[نىدا] [شېئىر] ئازار بەرمە

nida

ئازار بەرمە

ئازار بەرمىگىن ئەي دىلبەر قاناتقاندەك جاراھەتنى،
سېلىپ باشىمگە بىر كۈندە تۈمەن سەۋدا-مالامەتنى،
قاراپ يۈزۈمگە بىلمىسەڭ ساڭا كۆيگەن ئالامەتنى،
تۈگەر قانداقمۇ سۆزلىسەم ئىشقىڭ يازغان ھېكايەتنى.

گۈلگۈن يۈزۈڭگە مەن تەشنا بولۇپ ئاشىق يۈرەر بولدۇم،
كېزىپ چۆللەرنى مەجنۇندەك تەنھا جاپا كۆرەر بولدۇم،
گويا كېرەكسىز خەس بولۇپ يار ئىشقىڭدا ئۆلەر بولدۇم،
شىپا تاپماققا رەنجىمگە ئۆزۈڭ كۆرسەت كارامەتنى.

جانىم تەسەددۇق سەن ئۈچۈن، پىدا بولسۇن مېنىڭ بارىم،
تېپىپ ئەقلىڭنى باققىنا تاتلىق كۈلۈپ بەڭباش يارىم،
ئۆلەر چېغىمدا دېگەيمەن سېنىڭ جانىڭ مېنىڭ جانىم،
كۈتۈپ ئۈمىدنى ۋەسلىڭدىن ئىزدەپ تاپاي سائادەتنى.

گويا چاقماقتەك گۈلدۈرلەپ سوقۇپ سالسا سېنى ئاھىم،
بولۇپ گوياكى سېرىتماق گېلىڭدىنلا سىقسا زارىم،
بېرىپ ئالدىڭغا مەن يەنە كەچۈر دەيمەن شېرىن جانىم،
پەقەت كۆزلەيمەن جەننەتۇل رىزۋان ئارا شۇ راھەتنى.

2014-يىل 3-ئوغۇز، ئۈرۈمچى

غىلاپ

بۇ  شېئىر  مۇخەممەسمۇ ئەمەسمۇ ؟  ئەدەبىياتتىن  خەۋىرى  بارلار  قايسى  تۈرگە  كىرىدىغانلىقىنى  دەپ  بەرسەڭلار ؟

كاشكارى

غىلاپ يوللىغان ۋاقتى  2014-10-3 19:09
بۇ  شېئىر  مۇخەممەسمۇ ئەمەسمۇ ؟  ئەدەبىياتتىن  خەۋىرى  ب ...

بۇ شىئىر مۇخەممەس(بەش قاتار ئەمەس) مۇئەمما مىكى تۆت قاتارنى نىمە دەپ ئاتايدۇ ئۇنتۇپ قاپتىمەن.بۇ دەرىسنى ئۈگەنگىنى خىلى ئۇزۇن ۋاقىت بوپتۇ ،تىل-ئەدەبىيات مۇئەللىمدىن سوراڭ.

nida

بۇ خىل شېئىر شەكلى مۇرەببە دېيىلىدۇ.
1-مەسنىۋىي (ئىككىلىك)
2-غەزەل (ئىككىلىك)
3-مۇسەللەس (ئۈچلىك)
4-مۇرەببە (تۆتلىك)
5-مۇخەممەس (بەشلىك)
6-مۇسەددەس (ئالتىلىك)
7-مۇسەممەس (سەككىزلىك)
8-مۇتەسسە (توققۇزلىك)
9-روبائىي (تۆتلىك)
خاتىرەمگە يېزىۋالغانلىرىمكەن. قوساقتا ئۇماچنىڭ تايىنى يوق، مۇخەممەستىن يۇقىرىسىنى يېزىپ باقماپتىمەن.

nida

كاشكارى يوللىغان ۋاقتى  2014-10-3 20:35
بۇ شىئىر مۇخەممەس(بەش قاتار ئەمەس) مۇئەمما مىكى تۆت قا ...

مۇئەمما دېگىنى تېپىشماق دېگەنلىك.

كاشكارى

nida يوللىغان ۋاقتى  2014-10-3 23:06
مۇئەمما دېگىنى تېپىشماق دېگەنلىك.

راس ئۇنتۇپ كىتىپتىمەن خاتالىقىمنى تۈزەتكىنىڭىنىڭىزگە رەھمەت

ADiL

رۇخسىتىڭىزنى ئالمايلا ئىككى پارچە شېئىرىڭىزنى روھلان ئۈندىدار سالونى (rohlancn) نىڭ 20141004 سانىغا يوللىۋېتىپتىمەن، باشقىچە پىكرىڭىز يوقتۇ ھە؟

zulpikar0998

ياخشى يېزىپسىز،شىئېرلىرىڭىزنىڭ ئايىغى ئۈزۈلۈپ قالمىسۇن.

غورور

zulpikar0998 يوللىغان ۋاقتى  2014-10-4 09:09
ياخشى يېزىپسىز،شىئېرلىرىڭىزنىڭ ئايىغى ئۈزۈلۈپ قالمىس ...

ياخشى  يېزىپسىز . قەلەم  تۇتقان  قوللىرڭىز  دەرت  كۆرمىسۇن. تېنىڭىز  سالامەت ،تۇرمۇشىڭىز  بەختلىك بولسۇن .