سىنا تەنتەربىيە خەۋىرى: خان جەمەتى مادرىد كوماندىسى ۋاللېكانو كوماندىسى بىلەن ئوينىغان مۇسابىقىدە ۋاللېكانو كوماندىسى ئەزاسى چەكلەنگەن رايۇن ئىچىدە توپنى قولى بىلەن ئۇرىۋەتكەچكە خان جەمەتى مادرىد كوماندىسى بىر قېتىملىق نوقتا توپ تېپىش پۇرسىتىگە ئېرىشتى. بۇ نوقتا توپنى خان مادرىد كوماندىسىدىكى داڭلىق چولپان كىرىستىيانو رونالدو ناھايىتى ئەپچىللىك بىلەن تېپىپ كىرگۈزىۋەتكەن، شۇ ۋاقىتتا خان جەمەتى مادرىد كوماندىىسى توپچىلىرى ناھايىتى ھاياجانلانغان ھالدا يۈگرەپ كېلىپ رونالدونى قۇچاقلاپ بۇ توپنى تەبرىكلىگەن، ئەمما خان مادرىد كوماندىسى ۋارىتاچىسى كاسىللاس بۇنىڭغا يەنىلا ھېچقانداق ئىپادە بىلدۈرمىگەن.

شۇ ۋاقىتتا كاسىللاس كىرىستىيانو رونالدونىڭ نوقتا توپ تەپكىنىگە قاراپ تۇرغان، نوقتا توپ كىرگەندىن كېيىن ئۇ ناھايىتى ئاددىيلا قىلىپ بېشىنى لىڭشىتىپ قويغان ھەمدە ئارقىسىغا ئۆرۈلۈپ ئۆز ۋارىتاسى تەرەپكە قايتقان ۋە ۋارىتا تۈۋرۈكىنى يىنىك بىر ئىككىنى ئۇرۇپ قويغان. بۇ خىل ئەھۋال ئالدىنقى مەيداندا مانچېستېر شەھىرى كوماندىسى بىلەن ئوينىغان مۇسابىقىدە كۆرۈلگەن بولۇپ، ئوخشاشلا كىرىستىيانو رونالدو ھەل قىلغۇچ توپنى ئۇرغاندىن كېيىن خان مادرىد كوماندىسى توپچىلىرى ۋە 80 مىڭدىن ئارتۇق توپ مەستانىسى ناھايىتى سادلىققا چۆمگەن، پەقەت كاسىللاسلا ئۆزىنىڭ ۋارىتاسى ئالدىدا تۇرۇپ بۇنىڭغا ھېچقانداق ئىپادە بىلدۈرمىگەن. ئۇنداقتا كاسىللاس زادى نېمە بولدى؟
«ماكا گېزىتى»نىڭ خەۋىرىگە قارىغاندا كاسىللاس ئەسلىدە ئەمدىلا ھاياتىنى ئاخىرلاشتۇرغان بىر پولشالىق توپ مەستانىسى ئۈچۈن تەبرىكلەش ھەركىتى قىلمىغان ئىكەن. خان مادرىد كوماندىسى باشلىقى كاسىللاس ھازىرغىچە بۇ ئىش توغرىسىدا ئاممىۋى سورۇنلاردىمۇ، ئۆزىنىڭ مىكرو بىلوگىدىمۇ ھېچقانداق چۈشەنچە بەمىگەن. كېيىن كىرىستىيانو رونالدو توپ كىرگۈزسە كاسىللاسنىڭ تەبرىكلىمەسلىكى، بۇ ئىككىسىنىڭ ئوتتۇرىسىدا زىدىيەت بارلىقى توغرىسىدىكى خەۋەرلەر ئۆزۈلمەستىن ئاخبارات ۋاستىلىرىنىڭ قىزىق نوقتا خەۋىرىگە ئايلانغان. تېخى ئالدىنقى ھەپتىدە ئىسپانىيە «مەخپىيەتلىك گېزىتى» كاسىللاس بىلەن رونالدونىڭ ئوتتۇرىسىدا بۇرۇندىنلا زىدىيەت بارلىقى توغرىسىدا خەۋەر تارقاتقان. بىراق بۈگۈن ۋاللېكانو كوماندىسى بىلەن بولغان مۇسابىقە ئاخىرلاشقاندىن كېيىن كاسىللاس بۇ خەۋەرلەرگە رەدىيە بەرگەن. يەنى مۇسابىقىدىن كېيىن ئۇ كىرىستىيانو رونالدو بىلەن بىر پارچە سۆرەتكە چۈشۈپ ئۇنى ئۆزىنىڭ مىكرو بىلوگىغا چىقارغان ۋە ئۇنىڭغا قوشۇمچە قىلىپ «مەخپىيەتلىك گېزىتى» چىقارغان خەۋەرنى ئۇلىنىش قىلىپ قويغان، ھەمدە ئۇنىڭغا قوشۇپ :«كۆپچىلىك بۇ خەۋەرنى بىر چاقچاق دەپ چۈشەنسە بولىدۇ» دەپ يېزىپ قويغان. بۇ ئارقىلىق كاسىللاس پەقەت ئۆزى بىلەن كىرىستىيانو رونالدونىڭ مۇناسىۋىتىنىڭ ياخشى ئىكەنلىكىنى، خەۋەرلەرنىڭ ھەممىسى يالغان ئىكەنلىكىنى ئىسپاتلاپ بەرگەن، ئەمما ھازىرغا قەدەر نېمىشقا كىرىستىيانو رونالدو توپ كىرگۈزگەندە تەبرىكلىمەيدىغانلىقى توغرىسىدا ھېچقانداق گەپ قىلمىغان.