ئاياللار دۇنياسى يانبىلوگى

ئىگىز پاشىنلىق ئاياغ ئۆزىڭىزگە دۈشمەن

ئايال كىشىلەرنىڭ كۆپىنچىسى ئىگىز پاشىنلىق ئاياغ كىيىشنى ياختۇرىدۇ. چۈنكى، ئىگىز پاشىنلىق ئاياغنى كىيگەندە، ئادەم تولىمۇ لاتاپەتلىك كۆرۈنىدۇ. ئەمما، سىز ئىگىز پاشىنلىق ئاياقنىڭ ئادەم بەدىنىگە قانچىلىك زىيانلىق ئىكەنلىكىنى بىلەمسىز. تۆۋەندە بۇ ھەقتىكى بىر قانچە نۇقتىلارغا دېققەت قىلىڭ:

پۇتقا بولغان زىيىنى. ئىگىز پاشىنلىق ئاياغنى كىيىپ ماڭغاندا، ئادەم بەدىنىنىڭ ئېغىرلىق مەركىزى پۇتنىڭ بىرىنچى ۋە ئۈچىنچى بارمىقىغا چۈشىدۇ. بۇ بارماقلار يەنە تېخى ئاياقنىڭ قىستىشى بىلەن قاداقلىشىدۇ. بەزىلەرنىڭ ھەتتا پۇت شەكلى ئۆزگىرىپ، سۆڭەكلەر ئارىسىغا نېرىپ ئۆسمىلىرى پەيدا بولۇپ قالىدۇ- دە، پۇت قاتتىق ئاغرىپ ئادەمنى بىئارام قىلىدۇ.

ئوشۇق ۋە تىزغا بولغان زىيىنى. ئىگىز پاشىنلىق ئاياقنى كىيىپ ماڭغاندا، تىز بىلەن ئوشۇقنىڭ ھەرىكەت دەرىجىسى تەسىرگە ئۇچرىغاچقا ھەم ئۇلارغا چۈشكەن كۈچ تەكشى بولمىغاچقا، پۇت ئاسانلا قايرىلىپ كېتىدۇ. تىزنىڭ بېسىمى ئېشىپ كېتىپ، بۇنىڭ بىلەن بوغۇم كېسەللىكلىرىنى كەلتۈرۈپ چىقىرىدۇ.

بەل ئۇمۇرتقىسىغا بولغان زىيىنى. ئىگىز پاشىنلىق ئاياغنىڭ بەلگە بولغان زىيىنى ئەڭ كۆپ. بۇنداق زىيان ئاستا خارەكتېرلىك بولغاچقا بۇنى سەزمەك تەس. ئىگىز پاشىنلىق ئاياقنى كىيگەندە داس سۆڭەك ئالدى تەرەپكە سىڭايان بولۇپ، ئېغىرلىق مەركىزىمۇ ئالدىغا چۈشىدۇ. ئادەم تەڭپۇڭلىقىنى ساقلاش ئۈچۈن ساغرىسىنى كۆتۈرۈپ، بېلىنى كەينىگە تارتىدۇ. گەرچە ئاياللار بۇنداق قىلسا، تېخىمۇ جەزبىدارلىشىپ كەتسىمۇ ئەمما شۇ جەزبىدارلىقنىڭ كەينىدىكى خېيىم- خەتەرنى ئويلاپ قويۇش كېرەك. چۈنكى، بۇنداق ھالەت ئۇزاق مۇددەت داۋاملاشقاندا، بەل زىيادە چارچايدۇ. بەل ئۇمۇرتقىسىنىڭ شەكلى ئۆزگىرىپ، بەل ئومۇرتقا تەخسىسى ئۆسۈش كېلىپ چىقىدۇ. داس سۆڭەكنىڭ سىڭايان بولۇشى يەنە نۇرغۇن سۆڭەك كېسەللىكىنىڭ كېلىپ چىقىشىغا سەۋەپچى بولىدۇ. ئاقىۋەتتە، جىددىي ۋە ئاستا خارەكتېرلىك بەل ئومۇرتقا ۋە ئومۇرتقا كېسىلىگە گىرىپتار بولىدۇ.
مەنبە: ئاي خىنىم سالونى