رەسىمدە : ياردارلارنى قۇتۇلدۇرغان 4 شىنجاڭلىق يىگىتلەر ۋە مىسرانىم تورىنىڭ قۇرغۇچىسى ئابابەكىرى مۇختەر مىسرانىم
مۇشۇ خەۋەرگە مۇناسىۋەتلىك فىلىم
تەڭرىتاغ تورى خەۋىرى: 23-فېۋرال، شىنلاڭ مىكروبىلوگىدا شىنجاڭلىق تۆت نەپەر ئۇيغۇر يىگىتنىڭ خېنەن ئۆلكىسى شىنياڭ شەھىرى لوشەن ناھىيەسىدە قاتناش ۋەقەسىدە يارىلانغان يارىدارنى جىددىي قۇتقۇزۇۋاتقان بىر بۆلەك سىن كۆرۈنۈش ئېلان قىلىنغان بولۇپ، نۇرغۇن قېتىملاپ تارقىتىلىپ، پۈتۈن مەملىكەتتىكى تورداشلار ئۇلارغا ‹‹يۈرەك›› بەرگەن.
بۇ بىر مىنۇتقىمۇ يەتمىگەن قىسقا سىن كۆرۈنۈشىدە، بىر قارا رەڭلىك جىپ ماشىنا يۇقىرى سۈرئەتلىك تاشيولنىڭ يېرىم دائىرىلىك ماشىنا يولىدا توغرىسىغا توختاپ قالغان بولۇپ، ماشىنىنىڭ ئوڭ ئىشىكى ئېغىر دەرىجىدە ۋەيران بولغان، تۆت نەپەر ئۇيغۇر يىگىت تەشەببۇسكارلىق بىلەن يېتىپ كېلىپ يارىدارنى قۇتقۇزۇپ، ئۇنىڭ ئائىلىسىدىكلەرگە ياردەملىشىپ ساقچىغا مەلۇم قىلىپ، قۇتقۇزۇش ماشىنىسى تەلەپ قىلىۋاتاتتى، يەنە توختىماي يارىدارنىڭ ھالىدىن خەۋەر ئېلىۋاتاتتى.
بۇ سىن كۆرۈنۈشى ئاشكارىلىنىشى بىلەن، پۈتۈن مەملىكەتتىك بارلىق تورداشلارنىڭ دىققىتىنى قوزغىغان ھەمدە بەس-بەستە تارقاتقان، تورداشلار بەس-بەستە باش بارمىقىنى چىقىرىپ: ‹‹شىنجاڭلىق يىگىتلەر قالتىسكەنسىلەر، بىر نەچچە ئۇيغۇر يىگىتى قالتىسكەن، ياخشى، باشقىلارغا ياردەم بېرىشنى خۇشاللىق دەپ بىلىدىغان شىنجاڭلىقلارنى ئالقىشلايمىز›› دېگەندەك مەدھىيە سۆزلىرىنى ياغدۇرۇۋەتكەنىدى.
25-فېۋرال، مۇخبىر قاتناش ۋەقەسىدە نەق مەيداندا بولغۇچى، يارىدارنىڭ ئۆيىدىكىلىرىدىن ۋاڭ ئەپەندى بىلەن ئالاقىلاشتى. ئۇنىڭ مۇخبىرغا دېيىشىچە، شۇ كۈنى ئۇلار بىر ئائىلە كىشىلىرى خېنەندىن ئىچكى موڭغۇلدىكى ئۆيىگە قايتقان، ماشىنىنى ئايالى ھەيدىگەن بولۇپ، يېرىم يولدا لوشەن ناھىيەسىدىكى جۇگەن دەرياسى كۆۋرۈكىگە كەلگەندە، ماشىنا تۇيۇقسىز يۇقىرى سۈرئەتلىك يولنىڭ رېشاتكىسىغا سوقۇلۇپ كېتىپ، ماشىنا يانچە بولۇپ قالغان. ماشىنا ھەيدىگە ئايال نەق مەيداندا ھوشىدىن كەتكەن، 10 ياشلىق ئوغلىمۇ يارىلانغىنىدىن توختىماي يىغلىغان.
ۋاڭ ئەپەندى مۇنداق دېدى: شۇ چاغدىكى ئەھۋال بەك جىددىي بولۇپ، بالا يولنىڭ ياقىسىغا چىقىپ قالغانىدى، مەن ماشىنىدىكى ھوشسىز ياتقان ئايالىمنى تارتىپ چىقاردىم، كاللام قۇپقۇرۇق، نېمە قىلارىمنى بىلمەيلا قالغانىدىم. ئاشۇ بىر نەچچە ئۇيغۇر يىگىتى توختاپ ماشىنىدىن چۈشۈپ، تەشەببۇسكارلىق بىلەن يېتىپ كېلىپ ياردەم كېرەك-كېرەك ئەمەسلىكىنى سورىدى ھەمدە شۇ ھامان 120 جىددىي قۇتقۇزۇشقا تېلېفون قىلدى. ھازىر ئويلىسام، ھېلىمۇ ياخشى ئۇلار بار ئىكەن، بولمىسا ئايالىم بىلەن بالامنى بۇنچىۋالا تېز دوختۇرخانىغا ئېلىپ بارالمىغان بولاتتۇق.
ئىگىلىنىشىچە، ۋاڭ ئەپەندىمنىڭ ئايالى ۋە بالىسى لوشەن ناھىيەلىك خەلق دوختۇرخانىسى داۋالىنىۋاتقان بولۇپ، نۆۋەتتە كېسەللىك ئەھۋالى مۇقىملاشقان، دوختۇرخانىدا يەنە بىر نەچچە كۈن كۆزىتىلگەندىن كېيىن ئۆيىگە قايتىپ كۈتۈنسە بولىدىكەن. ۋاڭ ئەپەندى مۇنداق دېدى: ‹‹ئايالىم بىلەن بالامنىڭ ئەھۋالى مۇقىملاشقاندىلا، ئاندىن ئۇلارنى ئېسىمگە ئاپتىمەن، ئۇلارغا رەھمەت ئېيتاي دېسەممۇ تېلېفون نومۇرىنىمۇ قالدۇرماپتۇ، ھازىر ئاشۇ بىر نەچچە ياخشى نىيەتلىك شىنجاڭلىق يىگىتكە رەھمەت ئېيتىۋالسام دەيمەن.››
ئارقىدىن، مۇخبىر خېنەن ئۆلكىسى شىنياڭ شەھەرلىك يۇقىرى سۈرئەتلىك تاشيول قاتناش ساقچى تارماق ئەترىتى خەلق ساقچىلىرىدىن ئىگىلىشىچە، يۇقىرى سۈرئەتلىك تاشيول قاتناش ساقچىلىرىنىڭ دەلىللىشى ئارقىلىق،، شۇ چاغدا ئۇلار نەق مەيدانغا يېتىپ بارغاندىن كېيىن، يېرىم يولدا ئۈچ نەپەر شىنجاڭلىق يىگىتنىڭ تەشەببۇسكارلىق بىلەن تەرتىپنى ساقلاپ ھەمدە يارىدارنىڭ ھالىدىن خەۋەر ئېلىپ، قاتناش ساقچىلىرى ۋە دوختۇرلارنىڭ يېتىپ كېلىشىنى ساقلاۋاتقانلىقىنى كۆرگەن، ئۇلار نەق مەيداندىكى كىشىلەرنىڭ بىخەتەرلىكىگە كاپالەتلىك قىلغاندىن كېيىن. نەق مەيداندىن ئۈن-تىنسىزلا كېتىپ قالغان. بۇ ئۈچەيلەننىڭ ھەيدىۋالغىنى نومۇر تاختىسى ئاسمىغان يېڭى ماشىنا بولغاچقا، ئۇلارغا مۇناسىۋەتلىك ھېچقانداق ئۇچۇر قالمىغان. شىنياڭ شەھەرلىك يۇقىرى سۈرئەتلىك قاتناش ساقچى تارماق ئەترىتى خەلق ساقچىسىنىڭ ئېيتىشىچە، ئۇلارنىڭ قىزغىنلىق بىلەن ياخشى ئىش قىلسىمۇ، نامىنى قالدۇرماسلىقتىن ئىبارەت پەزىلىتى ئادەمنىڭ قايىللىقىنى قوزغايدۇ، ئادەمنى تەسىرلەندۈرىدۇ. بۇ ساقچى مۇنداق دېدى: سىلەرنىڭ خەۋىرىڭلار ئارقىلىق، بۇ ئۇيغۇر يىگىتلىرىنى تاپالىساق، ئۇلارنىڭ بۇ ئىشىنى تېخىمۇ كۆپ تەشۋىق قىلىمىز.
