ئۆز مۇخبىرىمىز ئارسلان كامىل خەۋىرى ، فوتوسى : يېقىنقى ئون نەچچە يىللاردىن بۇيان ، ئاپتونوم رايونىمىزدا مۇسۇلمانچە يېمەك - ئىچمەك كارخانىلىرى كۆپلەپ بارلىققا كېلىپ ، ياخشى ۋەزىيەت ۋە ئېتىبار سىياسەتلەرنىڭ تۈرتكىسىدە زور تەرەققىياتلارغا ئېرىشتى ھەمدە بۈگۈنكىدەك رىقابەتكە تولغان جەمئىيەتتە تەدرىجىي مۇكەممەللىشىپ ، مەھسۇلاتلىرىنى ئىچكىرى ئۆلكىلەردىكى زاۋۇت–كارخانىلارغا ھاۋالە قىلىپ ئىشلەپچىقىرىشتىن ، ئۆز دىيارىمىزدا زاۋۇت قۇرۇپ، يەرلىك خام ئەشيالار بىلەن مەھسۇلات ئىشلەپچىقىرىشقا يۈزلەنمەكتە. نۆۋەتتە ، شىنجاڭ ‹‹يۇرتۇم›› مۇسۇلمانچە يېمەك - ئىچمەك زاۋۇتىنىڭ شىنجاڭدا ئىشقا كىرىشتۈرۈلىشى ئەنە شۇ سۆزلىرىمىزنىڭ تىپىك مىسالى . 
پائالىيەتتىن كۆرۈنۈش
19ـ ئاپرىل چۈشتىن بۇرۇن ، ئاقسۇ ۋىلايىتى توقسۇ ناھىيەسىنىڭ تەرەققىيات رايونى باشقىچە قىزىپ كەتكەن بولۇپ ، يىراقتىن ، شىنجاڭ ‹‹يۇرتۇم›› مۇسۇلمانچە يېمەك - ئىچمەك زاۋۇتىنىڭ ئىش باشلاش مۇراسىمىغا بېغىشلاپ يېزىلغان ھەر خىل رەڭلىك پىلاكاتلار كۆزگە چېلىقاتتى ، شىنجاڭ ‹‹يۇرتۇم›› مۇسۇلمانچە يېمەك - ئىچمەك زاۋۇتىنىڭ قورۇسى ئادەم دېڭىزىغا ئايلانغان بولۇپ، ئالاھىدە تەكلىپ قىلىنغان مېھمانلار ئازادە ، كۆركەم قىلىپ سېلىنغان زاۋۇت قورۇسىنى ئېكسكۇرسىيە قىلىۋاتاتتى.
توقسۇ ناھىيەسىنىڭ ھاكىمى ئۆمەرجان ئىمىن باشلىنىش مۇراسىمىغا رىياسەتچىلىك قىلدى
شىنجاڭ ۋاقتى سائەت 10:00دا شىنجاڭ ‹‹ يۇرتۇم››مۇسۇلمانچە يېمەك - ئىچمەك زاۋۇتىنىڭ ئېچىلىش مۇراسىمى باشلاندى. يېغىنغا ئاقسۇ ۋىلايەتلىك مەمۇرىي مەھكىمىنىڭ مۇئاۋىن ۋالىسى نىياز ھاشىم، توقسۇ ناھىيەلىك پارتكومنىڭ شۇجىسى ما گوچياڭ، توقسۇ ناھىيەسىنىڭ ھاكىمى ئۆمەرجان ئىمىن، توقسۇ ناھىيەسىدىكى مۇناسىۋەتلىك ئىدارە– ئورگانلارنىڭ رەھبەرلىرى، رايونىمىزدىكى ھەرقايسى ئاخبارات ۋاستىلىرىنىڭ مۇخبىرلىرى ۋە ھەرساھەدىن تەكلىپ قىلىنغان مېھمانلار، ئىشچى–خىزمەتچىلەردىن بولۇپ 500 گە يېقىن ئادەم قاتناشتى. توقسۇ ناھىيەسىنىڭ ھاكىمى ئۆمەرجان ئىمىن باشلىنىش مۇراسىمىغا رىياسەتچىلىك قىلدى.
توقسۇ ناھىيەلىك پارتكومنىڭ شۇجىسى ما گوچياڭ مۇھىم سۆز قىلدى
‹‹ يۇرتۇم›› شىركىتى رايونىمىزنىڭ ھەرقايسى جايلىرىدا ئۇزاق مۇددەت تەكشۈرۈش ئېلىپ بېرىپ، توقسۇ ناھىيەسىنىڭ ھەرقايسى جەھەتتىكى شارائىتلىرىنىڭ يېمەك–ئىچمەك ئىشلەپچىقىرىش، ساقلاش، سېتىشتا ئەۋزەللىككە ئىگە ئىكەنلىكىنى بايقاپ، يېڭى تەرەققىيات رايونىدىن 60 مو كۆلەمدە يەر سېتىۋېلىپ، 2009–يىلدىن باشلاپ شىنجاڭ ‹‹ يۇرتۇم›› مۇسۇلمانچە يېمەك - ئىچمەك زاۋۇتى قۇرۇش ئىشلىرىغا كىرىشىپ كەتتى.
توقسۇ ناھىيەلىك پارتكومنىڭ شۇجىسى ما گوچياڭ مۇنداق دېدى: شىنجاڭ ‹‹يۇرتۇم ››مۇسۇلمانچە يېمەك–ئىچمەك زاۋۇتىنىڭ توقسۇ يېڭى تەرەققىيات رايونىغا ماكانلاشقانلىقىنى قىزغىن تەبرىكلەيمەن. شىنجاڭ ‹‹يۇرتۇم›› مۇسۇلمانچە يېمەك–ئىچمەك زاۋۇتى تەرەققىيات رايونىغا ئورۇنلاشقان مەبلىغى بىر قەدەر كۆپ، ناھىيەمىزنىڭ تەبىئىي شارائىتىدىن تولۇق پايدىلانغان مۇسۇلمانچە يېمەك–ئىچمەك پىششىقلاپ ئىشلەش زاۋۇتى. بۇ زاۋۇتنىڭ ناھىيەمىزگە ماكانلىشىشى ناھىيەمىنىڭ سانائەت ئىشلەپچىقىرىش كۈچىنىڭ يەنىمۇ زورايغانلىقىنىڭ ئىپادىسى، شۇنداقلا توقسۇ ناھىيەسىنىڭ يېزائىگىلىك، ئىقتىسادىي تەرەققىياتىدا ئىنتايىن مۇھىم رولغا ئوينايدۇ، ھەمدە ناھىيەمىزدىكى ئىش كۈتۈپ تۇرغان ياشلارنى خىزمەت پۇرسىتى بىلەن تەمىنلەيدۇ. ناھىيەمىز بۇ زاۋۇتنىڭ بۇندىن كېيىنكى تەرەققىياتىنى ھەر جەھەتتىن قوللايدۇ ۋە تېخىمۇ كۆپ تەرەققىيات نەتىجىلىرىنى قولغا كەلتۈرۈشىنى ئۈمىد قىلىدۇ.
شىنجاڭ ‹‹يۇرتۇم ›› مۇسۇلمانچە يېمەك - ئىچمەك تەرەققىيات چەكلىك شىركىتىنىڭ باش دىرېكتورى ئابدۇۋەلى ئابدۇسەمەت سۆز قىلدى
شىنجاڭ ‹‹يۇرتۇم›› مۇسۇلمانچە يېمەك - ئىچمەك تەرەققىيات چەكلىك شىركىتى 2003 - يىلى قۇرۇلغان بولۇپ ، شىنجاڭنىڭ مېۋە - چىۋە بايلىق ئەۋزەللىكىدىن تولۇق پايدىلىنىپ، شىنجاڭدىكى ھەرمىللەت خەلقنىڭ مۇسۇلمانچە ئىچىملىكلەرگە بولغان ئېھتىياجىنى قاندۇرۇش ئۈچۈن ، ئىچىملىك ئىشلەپچىقىرىشتىن ئىبارەت ئىستراتېگىيەلىك نىشاىننى بېكىتىپ ، 2004–يىلى شىنجاڭدا تۇنجى بولۇپ كولا ئىشلەپچىقىرىپ بازارغا سالدى ،ئارقىدىنلا ‹‹يۇرتۇم ›› قۇۋۋەت ئىچىملىكى، سودا سۈيى ، قارىقات ئىچىملىكى، گىلاس ئىچىملىكى قاتارلىقلارنى ئىشلەپچىقىرىپ ھەرمىللەت خەلقىنىڭ ياقتۇرۇپ ئىستېمال قىلىشى، شۇنداقلا يۇقىرى باھاسىغا ئېرىشتى.
مۇناسىۋەتلىك رەھبەرلەر زاۋۇتنى ئېكىسكۇرسىيە قىلدى
شىنجاڭ ‹‹يۇرتۇم ›› مۇسۇلمانچە يېمەك - ئىچمەك تەرەققىيات چەكلىك شىركىتىنىڭ باش دىرېكتورى ئابدۇۋەلى ئابدۇسەمەت مۇنداق دېدى: مەن ئالدى بىلەن بىزنى ھەر جەھەتتىن قوللىغان ۋە ياردەم بەرگەن ئاقسۇ ۋىلايىتىدىكى مۇناسىۋەتلىك رەھبەرلەرگە، ئاخبارات ساھەسىدىكى مۇخبىر دوستلارغا ۋە كەڭ خەلق ئاممىسىغا ئالاھىدە رەھمەت ئېيتىمەن. زاۋۇتىمىز 25 مىليون يۈەندىن ئارتۇق مەبلەغ سېلىنغان، يېمەك–ئىچمەك ئىشلەپچىقىرىشىدا تولۇق ئاپتوماتلاشقان ، خام ئەشيا تاللاشتىن تارتىپ ئىشلەپچىقىرىشنىڭ ئومۇمىي مۇساپىسىدە ھەقىقىي مۇسۇلمانچە مەھسۇلات ئىشلەپچىقىرىش ئىشقا ئاشۇرۇلغان مۇنتىزىم زاۋۇت. زاۋۇتىمىز كۈنىگە ئالتە ئىشلەپچىقىرىش لىنىيەسىدە 200 خىلدىن ئارتۇق 45 مىڭ يەشىك ئىچىملىك ، 15 مىڭ يەشىك يېمەكلىك ئىشلەپچىقىرىش ئىقتىدارىغا ئىگە. بىز ئىشەنچىلىك مەھسۇلاتلىرىمىز بىلەن شىنجاڭدىكى ھەرمىللەت خەلق ئاممىسىنىڭ ئېتراپ قىلىشىغا ئېرىشىش بىلەن بىرلىكتە يەنە ئىچكىرى ئۆلكە بازارلىرى ۋە ئوتتۇرا ئاسىياغا يۈزلىنىمىز، مەبلەغنى زورايتىپ، ھەرخىل قىيىنچىلىقلارنى يېڭىپ، مىللىي يېمەك - ئىچمەك مەدەنىيىتىمىزنى دۇنياغا تونۇتۇش، ‹‹يۇرتۇم››مەھسۇلاتلىرىنى خەلقنىڭ مەھسۇلاتى قىلىش ئارزۇيىمىزغا يېتىش يولىدا تېخىمۇ كۆپ تىرىشچانلىق كۆرسىتىمىز.
پائالىيەتتىن كۆرۈنۈش
نۆۋەتتە، بۇ شىركەتنىڭ ۋاكالىتەن سېتىش ئورنى 120 دىن، پارچە سېتىش نۇقتىلىرى 10 مىڭدىن ئاشتى. شىركەتنىڭ ‹‹يۇرتۇم››، ‹‹ئامراق›› قاتارلىق ماركىلاردىكى تۈرلۈك ئىچىملىكلىرى ۋە بوۋاقلار بۇيۇملىرىنى ئۆز ئىچىگە ئالغان مەھسۇلاتلىرى 100 خىلغا يەتتى. بۇ شىركەت 2006 - يىل ئىيۇندا جۇڭگو ئىسلام جەمئىيىتى تەرىپىدىن‹‹جۇڭگودىكى مۇسۇلمانچە يېمەكلىك ئىشلەپچىقىرىدىغان 28 كارخانىنىڭ بىرى››، 2006 - يىل ئىيۇلدا مەملىكەتلىك ئىشەنچىلىك كارخانىلار جەمئىيىتى تەرىپىدىن ‹‹جۇڭگونىڭ A دەرىجىلىك ئىشەنچىلىك كارخانىسى››، 2007 - يىل سېنتەبىردە خەلقئارا يېشىل مەھسۇلات تەرەققىياتىنى ئىلگىرى سۈرۈش جەمئىيىتى تەرىپىدىن ‹‹خەلقئارا يېشىل مەھسۇلاتلارنى ئىلگىرى سۈرۈش جەمئىيىتىگە ئەزا كارخانا›› دېگەن شەرەپلەرگە نائىل بولدى.
پائالىيەتتىن كۆرۈنۈش:
| 
يوللىغان ۋاقتى 2012-4-23 10:30:02
يوللىغان ۋاقتى 2012-4-23 12:12:14
