2013- يىلى 10- ئاينىڭ 10- كۈنى يەكەن ناھىيەلىك مەدەنىيەت يۇرتىدا، يەكەن ناھىيەلىك ئەدەبىيات- سەنئەتچىلەر بىرلەشمىسى، يەكەن ناھىيەلىك مەدەنىيەت- تەنتەربىيە، رادىئو- تېلېۋىزىيە ئىدارىسى، يەكەن ناھىيەلىك مەدەنىيەت يۇرتى، يەكەن ناھىيەلىك كۇتۇبخانا، «يەكەن ئەدەبىياتى» تەھرىراتى، يەكەن ناھىيەلىك 1- باشلانغۇچ مەكتەپ قاتارلىق ئورۇنلارنىڭ تەشكىللىشى بىلەن ئىستىداتلىق ياش خەتتاتلاردىن ئەرشىدىن رېشىد راشىد ۋە راخمانجان توختىلارنىڭ «ئۇيغۇر ئون ئىككى مۇقام» تېكىستلىرى خەتتاتلىق كۆرگەزمىسى ئۆتكۈزۈلدى.
كۆرگەزمىگە ياش خەتتات ئەرشىدىن رېشىد راشىد ۋە راخمانجان توختىلارنىڭ بىر يىلدىن ئارتۇق جاپالىق ئەجرى بىلەن تەئىلىق خەت نۇسخىسىدا ئۇيغۇر ئون ئىككى مۇقام تېكىستلىرىنى ئاساس قىلىپ تەييارلانغان 70 پارچىدىن ئارتۇق خەتتاتلىق ئەسىرى قاتناشتۇرۇلغان بولۇپ، كۆرگەزمىنىڭ ئېچىلىش مۇراسىمىغا، ئاتاقلىق رەسسام، ئۇستاز غازى ئەھمەد ئەپەندى، ۋىلايەت ۋە ناھىيەنىڭ مۇناسىۋەتلىك رەھبەرلىرى، ناھىيە ئىچى ۋە سىرتىدىن كەلگەن خەتتاتلار، رەسساملار، گۈزەل سەنئەت ئوقۇتقۇچىلىرى، ئاپتورلارنىڭ دوست- بۇرادەرلىرى ۋە ھەر ساھە ئامما بولۇپ، 300 دىن ئارتۇق ئادەم قاتناشتى.
ئاتاقلىق رەسسام، ئۇستاز غازى ئەھمەد ئەپەندى كۆرگەزمىنىڭ ئېچىلىش مۇراسىمىدا ئۇيغۇر ئون ئىككى مۇقام تېكىستلىرىنى ھۆسنىخەتچىلاپ يېزىش ۋە بۇ قېتىمقى كۆرگەزمىنى يەكەندە ئۆتكۈزۈشنىڭ ئەھمىيىتى توغرىسىدا چۈشەنچە بەردى ۋە كۆرگەزمىگە بېغىشلىما يېزىپ بەردى.
كۆرگەزمە ئاخىرىدا ھەر قايسى شەھەر، ۋىلايەتتىن كەلگەن كەسىپداشلار ئۆز ئارا خاتىرە سۈرەتكە چۈشتى، خەتتاتلار نەقمەيداندا ماھارەت كۆرسەتتى.
2013-10-13 05:45:42 گىلەم
ھەي،ئاڭلىماي قاپتىمەن ئەمەسمۇ؟ھازىر ئاخىرلىشىپ بولدىمۇياكى ئاخىرلاشمىدىمۇ؟ مىنىڭ بىر كۇرۇپ باققىم بار ئىدى.
2013-10-14 07:20:52
شۇنداق، ئاخىرلىشىپ بولدى.