شىنخۇا تورى تېھران 29 – ئاپرېل تېلېگراممىسى : ئىران زۇڭتۇڭ نامزاتى ، ئىراننىڭ سابىق زۇڭلىسى مۇسابى 29 – ئاپرېل ئۆتكۈزۈلگەن بىر قېتىملىق سايلام  رىقابىتى يىغىلىشىدا سۆز قىلىپ مۇنداق دېگەن : ئىران پۇقرالىرى ئەركىن ، ئادىل سايلاش ھوقۇقىغا ئىگە .

        مۇسابى ئۆزىنىڭ قوللىغۇچىلىرىغا مۇنداق دېگەن : مەن سايلام رىقابىتىنىڭ ئادىل بولۇشىنى ، كۆز بويامچىلىق ھەرىكەتلىرىنىڭ بولماسلىقىنى ئۈمىد قىلىمەن . ئىتتىپاقلىق بىردىنبىر پۇرسەت ، ئىتتىپاقلىقنى دۆلەتنىڭ ھەر قايسى جايلىرىغىچە كېڭەيتىش كېرەك . 

       ئۇ يەنە مۇنداق دېگەن : ھازىرقى ھۆكۈمەتنىڭ خاتا سىياسىتى ھەر خىل ئىجتىمائىي مەسىلىلەرنى يەنى ئولتۇراق ئۆي قىس بولۇش ، ئىشسىزلىق نىسبىتى ئېشىپ كېتىش قاتارلىق مەسىلىلەرنى كەلتۈرۈپ چىقاردى . مەن ھەر بىر ئادەمنىڭ سايلام پائالىيىتىنىڭ ئۇچۇرىنى تارقاتقۇچى بولۇشىنى ، تېخىمۇ كۆپلىگەن كىشىلەرنىڭ سايلام پائالىيىتىگە قاتنىشىشىنى ئۈمىد قىلىمەن .

       ئىراننىڭ سابىق زۇڭتۇڭى ھاتەمى شۇ كۈنى ئۆتكۈزۈلگەن سايلام رىقابىتى يىغىلىشىغا قاتناشقان ھەمدە تېخىمۇ كۆپلىگەن ئاممىنى بېلەت تاشلاشقا دەۋەت قىلغان .

      مۇسابى بۇ يىل 67 ياش ، 1980 – يىلىدىن 1988 – يىلغىچە ئىراننىڭ زۇڭلىلىق ۋەزىپىسىنى ئۆتىگەن . سابىق زۇڭتۇڭى ھاتەمى ئالدىنقى ئايدا سايلام رىقابىتىدىن چېكىنىپ چىقىدىغانلىقىنى ئېلان قىلغان ھەمدە پۈتۈن كۈچى بىلەن مۇسابىنى قوللايدىغانلىقىنى بىلدۈرگەن . 

    ئىگىلىنىشچە ، 12– ئىيۇن ئىراندا زۇڭتۇڭ سايلىمى ئۆتكۈزۈلىدىكەن . نۆۋەتتە ، سابىق پارلامېنت باشلىقى كارۇبىمۇ سايلام رىقابىتىگە قاتنىشىدىغانلىقىنى رەسىمىي ئېلان قىلغان ، ھازىرقى زۇڭتۇڭ ئەخمىدى نىجاد ھازىرغا قەدەر سايلام رىقابىتىگە قاتنىشىدىغانلىقىنى ئېلان قىلمىغان . لېكىن ، ئۇنىڭ مەسلىھەتچىسى ئاخبارات ۋاستىلىرىغا ، ئەخمىدى نىجادمۇ سايلام رىقابىتىگە قاتنىشىدۇ ، دېگەن .