ۋىيەي،ئاداش!
مەقسۇت ئەمىن ئەركيار
ياش دوستىغا
ۋىيەي ئاداش، بۇ ئۆتۈكۈڭ مەتوكەن،
يوپكا بىلەن قاملىشىسەن قانداقمۇ؟
ۋىيەي ئاداش،پات-پات يېڭى كىيىپ تۇر،
تاشلىۋەتكەن بارمۇ ئۆزنى شۇنداقمۇ...
ۋىيەي ئاداش،سەھرالىقتەك يۈرگۈچە،
كەستۈر چاچنى، چىپار قىلىپ بويايمىز.
ئوت چىقىرىپ ئەركەكلەرنىڭ كۆزىدىن،
بەلنى ئېتىپ تانسا،دېسكو ئوينايمىز.
ۋىيەي ئاداش،كۈندە كىتاب ئوقۇيسەن،
رېئاللىقتا ياشىمامسەن ئادەمدەك.
ۋىيەي ئاداش،جاھان نەدە،سەن نەدە
ئۆزۈڭنىچۇ، چوڭ تۇتمىغىن ئۇنداق بەك.
ۋىيەي ئاداش،خەققە نېمە بىزگە شۇ،
بىزنىڭ ئەرلەر بەكلا ياۋاش،ياۋايى.
تاتلىق سۆزى يوق پەقەتلا،بەك قوپال،
نامرات بولسا ئۇ ئۆزىنىڭ گۇناھى.
ۋىيەي ئاداش،تېپىش كېرەك پۇللۇقنى،
ھالقا،زەنجىر ئۈزۈكلىرىڭ ئاز ئىكەن.
ۋىيەي ئاداش، تۆنۈگۈنكى ئاق پىشماق،
«شىيۇشەن»①كىيىم كىيگەن بالا ساز ئىكەن.
تۇرمۇش قۇرغان دوستىغا
ۋىيەي ئاداش، ئۆيۈڭلارنىڭ «جاڭشوسى»②،
زەپ سىغمىدى قارىغانچە كۆزۈمگە.
راست،ئاچماپتۇ ئالغان جاھازلىرىڭمۇ،
دوستۇم دېسەڭ كىرگىن مېنىڭ سۆزۈمگە.
توڭلاتقۇغا يەڭگۈشلىگىن چوڭىنى،
ئىچىگە تارت تام ئىشكاپنىڭ تېڭىنى.
ۋىيەي ئاداش،مودا نېمە بىلەمسەن،
يۈزدىن ئاشۇر تېلۋىزۇرنىڭ سۇڭىنى.
زۆھرە ئاپتۇ،سەن نېمىشقا ئالمايسەن،
ئايسەم ئاپتۇ،سەنمۇ چېنىپ قالمايسەن.
ئېرىڭ ئالسا سەن نېمىگە قاخشايتىڭ،
ۋىيەي ئاداش،بېشىڭغا غەم سالمايسەن!
جۇۋان دوستىغا
ۋىيەي ئاداش،ماكچىيىپلا كېتىپسەن،
ئۆلۈپ بەرمە ئەمدى ئەر دەپ، بالام دەپ.
چاي ئوينىغان گۈلبەھرەملەر،بېرىپ قوي،
بىزنىڭ بويتاق تاپسىلارغا سالام دەپ.
ۋىيەي ئاداش، جان بازارغا كىرەمتى،
بالاڭنى قوي،بىللە ئويناپ كۈلىمىز.
كىم بىلىدۇ ئېرىڭ نەدە سىرتتا،
بىزمۇ چۇ،ھايات پەيزىن سۈرىمىز.
ۋىيەي ئاداش،ۋىيەي سېنىڭ بۇ ھالىڭ،
قارا سېنى! خەت ئۆگىتىپ بالاڭغا.
چوڭ بولىدۇ ئۆلمىسە بۇ ھارمىلار،
چاكارمىدىڭ ئېرىڭ دېگەن ساراڭغا.
ۋىيەي ئاداش،ئىچ-ئىچىمدىن ۋاي،ۋىيەي،
نەرىمىز كام دەيمەن زادى ئەرلەردىن.
خەق ئالقاندا پەپىلەيدۇ،قوللايدۇ،
ئۆگىنەيلى ياتتىن،باشقا ئەللەردىن.
ۋىيەي ئاداش،بىز ئاياللار دۆت خەقتە،
نەۋاققىچە بېقىنىپلا يۈرۈيمىز.
ۋىيەي ئاداش،ئەكەل قولنى بىرلىشىپ،
ئەرنى،يۇرتنى قۇل قىلىمىز، ئۆرۈيمىز...
① راھەت كىيىم.بۇزۇپ ئېيتىلغان تىل ئادىتىنى ۋە چىنلىقنى كۆزدەتۇتۇپ ئەسلىسى بويىچە ئېلىندى.
② بېزىلىشى. بۇزۇپ ئېيتىلغان تىل ئادىتىنى ۋە چىنلىقنى كۆزدەتۇتۇپ ئەسلىسى بويىچە ئېلىندى.
نامسىز يوللىغان ۋاقتى 6 كۈن ئالدىدا
تىرىشىڭ ساتىرا ئىجادىيىتىدە نەتىجە يارىتىڭ