يۈنيەن خەۋىرى : ئۈرۈمچى شەھەرلىك ج خ ئىدارىسى قاتناش تارماق ئەترىتى 16 – سېنتەبىردىن باشلاپ ‹‹1 – ئۆكتەبىر›› ئالتۇن ھەپتىلىكى، شۇنداقلا قىش پەسىللىك قاتناش تەرتىپىنى مەخسۇس تۈزەش خىزمىتىنى باشلىۋەتتى.

    مەخسۇس تۈزەشتە ئاپتوموبىللارغا نورمىدىن ئارتۇق ئادەم سالغان، ئاپتوموبىلنى بەلگىلەنگەن سۈرئەتتىن ئاشۇرۇپ ھەيدىگەن، چارچىغاندا ئاپتوموبىل ھەيدىگەن، دۆلەت (ئۆلكە) يولىدا كېچىدە قانۇنغا خىلاپ ئاپتوموبىل توختاتقان، شۇنداقلا ئاگاھلاندۇرۇش بەلگە تاختىسى قويمىغان، شەھەر رايونىدىكى يوللاردا تەتۈر ماڭغان موتورلۇق قاتناش ۋاسىتىلىرى، ئاپتوموبىلنى قائىدىگە خىلاپ توختاتقان، قىزىل چىراغنى بۆسۈپ ئۆتكەن، بەلگىلەنگەن ئاپتوموبىل يولىدا ماڭمىغان، قاتناش بەلگىسى ۋە قاتناش بەلگە سىزىقىغا خىلاپلىق قىلغان، ھاراق ئىچىپ ئاپتوموبىل ھەيدىگەن، موتورلۇق قاتناش ۋاسىتىلىرىنىڭ يول يۈرۈش كىنىشكىسىگە چېتىشلىق قانۇنغا خىلاپ قىلمىشلار، شۇنداقلا ئاممىۋى ئاپتوبۇسلار بېكەتكە كىرمەسلىك، تاكسىنى قالايمىقان توختىتىش، ئاپتوموبىلنى بەلگىلىمىگە خىلاپ ھالدا ئايلاندۇرۇش ۋە نومۇر تاختىسى، پىراۋىسى بولمىغان موتوسىكلىتلارنىڭ يول يۈرۈشى قاتارلىق قاتناش قائىدىسىگە خىلاپ قىلمىشلار قاتتىق باشقۇرۇلىدۇ ۋە خىلاپلىق قىلغانلار ئېغىر جازالىنىدۇ.

    بۇ قېتىمقى مەخسۇس تۈزەش خىزمىتىدە ‹‹يول قاتناش بىخەتەرلىك قانۇنى››دىكى بەلگىلىمىگە ئاساسەن، قائىدىگە خىلاپلىق قىلىپ تارتىلغان نومۇرى 12 گە يەتكەن شوپۇرلارنىڭ موتورلۇق قاتناش ۋاسىتىلىرىنى ھەيدەش كىنىشكىسى تۇتۇپ قېلىنىدۇ ھەم شۇ شوپۇرغا ئۈرۈمچى شەھەرلىك موتورلۇق قاتناش ۋاسىتىلىرى شوپۇرلىرىنى تەربىيەلەش مەركىزى(ئۇلانباي)گە بېرىپ، قاتناش بىخەتەرلىكىگە دائىر قانۇن – نىزاملارنى ئۆگىنىش بويىچە يەتتە كۈن كۇرسقا قاتنىشىدىغانلىقى ئۇقتۇرۇلىدۇ. ئىمتىھان نەتىجىسى لاياقەتلىك بولغانلارنىڭ جازالانغان نومۇرى ئۆچۈرۈۋېتىلىدۇ ھەم موتورلۇق قاتناش ۋاسىتىلىرىنى ھەيدەش كىنىشكىسى قايتۇرۇپ بېرىلىدۇ، ئىمتىھان نەتىجىسى لاياقەتسىز بولغانلار كۇرسقا داۋاملىق قاتنىشىدۇ ۋە قايتا ئىمتىھان بېرىدۇ.