ئۇيغۇرنىڭ بىر بايلىقى كەتتى

tursun123

ئۇيغۇرنىڭ بىر بايلىقى كەتتى

مۇھەممەتجان راشىدىن

يالغان دىسەك راست بولۇپ چىقتى،
ھېسام ئاكا كۆز يۇمغىنىڭىز.
بۇ دۇنيادا تۈنۈگۈنكى تۈن،
ئەڭ ئاخىرقى بىر قونغىنىڭىز.

بۈگۈن مانا سىز يەرلەنگەن كۈن،
يىغلاپ تۇردى ئېلى ئاسمىنى.
كەلكۈن بولۇپ ئالدى ئىلكىگە،
كۆزلىرىمدىن ئىسسىق ياش مېنى.

تۈن تەڭ بولدى شۇ كېچە مانا،
تولغىنىمەن يۈرەك باغرىم قان.
جۇدالىقنىڭ بۇ ئازابىدا،
چىقمايدىكەن ھېلىمۇ بۇ جان.

سۇغاق يەرگە تەگدى باغرىمىز،
مېنىڭمۇ تەڭ بولدۇم تەگكەندەك.
بولۇپ قالدىم ئەجەل مېنىڭمۇ
شاخلىرىمنى كېلىپ ئەگكەندەك.

سىز كەتتىڭىز، سىز بىلەن بىللە
ئۇيغۇرنىڭ بىر بايلىقى كەتتى.
چېچەنلەرنىڭ جاھان تاڭ قالغان
بايراقدارى-بايرىقى كەتتى.

ئاۋات ئىدى سىز بىلەن ئىلى،
بولۇپ قالدى سىز كېتىپ چۆلدەك.
بولۇپ قالدى بىزنىڭ كۆڭۈللەر
نويابىردا سولاشقان گۈلدەك.

دەرد-ئەلەمنىڭ دورىسى ئىدى
سىز بار يەردە چاقچاقلىرىڭىز.
قەلىبلەرنى نۇرلاندۇراتتى
چاقچاقلاردىن چاقماقلىرىڭىز.

قاتارىدىن ئورۇن ئالدىڭىز،
ئىككى ئالەم ئۇنتۇلماسلارنىڭ.
دوستلىرىڭىز دەيدۇ جەننەتكە
بىرى كەپتۇ قەدىناسلارنىڭ.

ئاز كېلەركەنسىزدەكلەر،ئەمما
كېتىدىكەن ئارماندا قويۇپ.
تۇيۇلاركەن ئۆتۈپ كەتكەندەك
بۇ دۇنيادىن ئىككى كۈن قونۇپ.

ئاسان ئىشمۇ ئەلنى بىر ئۆمۈر
سۆيۈندۈرۈپ كۈلدۈرۈپ ئۆتمەك.
ياشاش دىگەن ئەسلى مۇنداق دەپ،
ھاياتلارغا بىلدۈرۈپ ئۆتمەك.

سۆزمەنلىكتە تۆھپىڭىز تولا،
نۇرغۇن شاگىرت قالدۇرۇپ كەتكەن.
رەھمەت سىزگە بىزنى شادلىققا
چاڭقىغاندا قاندۇرۇپ كەتكەن.

سىز كەتتىڭىز كەتتى كەلمەسكە
ئاۋاتلىلار سىز بار چاغدىكى.
سىزنى يوق دەپ كېتەرمۇ ئۇچۇپ
كاككۇك، بۇلبۇل يازدا باغدىكى.

تاغقا چىقسام ھېسام قېنى دەپ،
تاغلار بىزدىن سوراپ قالارمۇ.
ئەجەپلەنسە دەريا، ئورمانلار،
قۇشلار بىزنى ئوراپ قالارمۇ.

ئايرىلىشقا قەلبى قىيالماي
يىغلاپ قالدى سىز ئۆسكەن شەھەر.
قالدى قاخشاپ قۇرداشلىرىڭىز،
كەتتىغۇ دەپ بىزدىن بىر گۆھەر.

ھېسام روھى ئىلى روھى دەپ
ئېيتىلمىغان ئەسلى بىكارغا.
سىزدىن جۇدا يىغلىغان شەھەر
قالدى ۋارىس ئاشۇ شۇئارغا.

سىزگە ئۇستاز ، قانمىدى جاھان،
كۆرمىگەنلەر قالدى ئارماندا.
شۇنداق ئىكەن ئەجەل تەڭرىدىن
ئەزرائىلغا چۈشكەن پەرماندا.

مەرسىيەدە قەلىمىم ئۇستاز،
يازماقتىمەن چىلاپ يېشىمغا.
بىر ياخشىنىڭ ئارمانلىرى بۇ،
جۇدالىق ھەم كەلگەن بېشىمغا.

مەنبە: شىنجاڭ گېزىتى

بەختىيار(بايقاش

زامانىمىزنىڭ ھايات نەسىردىن ئەپەندىسى،ئاتاقلىق خەلق قىزىقچسى،چاقچاقچى ھېسام قۇربان پەقەت غۇلجا خەلقىنىڭ ئەمەس،بەلكى پۈتۈن شىنجاڭ دىياردىكى خەلقىلەرنىڭ يۈرىكىنى لەغتە قىلىپ،بىز بىلەن مەڭگۈلۈك ۋىدالاشتى،مەرھۇمنىڭ ياتقان يېرى جەننەتتە بولغاي!
مۇھەممەتچان راشىدىن ئاكنىڭ بۇ مەرسىيەسىنى ئوقۇپ،مەرھۇم ھېسام ئاكىنى چوڭقۇر ئەسلىدىم...
رەھمەت سىزگە!

دىلكەش

بۇ شىئىرنى بەك ياخشى يېزىپتۇ .

tursun123

ساڭا رەھمەت ئۇكام بەختىيار،بەك ياخشى تەھرىرلەپسەن.

دولانلىق

ئاتاقلىق چاقچاقچى ھېسام قۇربان پەقەت غۇلجا خەلقىنىڭ ئەمەس،بەلكى پۈتۈن شىنجاڭدىكى خەلىقىلەرنىڭ يۈرىكىنى لەغتە قىلىپ،بىز بىلەن مەڭگۈلۈك ۋىدالاشتى،مەرھۇمنىڭ ياتقان يېرى جەننەتتە بولغاي!