى ھەقسىز مۇلازىمەتتە بولىشىدۇر.

كۈنلۈك ئوتتۇرىچە زىيارەت مىقدارى%20:_بۇنىڭدا كۈنلۈك ئوتتۇرىچە زىيارەت مىقدارى ئېلىنغاندا چوڭ-كىچىك، قېرى-ياش بلوگلارنىڭ ھەممىسىگە ئورتاق ئادىل مۇئامىلە قىلغىلى بولىدۇ. بۇنى تولا سۆزلىمىسەممۇ ئازراقلا ھىساۋاتتىن خەۋىرى بار ئادەم بىلەلەيدۇ.

Pagerankقىممىتى %15:_بۇ قىممەتنى بلوگ يېزىۋاتقان كەڭ بلوگگىرلار ھەممىسى بىلىدۇ، بۇ نۆۋەتتىكى ئىنتېرنېتتا ئېلىپ بېرىلىۋاتقان مەيلى توربەت بولسۇن ۋە مەيلى شەخسي بلوگ بولسۇن ھەممىسىگە ئورتاق باھا قويۇلىدىغان بىر خىل بىرلىككە كەلگەن ئۆلچەمدىن ئىبارەت، بۇنىڭ قىممىتىمۇ نۇرغۇنلىغان مەزمونلارغا بېرىپ چېتىلىدۇ، بۇنى ئېنتىرنېت مەخسۇس توربېتى ئۇنۋېرسال تەكشۈرۈش ئارقىلىق باھالاپ بېكىتىدىغان قىممەتتۇر،شۇڭا بىزمۇ بۇ تۈرنى قوشمىساق بولمايدۇ.

بلوگ مەزمونى ۋە يازمىغا قالدۇرۇلغان ئىنكاس ئەھۋالى%13:_بلوگ مەزمونى بەكمۇ كەڭ دائىرىدە بولۇپ مەزموننىڭ قايسى دائىرىدە بولىشى توغۇرلۇق ھازىرغىچە ھېچقانداق ئۆلچەم ۋە ياكى شەرت يوق، سىز قىزىقمىسىڭىز باشقىلار قىزىقىدۇ، سىز بۈگۈن قىزىقمىسىڭىز ئەتە قىزىقىپ قېلىشىڭىز مۇمكىن، شۇڭا بلوگ مەزمونىنىڭ قانداق بولىۋاتقانلىقى توغرىسىدا بىلگىلى بولىدىغان سۈپەتلەرنىڭ بىرى قالدۇرۇلغان ئىنكاستۇر، بلوگدا قالدۇرۇلغان ئىنكاس ئوموملاشتۇرۇپ ئېيتقاندا خۇددى بىر سورۇندىكى جامائەت پىكرىگە ئوخشايدۇ، مەيلى قايسى خىل تىلدىكى مۇنبەرلەر بولمىسۇن ھەممىسىنىڭ ئورتاق بىر ئوخشاش نۇقتىسى بار ئۇ بولسىمۇ ئىنكاس ئەڭ كۆپ قالدۇرۇلغان تېمىلارنى ئاۋات تېما، جەۋھەر تېما، قىززىق تېما دىگەندەك ناملار بىلەن تەرىپلەپ باش بەتنىڭ كۆزگە ئاسان چېلىقىدىغان ئورنىغا قويۇپ قويىدۇ، زىيارەتچىلەرنىڭ ئورتاق خۇسۇسىيىتىنى سىتاتىسكىلىغاندا %80كۆرۈرمەن ئالدى بىلەن ئاۋات تېمىلارنى كۆرىدىكەن، مۇشۇنىڭدىن چىقىپ تۇرۇپتىكى ئاۋات يازمىلىرىڭىز قانچىكى كۆپ بولسا قالدۇرۇلغان ئىنكاس شۇنچە كۆپ بولىدۇ، بلوگىڭىزنىڭ نامىمۇ شۇنچە تېز يامرايدۇ، شۇڭا بلوگدا قالدۇرۇلغان ئىنكاسنىڭ ئاز-كۆپلىكى بىلەن بلوگىڭىزنىڭ زىيارەت مىقدارى ۋە نام چىقىرىشى ئوڭ تاناسىپ بولىدۇ.

يازما سىجىللىقى ۋە ئىنكاسقا جاۋاپ بېرىش ئەھۋالى%8:_يازما سىجىللىقى ۋە ئىنكاسقا جاۋاپ بېرىش ئەھۋالى پۈتۈنلەي بلوگگىرغا يەنى بلوگ يازغۇچىغا قارىتىلغان كۆرسەتكۈچ بولۇپ، مۇنبەردە ئاۋات تېمىغا نىسبەتەن كۆرۈرمەنلەر ئۆز-ئارا پىكىر ئالماشتۇرىدۇ، بىراق شەخس بلوگدا بولسا كۆرۈرمەنلەر بىلەن بلوگ يازغۇچى پىكىر ئالماشتۇرىدۇ، بلوگ يېزىشنىڭ يەنە بىر زىددىيەتلىك ھەم قىيىن نۇقتىسى مۇشۇ يەردە. بۇ %8 لىك كۆرسەتكۈچ بلوگنىڭ سىجىللىقىغا ھەم بلوگ يازغۇچىنىڭ ئۇنۋېرسال ساپاسىغا، كەسپى ئەخلاقىغا بېرىلىدىغان باھا.

بلوگ يۈزى كۆرۈنىشى %5:_تورلاردىن ئاختۇرۇپ كۆرىشىمچە توربەت ياكى مۇنبەر كۆرگۈچىلىرىنى بىزار قىلىدىغان ئورتاق بولغان بىرنەچچە خىل ئامىل بولۇپ ئۇلارنىڭ ئىچىدە ئاساسلىقلىرى: بەت يۈزىدە ۋىروس بولۇش، كېچىكىپ ئېچىلىش ياكى بىر دەملىك قېتىپ قېلىش، بەت يۈزىدە ئېلاننى كۆپ قىستۇرىۋېلىش، تىزىملىك ئىقتىدارلىرى راۋان بولماسلىق، بەت يۈزى قالايمىقان كۆرۈمسىز بولۇش، ئاۋات تېمىلارنى چەككەندە قىستۇرما ئېلان كۆزنىكى چىقىۋېلىش قاتارلىق ئامىللاردىن بىزار ئىكەن.شۇڭا ياخشى بلوگ يۈزىنى بەرپا قىلىشتا بۇ مەسىلىنىمۇ ئويلاشمىساق بولماس ئەلۋەتتە.

ئوموملاشتۇرۇپ ئېيتقاندا ئالدى بىلەن ئاۋازغا قويۇلىدىغان بلوگلار توغرىسىدا بۆلەكلەر بويىچە قىسقىچە چۈشەندۈرۈش چىقىرىپ ئاندىن ھەرخىل كۆرسەتكۈچلەر بويىچە باھالاش ئۇسۇلى قوللىنىلسا توغىرلىق دەرىجىسى بىرقەدەر يوقۇرى بولامدىكىن دەپ ئويلايمەن.