داۋامى.....
توقسۇن، ئەي بوران ۋادىسى! دەھشەتلىك بورانلىرىڭدىن ئايلىناي، سۆيۈملۈك قەھرى غەزەب بورانىم، خىياللىرىمنى ئۇچۇرۇپ نەگە ئاپىراي دەيسەن؟ شېرىن – تاتلىق قىسمەتلىرىمنى قايسى دوقاللارغا دۇچار قىلاي دەيسەن؟ ھاياتتىن سۆيۈنگەن ھېسلىرىمنى قايسى دەشتلەردە سەرسان قىلاي دەيسەن؟ ھۇشقۇيتىشلىرىڭدىن ئەجەب شۇملۇق پۇراپ تۇرىدىغۇ.....
ــ نېمانداق چۆچۈيسىز؟
مەن ئايالىمغا قارىدىم. ئۇنىڭ چىرايى قىزىرىپ كەتكەن ئىدى. شۇ تاپتا ئۆزۈمنىڭ چىرايىنىڭمۇ قىزىرىپ كەتكەنلىكىنى قىزىغان قانلىرىمدىن ھىس قىلماقتىمەن.
ــ تۇيۇقسىزلا كەينىمدە پەيدا بولۇپ مېنى قورقۇتىۋەتتىڭىز، ئۇخلاپ قالغان ئىدىڭىزغۇ،ــ «تىكەن قۇش»نىڭ چ چ بوشلۇقىنى ئېتىۋېتىش يا ئەتمەسلىكنى بىلەلمەي مائۇسنى مىجىقلىغىنىمچە ئولتۇردۇم. گويا ئايالىمنىڭ ئالدىدا گۇناھلىق بىر ئىش قىلىپ قويغاندەك ئۆزۈمنى ئۇنىڭ ئالدىدا ئەيىپلىك سېزەتتىم.
ــ قارا بېسىپ قالغان چېغى،ــ ئايالىم بۇ گەپنى ئالاھىدە ئۇرغۇلۇق قىلىپ ئېيتتى. ئۇ تەنە قىلىۋاتاتتى،ــ نەسىرۇللا، بۇ يانتاق قۇشقىچىڭىز بىلەن مۇشۇنداق پاراڭلاشقىلى ئۈچ ئايدىن ئاشتىغۇ دەيمەن، ئەمدى بولغاندا ئۇ يېنىڭىزغا ئۇچۇپ كەلدى، سىزنىڭ بۇنىڭغا چۈشەندۈرۈش بېرىدىغان ۋاقتىڭىز بولۇپ قالدىغۇ دەيمەن.
ئايالىمنىڭ بۇ سۆزلىرىدىن بىر خىل تەئەددىي چىقىپ تۇراتتى.
ــ زۇھالىيە بىلەن ئىككىمىز پەقەتلا ساۋاقداش، «قۇشقىچىڭىز»، «يېنىڭىزغا ئۇچۇپ كەلدى» دېگەن سۆزلىرىڭىز تولىمۇ ئارتۇقچە، زىيادە ئويلاپ كېتىپسىز.
ــ زىيادە ئويلاپ كېتىپتىمەنمۇ؟ــ ئايالىم ماڭا قاراپ مەسخىرىلىك كۈلدى،ــ ئۇنداق ئاددىي ئىش ئەمەستۇ؟ كېچە – كېچىلەپ باشقا ئاياللار بىلەن مۇڭدىشىسىز، خوش، ساۋاقدىشىڭىزمۇ دەپ تۇرايلى، شۇنچىلىك قىلىشقا نېمە زۆرۆرىيەت بار؟ قىز ساۋاقدىشىڭىز يالغۇز زۇھالىيەلامىدى؟ نېمىشقا يېرىم كېچىدە ئۇنىڭ رەسىملىرىگە قاراپ ھاڭۋېقىپ، خىيال سۈرۈپ تۇرۇپ كەتتىڭىز؟ نېمىشقا ئۈچ ئايدىن بېرى مەندەك ئايالىڭىزغا ئاتالمىش ئۇ ساۋاقدىشىڭىز توغرۇلۇق تىنىپمۇ قويمايسىز؟ ئۆتكەندە سورىسام، «بىز بىر سىنىپتا ئوقۇغان» دەپلا جاۋاب بەردىڭىز. ئەجەبا شۇ چاغدا ماڭا «چ چ رىمدىكى ‹تىكەن قۇش› زۇھالىيە شۇ» دېيىشكە پېتىنالمىدىڭىزغۇ؟ سىز بارغانسېرى تاپتىن چىقىپ كېتىپ بارىسىز.
ئايالىمنىڭ ھامان بىر كۈنى مۇشۇنداق سوئاللارنى سورايدىغانلىقىنى ۋە مۇشۇنداق گۇمانلارنى قىلىدىغانلىقىنى بىلىپ تۇرساممۇ، بىراق بۇنى تاپتىن چىققانغا سەۋەب قىلىدىغانلىقىنى ئويلىمىغان ئىدىم. شۇڭا ئالدىراپ سۆزىگە رەددىيە بەردىم.
ــ ياق، مەن تاپتىن چىققىنىم يوق. مەن ۋىجدانىمغا، سىزگە يۈز كېلەلمىگۈدەك ھېچ قانداق ئىش قىلمىدىم. مەن بىر قىز ساۋاقدىشىم بىلەن چ چ دا پاراڭلاشسام بۇنىڭ نېمە يامىنى بار؟ بۇنىڭلىق بىلەن مەن يولدىن چىققان بولۇپ قالامدىكەنمەن؟ توغرا، ئۇنىڭ بىلەن كۆپرەك پاراڭلىشىپ قالغان يېرىم بار. چ چ دېگەن مېنىڭ شەخسىي بوشلۇقۇم، ئۇنىڭدىكى دوستلىرىممۇ مېنىڭ شەخسىي تۇرمۇش ئالاقەمدىكى خۇسۇسىي مۇناسىۋەتداشلىرىم. گەرچە ئېرىڭىز بولساممۇ، ئۇلارنى سىزگە بىرمۇ بىر تونۇشتۇرۇپ تۇرۇش ۋە ئۇلاردىن دوكلات بېرىش ۋەزىپەم يوق دەپ قارايمەن. سىزنىڭمۇ ئەلۋەتتە بۇلارنى چۈشەنگۈچىلىكىڭىز بار.
ــ كەچۈرسىز، سىزنىڭ شەخسىي سىرىڭىزنى تىڭتىڭلاپ ساپتىمەن.
ئايالىم شۇنداق دېگىنىچە كەينىگە ئۆرۈلۈپ چىقىپ كەتتى. مەنمۇ كومپيۇتېرنى ئۆچۈرۈپ چىقىپ تۆشەككە كىرىپ ياتتىم. شۇ كېچىسى ئايالىمنىڭ ئۇخلىمىغانلىقىنى ئەتىسى ئۇنىڭ ئىشىغان قاپاقلىرىدىن كۆرۈپ يەتتىم.
بۈگۈن مەكتەپكە كەلسەم مەكتەپ مۇدىرىمىز خۇشلىقىدىن ئۆزىنى باسالمىغان ھالدا كۆرۈشۈش ئۈچۈن ئۇزاتقان قولۇمنى قويۇۋەتمەي خېلى ئۇزاققىچە سىقىپ تۇردى:
ــ ئۇكا، نېمىشقا يولىمىز بۇنچە ئوچۇقكېن دېسەم، زۇ شياڭجاڭ ئەسلى سېنىڭ بۇرۇنقى لا...،ــ مۇدىر «لايىقىڭ» دېمەكچى بولۇپ، يېنىمدىكى ئايال خىزمەتدىشىمىزغا قارىۋېتىپ گېپىنى ئۆزگەرتىۋالدى، ئايال خىزمەتدىشىمىز ھەممىمىزدىن ياشقا چوڭ، ھۆرمەتكە چوڭ، ئۇنىڭ ئۈستىگە ئۇ مېنىڭ نەۋرە ئاچام ئىدى،ــ ساۋاقدىشىڭ ئىكەن ئەمەسمۇ؟
مەنمۇ چاندۇرمايلا جاۋاب بەردىم:
ــ ھەئە، تۇرپان دارىلمۇئەللىمىندىكى ساۋاقدىشىم.
ــ ماۋۇ ئىشنىڭ توغرا كېلىپ قالغىنىنى، ئەمدى ئىشىمىز ياخشى بولدى. تەربىيلەش ئورنىمىز بار بولدى، ئەمدى باشقا يەردىن زال ئىجارىگە ئالىمىز دېمەيدىغان بولدۇق. رازىيە ئايلا، ئاياللار بايرىمۇ كېلىپ قالدى، بولسا زۇ شياڭجاڭنىڭ ئالدىدىن بىر ئۆتۈپ قويىدىغان ئىشتى،ــ مۇدىر رازىيە ئاچامغا ئىلتىماس تەرىقىسىدە قارىدى.
ــ شۇنداق قىلساققۇ ياخشى بولاتتى،ــ دېدى رازىيە ئاچام نەزىرىنى شاققىدە ماڭا يۆتكەپ،ــ زۇ شياڭجاڭ بۇ يەرگە يېڭى كەلدى، مەن تېخى ئانچە تونۇپ كەتمەيمەن، يەنە كېلىپ ئۇ جۇگان مەندىن جىقلا كىچىك، ھازىر ماڭا ئەپلەشمەيدۇ. نەسىرۇللانىڭ ساۋاقدىشى بولغاندېكىن ئۇ ئۆزى بىر نېمە قىلىپ تۇرمامدۇ. ئۆيۈڭگە چاقىرغانسەن بۇ چاغقىچە؟
ــ بۈگۈن ئاخشام سەغىرا چاقىرماقچى،ــ مەن بۇ قاملاشمىغان ۋەزىپىنىڭ ماڭا يۈكلىنىپ قېلىۋاتقانلىقىدىن ئۆزۈمنى قاچۇرۇپ شۇنداق دېدىم.
ــ دېمەك سەن چاقىرمىدىڭ؟
مەكتەپ مۇدىرىنىڭ بۇ سۇئالىدىن بىر خىل ئەيىپلەش ۋە تەنە چىقىپ تۇراتتى.
ــ سەغىرانىڭ كەينىدىن مەنمۇ چاقىرىۋالارمەن.
ــ ئۈكەم، بۇ ئىشىڭلار بولماپتۇ،ــ دېدى رازىيە ئاچام نارازىلىق چىقىپ تۇرغان كۆزلىرىنى ماڭا تىكىپ،ــ زۇ شياڭجاڭ بۇ يەرگە كەلگىلى نېكەم، ئەمدى چاقىرىمەن دېگىنىڭ نېمىسى؟ بۇ گاخقىچە (ۋاقتقىچە) نېمە قىلدىڭ. ھەي، بىزنىڭ ساۋاقدىشىمىز بولغان بولسا، كەپتۇ دېگۈچە ئۆيگە چاقىرىپ بولۇر ئىدۇق. ئىش دېگەننى گاختىدا قىل، سۇسلۇق قىلما.
مېنىڭ نېمىشقىمۇ ئۇنى ئۆيۈمگە چاقىرغۇم بولمىسۇن. بىراق ئۇلار نېمىنى بىلەتتى. چاقىرسام بولمايدىغانلىقىنى، توغرىسى نېمىشقا چاقىرالمايدىغانلىقىمنى بۇلارغا چۈشەندۈرگىلى بولاتتىمۇ.
ــ چاقىرىپ قويمىساڭ بىز توقسۇنلۇقلارنىڭ ئادەمگەرچىلىكى يوقكەن دەپ قالمىسۇن، بۇ بىزگىمۇ سەت،ــ ئەمدى بوغالتىرمۇ ئۆتەپ – تېشىپ مېنى ئەيىپلىگىلى تۇردى.
ــ بولىدۇ،ــ مەن قىسقىلا جاۋاب بەردىم.
كەچقۇرۇن تېلېۋىزور كۆرۈپ ئولتۇرساق ئۆي تېلېفونىمىز جىرىڭشىپ كەتتى. ئادەتتە ئۆي تېلېفونىمىزغا كېچىسى ئايالىمنىڭ ئوقۇغۇچىلىرىدىن ياكى ئائىلە باشلىقلىرىدىن تېلېفون كېلەتتى. ئايالىم تېلېفوننى ئالدى:
ــ ھە، تېنچلىقمۇ، سەغىرامۇسىز؟ ھە، نەسىرۇللا بار،ــ ئايالىم تېلېفون تۇرۇپكىسىنى ماڭا سۇندى. بۇ سەغىرانىڭ زۇھالىيەنى ئۆيىگە چاقىرغانلىق ۋەجىدىن بىزنى ياكى مېنى چاقىرىپ ئۇرغان تېلېفون ئىكەنلىكى ئېنىق.
ــ نەسىرۇللا، زۇھالىيە سەل تۇرۇپ كېلىدىغان بولدى، سىزلەرمۇ چىققان بولسىڭىزلار، بىللە ئولتۇرغان بولساق.
تېلېفون تۇرۇپكىسىدىن ھەممە گەپ ئوچۇق ئاڭلىناتتى. تېلېفوننىڭ يېنىدىن تېخى كەتمىگەن ئايالىم يۇقىرى ئاۋازدا سۆزلىدى:
ــ بۈگۈن ئاخشام سەباتىيەنىڭ ئوغلىنىڭ سۈننەت تويىغا كىرمىسەك بولماس.
بۇ ئايالىمنىڭ ئوچۇقتىن ئوچۇقلا «ئۇ يەرگە كىرمەيسەن» دېگىنى ئىدى. ئەسلىدە سەباتىيەنىڭ ئوغلىنىڭ خەتنە تويىغا ئايالىم ئۆزى كىرمەكچى، مەن بالىغا قاراپ ئۆيدە ئولتۇرماقچى بولغان ئىدىم. ئامالسىز سەغىراغا يالغان ئېيتتىم:
ــ كىرەلمەيدىغان ئوخشايمىز، كېيىن يەنە پۇرسەت بولۇپ قالار، سۈننەت تويغا كىرمىسەك سەت تۇرغىدەك.
تېلېفوننى قويۇپ ئايالىمغا سەت بىرنى ئالىيىۋېتىپ ھۇجرىغا كىرىپ كەتتىم. ئايالىم ئالايغىنىمنى قېتىغىمۇ ئېلىپ قويماي تازىلىق ئۆيىگە كىرىپ ئۆزىنى پەردازلاپ، رېستۇرانغا مېڭىشقا تەرەددۇتلاندى.
نە كىتاب ئوقۇش، نە يېزىقچىلىق قىلىش خۇشياقمايدۇ. كىتاب ئىشكاپىمنى مەقسەتسىز ئاختۇرىمەن، ئۇنى، بۇنى قېتىدىن سۇغۇرۇپ ئېلىپ كۆرۈپ باقىمەن. بىراق بىرىمۇ دىققىتىمنى جەلىب قىلىپ ئوقۇشقا قىزىقتۇرالمىدى. ئاخىرى ئورۇنلارنى سېلىپ تورۇسقا قارىغىنمىچە خىيال سۈرۈپ ياتتىم. بىر چاغدا ئايالىم توزدەك ياسىنىپ قېشىمغا كىردى ۋە ئىڭىشكىنىچە پىشانەمگە «چوككىدە» بىرنى سۆيۈپ قويۇپ قولىدىكى خەنزۇچە «جورا» ناملىق ژۇرنالنى يېنىمغا تاشلاپ قويدى:
ــ مەن كىرگىچە ماۋۇ ژۇرنالدىكى چىرايلىق قىزلارغا قاراپ كۆزىڭىزنىڭ پىتىنى ئۆلتۈرگەچ تۇرۇڭ.
ئايالىم چىقىپ كەتتى. ئۇ تاشلاپ قويغان ژۇرنالنى ۋاراقلاشقا باشلىدىم. ژۇرنالدىكى يېرىم يالىڭاچ قىزلار ۋە تۆت چاسا خەنزۇچە خەتلەر كۆزلىرىمنى ئالىچەكمەن قىلىپ، ئەسلىدىلا ئۇماچ بولۇپ كەتكەن كاللامنى تېخىمۇ ئىلەشتۈرۈپ، بېشىمنى قايدۇرىۋەتتى. ژۇرنالنى غەزەب بىلەن ئايالىمنىڭ ئوچۇق قالغان كىيىم ئىشكاپىغا قارىتىپ ئاتتىم. ئىچىمنىڭ بىر يېرى تىت – تىت بولاتتى. ھەئە، سەغىرالارنىڭ ئۆيىگە زۇھالىيەدىن ئەھۋال سورىغىلى كىرەلمىگەنلىكىم ئۈچۈن ئىچىم ئاچچىق بولاتتى، ئادايتتى. ئايالىمنىڭ ئالدىدا بويۇن ئېگىپ، ئۇنىڭ ئانچىكى بۇيرۇقىغا سەركەشلىك قىلالمىغانلىقىم ئۈچۈن ئۆزۈمنىڭ ئەرلىك غۇرۇرۇمنىڭ ئۇچۇغدالغانلىقىدىن خورلۇق ھىس قىلاتتىم. ساۋاقدىشىمنىڭ ھۆرمىتى ئۈچۈن ئاللاتائالانىڭ ھەققىدە ئىككىلىك ئەھۋال سوراپ، كۆڭۈل ئىپادىلەپ قويساق نېمە بولار بولغىيدى؟ بەرسەك خۇدانىڭ سالامىنى، مۇسۇلماننىڭ كۆڭلىنى بېرىمىزغۇ؟ ھەي خوتۇن، كۆڭلىڭىزنى چۈشىنىمەن. مېنى زۇھالىيە بىلەن بىرقانداق مۇناسىۋىتى بار دەپ ئويلايسىزغۇ تايىنلىق. بىراق ئۇنىڭ بىلەن پەقەت ۋە پەقەت ساۋاقداشلىق مۇناسىۋىتىملا بار، خۇددى سەغىراغا ئوخشاشلا. نېمىشقا يېنىمدىكى سەغىرادىن كۈنلىمەي، يىللاپ – يىللاپ دىدارىنى كۆرگىلى بولمايدىغان تۇرپانلىق زۇھالىيەدىن كۈنلەيدىغانسىز. چ چ دىكى كىشىلەر كىشىنى ئاشۇنداق ۋەسۋەسىگە، گۇمانغا سالامدىغاندۇ؟ ئايالىممۇ ئەلۋەتتە مۇشۇ ئائىلىمىزنى ساقلاپ قېلىش ۋە مۇستەھكەملەش ئۈچۈن شۇنداق قىلغاندۇ، بىراق ئۇنىڭ ھە دېگەندىلا زۇھالىيەدىن كۈنلىشىنى قوبۇل قىلالمايتتىم. مەن توي قىلىشتىن بۇرۇن كۆرۈشكەن قىزلارنىڭ ھەممىسىنى ئايالىم تونۇيتتى. ھەتتا بەزىلىرى بىلەن يېقىن ئارىلىشىپمۇ ئۆتەتتى. بەزىدە «نېمىشقا ئۇ قىزنى ئالمىغانسىز؟» دەپ چاخچاقمۇ قىلىپ قوياتتى. بىراق بىز توي قىلغان سەككىز يىلدىن بۇيان ئۇلارنىڭ بىرەرىدىن كۈنلەپ باقمىغان ئىدى. ئەمدى بولغاندا ماۋۇ ئون نەچچە يىل بۇرۇنقى ساۋاقدىشىمنى ھە دېگەندىلا يۈرەك دۈشمىنى قىلىۋالىدىغانغا ئارانلا تۇرىۋاتاتتى.
بالام تېلېۋىزورنى ئۆچۈرۈپ يېنىمغا كېلىپ ئۇخلاپ قالغىلى خېلى بولدى. كۆزۈمگە ئۇيقۇ كېلىدىغاندەك ئەمەس. كەچ سائەت 9:00 لاردىن ئاشقاندا ئايالىم كىرىپ كەلدى. ئۇ كىرىپلا كۆزۈمنى پارقىرىتىپ تورۇسقا قاراپ ياتقىنىمنى كۆرۈپ ئېغىز ئاچتى:
ــ كۆزىڭىزنىڭ پىتىدىن نەچچىنى ئۆلتۈردىڭىز؟ بىرەرنى بولسىمۇ تىرىك تۇتقانسىز، ھازىر پىتنى تاپقىلى بولمايدىغان بولۇپ كەتتى، پىت چاقسا قان بېسىم بولمايدىكەنمىش، تۇتقان پىتلىرىڭىز بولسا ماڭا بېرىڭە، ئۆزۈمنى تازا بىر چاقتۇرۇپ باقاي. مەنمۇ سەمىرىپ كېتىپ بارىمەن، ھېلى بىكار قان بېسىمى بولۇپ قالماي.
ئايالىمنىڭ چاخچىقىغا مەنمۇ زوڭڭىدىلا قويدۇم.
ــ پىت سىزگە كىچىك كېلىپ قالارمېكىن، ئېشەككىلا (چايان) چاقتۇرماي تايىنلىق.
ــ ۋاي – ۋۇي، يانتاق قۇشقىچىنىڭ قېشىغا كىرگۈزمىسەم ئىچىڭىز ئەجەب سېسىپ، ئاداب كېتىپتىغۇ،ــ ئايالىم يۈزلىرىنى يۇيۇپ كىرىپ كىيمىنى ئالماشتۇرغاچ ماڭا زەردە قىلدى،ــ ئېشەك تولا چېقىپ گۇناھىم تۈگىگەن مېنىڭ (توقسۇندا ئادەمنىڭ گۇناھى كۆپىيىپ مەلۇم جايغا كەلگەندە چايان چاقىدۇ، شۇنىڭ بىلەن گۇناھتىن پارىغ بولىدۇ دەيدىغان گەپ بار)، نۆۋىتى كەلگەن بولسا سىزگە كەلگەندۇ، ئەپپىي، ماۋۇ ژۇرنالنى مېنىڭ كىيىم ئىشكاپىمغا تىقىپ قويۇپسىزغۇ،ــ كىيىم ئىشكاپىدىن ئۇخلاش كىيمىنى ئالغان ئايالىم مەن بايا ئېتىۋەتكەن ژۇرنالنى كۆتۈرۈپ ئېلىپ، ھەيران بولغان ھالدا ماڭا تىكىلدى،ــ پىتلارچۇ؟ قېنى ئۇلار؟ ماچچىدە يەپلىۋالمىغانسىز؟
ئايالىمنىڭ ئادەمنىڭ ئىچىنى ئېلىشتۇرىدىغان گەپلىرىدىن ئىچىم ئېلىشىپ ئورنۇمدىن تۇرۇپ كەتتىم ۋە تازىلىق ئۆيىگە كىرىپ تۈكىرىۋېتىپ كىردىم.
ــ مېنىڭ گۇناھىم توشمىدى، شۇڭا ھازىرچە ئېشەكتىن قورقۇنچۇم يوق.
ئايالىم ئۇخلاش كىيمىنى ئالماشتۇرۇپ بولۇپ ئۆزىنىڭ يوتقىنىغا كىرمەي مېنىڭ يېنىمغا موككىدىلا چۆكتى ۋە ئىككى جەينىكىنى كۆكرىكىمگە تىرىگىنىچە كۆزۈمگە تىكىلىپ قاراشقا باشلىدى. ئايالىمنىڭ چۆرىسىگە بىلىنەر – بىلىنمەس قورۇق چۈشۈشكە باشلىغان قوشما قاپاقلىرىنىڭ ھىمايىسىدە بۇلاقتەك بالقىپ تۇرىدىغان زەڭگەرگە مايىل كۆزلىرى يەنىلا شۇ قەدەر سېھىرلىك ئىدى. سەككىز يىل بۇرۇن ئۇ ئەشۇ سېھىرلىك جادۇ كۆزلىرى بىلەن قەلب تۆرۈمگە بۆسۈپ كىرگەن، شۇ كۆزلىرى بىلەن مېنى ئۆمۈرلۈك نىكاھ قەسىرىگە باشلاپ كىرگەن ئىدى. بەزىدە شۇنداق دېگۈم كېلىدۇ، مۇھەببەتنى مەشۇقنىڭ كۆزىدىن مۇستەسنا تەسەۋۋۇر قىلىش ھەرگىز مۇمكىن ئەمەس. ئاشىقلار «كۆز يۈرەكنىڭ ئەلچىسى»، «كۆز يۈرەك ئوغرىسى» دەپ بىكار ئېيتماپتىكەن. مەن سەككىز يىل سۈمۈرۈپ قانمىغان ئايالىمنىڭ كۆز نۇرلىرى ھېلىھەم شۇنداق جەزبلىك ئىدى. ئۇنىڭ جەينىكى بىلەن كۆكرىكىمنى بېسىۋالغىنىدىن كۆرە تىكىلىپ قاراشلىرىغا بەرداشلىق بېرەلمەي يىنىك ئىڭرىۋەتتىم:
ــ ۋايجان، نەپەس ئالالمايۋاتىمەن، بولدى قىلىڭە، كۆزۈمگە نېمانداق قاراۋېرىسىز؟
ــ مەن كۆزىڭىزنىڭ نەچچە پىتىنى ئۆلتۈرەلەيمەنكىن دەپ قاراۋاتىمەن، بىرەر تالمۇ چىقاي دېمەيدىغۇ؟
ــ ھەي شەيتان، بولدى قىلىڭە، سىز سەككىز يىلدىن بېرى ئۆلتۈرۈپ بولدىڭىز، ئەمدى يوق،ــ مەن ئايالىمنىڭ كۆكرىكىمگە قويۇۋالغان قولىدىن تارتىپ يېنىمدا ياتقۇزۇپ قويدۇم.
ــ ياق، تېخى تۈگىمىدى، پىنھان يەرلىرىدە يەنە بىر تاسقام بارغۇ دەيمەن، ئۆلتۈرىمەن، زادى ئۆلتۈرىمەنغۇ تازا،ــ ئايالىم جاھىللىق قىلىپ يەنە جەينىكىنى كۆكرىكىمگە ئېلىۋالدى.
مەن كۆزۈمنى چىڭڭىدە يۇمىۋالدىم.
ــ خەپ ھە، مېنى ئاچتۇرالمايدۇ دەپ قالماڭ ھە، ھېلى بىكار جۇمۇ، قولتۇقنىمۇ ياكى....بېقىننىمۇ؟
ئايالىمنىڭ مېنى غىجىقداشقا تەييارلىنىۋاتقانلىقىنى بىلىپ دەرھال كۆزۈمنى ئاچتىم ۋە تەسلىم بولغانلىقىمنى بىلدۈردۈم.
ـــ مانا ئاچتىم، قېنى ئۆلتەرسىلە ئايال پادىشاھ ئالىيلىرى.
ـــ ئۆلمىگەن يەنە نەچچە پىت بار؟ تولۇق ئىقرار قىلىڭ، بىرى كەم بولسا بولمايدۇ. ھەممىنى ئۆلۈمگە بۇيرۇيمەن، جەددى – جەمەتى بىلەن قىرىپ تاشلايمەن.
ئايالىم ئويۇن قىلىپ قىقىلداپ كۈلۈشكە باشلىدى. مەن تېزلىك بىلەن ئايالىمنىڭ ئاغزىنى ئېتىپ ئۇنى جىمىلىدىم.
ــ ئاۋازىڭىزنى پەس قىلىڭ، بالا ئويغىنىپ كېتىدۇ، مېڭىڭ، جايىڭىزغا بېرىپ يېتىڭ.
ئايالىم شۇندىلا ئۆزىنى بېسىۋېلىپ جايىغا بېرىپ ياتتى.
مارتنىڭ ئىزغىرىن شامىلى كىشىگە ھوزۇر بېرىشتىن كۆرە بىزارلىق ھىس قىلدۇراتتى. كونىلار «قىشنىڭ سوغۇقى ياندىن ئۆتەر، ئەتىيازنىڭ سوغۇقى جاندىن» دەپ بىكار ئېيتمىغان ئىكەن. ئالغۇي تەرەپتىن ئەسكەن سوغۇق تاغ شامىلى يۈزلەرگە چىمىلداپ ئۇرۇلاتتى. غەربىي جەنۇب تەرەپتىكى قالماق تاغلىرى بىلەن شەرقىي شىمال تەرەپتىكى قاراتاغ تېخىچە كۈمۈش لىباسىنى سالمىغان ئىدى. يېزا بازىرىنىڭ تۆت كوچىنىڭ ئەتراپىغا تىكىلگەن يايمىچىلارنىڭ چېدىرلىرى شامالدا لەپەڭشىيتتى. ئاسماننىڭ باتنىغاق كېلىننىڭ چىرايىدەك بۇلۇتلۇق تۇرغان ھالىتى بۇ ئىزغىرىن شامالنىڭ ھايال ئۆتمەي ئۆتكۈنچى بورانغا ئايلىنىدىغانلىقىدىن بىشارەت بېرىپ تۇراتتى. بۈگۈن بازار كۈنى ئەمەس، ئۇنىڭ ئۈستىگە يېزىلىق ھۆكۈمەت ھەرقايسى كەنتلەرگە بۈگۈندىن باشلاپ قاتتىق بوران چىقىدىغانلىقى، ئەزالارنىڭ بىخەتەرلىككە دىققەت قىلىشى ۋە پارنىك مۇداپىيىسىگە ياخشى ئىشلىشى كېرەكلىكى توغرىسىدا ئۇقتۇرۇش بېرىۋەتكەن بولغاچقا، يېزا بازىرىدا ھېچقانچە ئادەم يوق ئىدى. تۆت كوچىدا پەقەت بىر قانچە تاكسى ناھىيە بازىرىغا ۋە ئالغۇي بازىرىغا بارىدىغانغا خېرىدار كۈتۈپ تۇرىشاتتى. بىزنىڭ مەھەللىمىز بولغان بەخت ئولتۇراق رايونىنىڭ ئالدىدىكى خەنزۇلار ئاچقان ئىككى بوتكىدىن باشقا ماگېزىنلار ئاساسەن ئېچىلمىغان ئىدى. بۇ بوران پەقەت ھاراقكەشلەرگىلا تەسىر قىلالمىغاندەك قىلاتتى. بۈگۈنكى بوران سەۋەبلىك مەكتەپلەردىن ئوقۇتقۇچى –ئوقۇغۇچىلارمۇ قويىۋېتىلىپ دەم ئالىدىغان بولغاچقا ئۈچەيلەنلا ئۆيدە ئىدۇق. مەن بانكىدىن ئازراق پۇل ئېلىۋېلىش ئۈچۈن پەسكە چۈشكەن ئىدىم.
تۆت كوچىنىڭ شەرقىي جەنۇب تەرىپىگە جايلاشقان «ئامانلىق» ئولتۇراق رايونىنىڭ ئالدىدا پوچتا بانكىسىنىڭ پۇل بەرگۈسى بار ئىدى. مەن پۇل بەرگۈنىڭ ئالدىغا بېرىشىمغىلا ئىشىكنى ئېچىپ زۇھالىيە چىقىپ كەلدى. ئۇنىڭ بىلەن بۇ يەردە تۇيۇقسىز ئۇچرىشىپ قالغانلىقىمدىنمېكىن ياكى ئۆتكەندە سەغىرانىڭ ئۆيىگە ئۇنىڭدىن ئەھۋال سوراپ كىرەلمىگەنلىكىمدىنمېكىن ئەيتاۋۇر ھودۇقۇپ كەتتىم.
ــ زۇ شياڭجاڭ، ئوبدان تۇردىڭىزمۇ؟
زۇھالىيە مېنىڭ ھودۇققان تۇرقۇمغا ۋە قولاشمىغان ئەھۋال سوراشلىرىمغا قاراپ كۈلۈپ كەتتى.
ــ بولدى قىلىڭە، زۇ شياڭجاڭ دېسىڭىز غىجىقىم كېلىدىكەن. بىر چىرايلىق ئىسمىم تۇرسا، زۇھالىيە دەۋېرىڭە، ساۋاقداشلىرىم بۇنداق ئاتىسا باشقىچىلا تۇرىدىكەن، ئەمدى ئۇنداق ئاتىماڭ ھە، بولمىسا سالىمىڭىزنى ئىلىك ئالمايمەن.
ــ بولىدۇ، زۇھالىيە، مەندىن ئاغرىنغىنىڭىزنى بىلىمەن. ئالدىڭىزدا خىجىلمەن.
ــ ۋۇي، نەسىرۇللا، بوراندا باشقىچىلا پاراڭ قىلىسىزغۇ؟ نېمە ئۇ ئاغرىنىش، خىجىل بولۇش دېگەن گەپلەر؟ چۈشىنىكسىزلا گەپلەرنى قىلىسىزغۇ؟
ــ سىزگە ھاردۇق چېيى بېرىپ كۈتىۋېلىش يولىمىز بار ئىدى. ھەر خىل سەۋەبلەر بىلەن ئالدىڭىزغا چىقالمىدۇق. ئەپۇ قىلارسىز.
ــ شۇ گەپمىدى؟ بۇ قەدەر سۆزلىرىڭىزدىن شۇ چېيىڭىزنى ئىچكەندەك بولدۇم، ساۋاقدىشىم. سەغىرا بەردىغۇ، ئۇنىڭدىن ئارتۇق قانداق بولماقچى ئىدى؟ توقسۇن، ئىلانلىق ئاللىقاچان ماڭا جاي بەردى، چاي بەردى. ھەر بىر ساۋاقدىشىمدىن چاي تەلەپ قىلىدىغان ئاچپاقا ئەمەسمەن. ئەمدىلىكتە چاينى مەن بېرىمەن. ۋاقتى كەلگەندە باھانە تۈزەپ كەلمەي قويسىڭىز بولمايدۇ جۇمۇ؟
ئۇنىڭ «باھانە تۈزەپ كەلمەي قويسىڭىز بولمايدۇ جۇمۇ؟» دېگىنى ماڭا خۇددى سەغىرانىڭ ئۆيىگە چىللىغىنىدا باھانە تۈزەپ چىقمىغىنىمغا دارىتمىلاپ دەۋاتقاندەكلا بىلىنىپ كەتتى.
بىز قىسقىلا پاراڭلىشىپ خوشلاشتۇق. مەن پۇل بەرگۈنىڭ يېنىدا ئۇنىڭ يىراقلىشىپ كەتكىنىگە قاراپ تۇردۇم. بايىقى شامال ئەمدى كۈچىيىپ بورانغا ئايلانغان ئىدى. زۇھالىيە بوراندا كۆزىنى ئاچالماي كەينىنى قىلىۋالغان ئىدى. ئۇ تۆت كوچىغا چىقىشىغا شىمال تەرەپتىن كەلگەن ئاسمان – پەلەك قويۇنتاز (توقسۇن شېۋىسى: قويۇن) ئۇنى يالماپ يۇتىۋېتىدىغاندەك يوپۇرۇلۇپ كەلدى. ئۇ تېخىچىلا بورانغا كەينىنى قىلىپ تۇرىۋاتقان بولغاچقا ئۇ قويۇنتازنى كۆرمىگەن ئىدى. مەن «ئاپلا» دېدىمدە زۇھالىيەنىڭ قېشىغا جان جەھلىم بىلەن يۈگۈردۈم. يۈگۈرگەچ بار ئاۋازىم بىلەن توۋلىدىم:
ــ زۇھالىيە، تېز قېچىڭ، قويۇنتاز!
لېكىن بۇ ئاۋاز بوراننىڭ دەھشەت بىلەن تارتقان نەرىسىگە سىڭىپ كەتتى. زۇھالىيەگە ئاز قالغاندا ئۇ ئاندىن مېنىڭ يۈگرەپ كېلىۋاتقانلىقىمنى كۆرۈپ ئەندىكىپ كەينىگە قارىدى. بىراق كېچىككەن ئىدى. مەنمۇ ھەم ئۇنى قويۇنتازدىن تارتىۋېلىشقا ئۈلگۈرەلمەي ئۇنىڭ بىلەن تەڭ قويۇنتازنىڭ مۇھاسىرىسىگە كىرىپ قالدىم. كىرىپ قالدۇقلا ئەمەس، دېۋىدەك سۈر – ھەيۋە بىلەن يوپۇرۇلۇپ كەلگەن قويۇنتاز بىزنى ئاللىقاچان يىقىتىپ ئۈلگۈردى. مەن قانداق قىلىپ ئۇنى چىڭ قۇچاقلاپ ئاستىمغا بېسىۋالغىنىمنى بىلمەيمەن، سىكۇنت ئارىلىق ئىچىدە قويۇنتاز ئۆتۈپ كېتىپ ئۆزۈمنى زۇھالىيەنىڭ ئۈستىدە ياتقان ھالەتتە كۆرۈپ چۆچۈگىنىمچە ئورنۇمدىن تۇرماقچى بولۇپ تۇرالمىدىم. شۇندىلا بايىقى قويۇنتازنىڭ يېنىمىزدىكىلا يايمىچىنىڭ چېدىرىنى ئۆرۈپ ئۇنىڭ بادرا ياغىچىنى ئۈستۈمگە تاشلىغىنىنى كۆردۈم. بۇ ياغاچ ئانچە يوغانمۇ ئەمەس ئىدى. ئەمما زەرب بىلەن پاقالچىكىمگە ئۇرۇلۇپ كەتكەن بولغاچقا، بەدىنىمنى مىدىرلىتىشقا ئامال قىلالمىدىم. زۇھالىيە بىلەن ئىككىمىز ياغاچنى يۆتكەپ بولغىچە تاكسىچىلار كېلىپ ياغاچنى ئېلىۋېتىپ، بىزنى يۆلەپ تۇرغۇزدى. ئوڭ پۇتۇمنىڭ پاقالچىكىدىن سىرغىپ قان ئېقىۋاتاتتى. مەن ئالدىراپ زۇھالىيەدىن سورىدىم:
ــ زۇھالىيە، ئەھۋالىڭىز قانداقراق؟ يارىلاندىڭىزمۇ؟
ــ ياق، مەن ھىچنېمە بولمىدىم، سىزنى دوختۇرخانىغا ئېلىپ بارايلى.
※※※※※※※※※※※※※※※※※※※※※※※※※※※※※
ھەي قويۇنتاز، قويۇنتاز! شۇنداقمۇ چاخچاق قىلامسەن؟ نېمىشقا ئون نەچچە يىل بۇرۇن مۇشۇنداق ئۇچرىشىشلارغا سەۋەب بولمايسەن؟ سەندىن پەخىرلەنمەيمەن، مۇشۇ ئورۇنلاشتۇرۇشۇڭ ئۈچۈن سەندىن رازى ئەمەسمەن. زۇھالىيەنى بۇ خىل سالاھىيەتتە قۇچاقلاش، باغرىمغا بېسىش گۇناھتۇر. بۇنى بىلەمسەن؟ گەرچە ئۇنى قۇتقۇزۇش ۋەجىدىن بولسىمۇ، نەرەڭدىن قورقمايمەن. دېۋىدەك سۈر – ھەيۋەڭدىن چۆچىمەيمەن. مەن بۇرۇنقى ھەرقاچان مۇھەببەتكەن يۈرەكئالدىلىق بىلەن مۇئامىلە قىلىدىغان توخۇ يۈرەك نەسىرۇللا ئەمەسمەن. نېمىنىڭ شەيتانىي مۇھەببەت، نېمىنىڭ ھەققانىي مۇھەببەت ئىكەنلىكىنى ھىس قىلغۇچىلىكىم، قايسىسىدىن ۋاز كېچىپ، قايسىسىنى قوغدىشىم كېرەكلىكىنى بىلگۈچىلىكىم بار. زۇھالىيەنى قۇچاقلىغان شۇ دەقىقىدە يۈرىكىمنىڭ تىترىگەنلىكىنى ھىس قىلدىم. بىراق بۇ تىترەش مۇھەببەت بابىدىكى تىترەش ئەمەس، بۇ بەلكىم ئون يىللار بۇرۇنقى شۇ ئوتلۇق مۇھەببەت بىلەن نىكاھ شەربىتىنى ئىچكەن يۈرەك ئوتتۇرىسىدىكى ئۆزئارا زەرەت قويۇپ بېرىشتۇر.
| 
يوللىغان ۋاقتى 2012-9-29 18:15:21
