بۇ يازمىنى ئاخىرىدا كەۋسەر تەھرىرلىگەن. ۋاقتى 2015-9-15 09:39
رۇبائىيلار
مۇھەممەتجان راشىدىن
مىنگەن ئات، كەيگەن تون بەختىڭ بۈگۈنكى،
تاڭ ئاتسا ئۆزۈڭمۇ ئۆتمۈشنىڭ مۈلكى.
بىر قولۇڭ گۈل ئالسۇن، بىر قولۇڭ قامچا،
دوستلىرىڭ بار يەردە دۈشمەن بار چۈنكى.
كۆرۈنگەن ئاپەتتىن كەتمىگىن چۆچۈپ،
تاغ كۆچسە كۆچسۈنكى، سەن يۈرمە كۆچۈپ.
ئۆمۈرلۈك گۈلخان بوپ ياشايمەن دېسەڭ،
ئۆتكۈنچى يامغۇردا قالمىغىن ئۆچۈپ.
سۆيگۈنى ساتقىلى بولغايمۇ پۇلغا؟
كۆڭۈلنى ئالغىلى بولغايمۇ پۇلغا؟
كۆڭۈلنىڭ كەينىگە كىرسە گۈللەرمۇ
تىكەنلەر ئالدىدا ئايلىنار قۇلغا.
ھەقىقەت ئالدىدا قىلما مەنمەنلىك.
ھەقىقەت ئالدىدا ھەيۋەڭ بىردەملىك.
ھەقىقەت سۈكۈتتىن تاپار سەلتەنەت،
ھەقىقەت ھەقىقەت-ئەمەس ئۆكتەملىك.
ھەقىقەت ئالەمنى كەزگۈچى سەيياھ،
ئۇ پۈتكۈل ئالەمگە غايىۋانە شاھ.
ھەقىقەت ئاقلايدۇ ئۆزىنى-ئۆزى،
ئۇ ھەرگىز سۇنمايدۇ ئېگىلسىمۇ گاھ.
بىلىمسىز ئوخشايدۇ ياغسىز چىراققا.
بارمايدۇ يورۇقى ھەرگىز يىراققا.
بىلىملىك-بىلىمسىز ئىنساننىڭ پەرقى
ئوخشاتساڭ ئوخشايدۇ ئاغىرىققا-ساققا.
زىيادە خۇشھاللىق بىردەملىك ئېقىن.
زىيادە مەيخورلۇق ئەجەلگە يېقىن.
قانائەت-ئىنسانغا ئۇيقۇ دورىسى،
ئىجاد ۋە ئەمگەكتە ئۇلغۇيار ئەقىل.
راست سۆزنىڭ ھېچ يەردە خىجالىتى يوق.
يالغان گەپ ياياقتۇر مىنەر ئېتى يوق.
يالغاننىڭ بېغىدا كۆكلىمەس دەرەخ،
يا پىشقان ئۆرۈكى، ياكى قېقى يوق.
بۇ ئەسەر « ياخشىلارغا ناخشىلار تولا » ناملىق كىتابتىن ئېلىندى.
| 
شۆھرەت
تۆھپە
تىللا
قىزغىنلىق
ۋاقتى: 2015-9-15 09:37:43