Salam URUMQI :: سالام ئۈرۈمچى :: 乌鲁木齐综合娱乐网 :: 维吾尔综合门户网:: 新疆维吾尔文化::

رەنجىگەن ۋاقتىمىزدا باشقىلارنى ئەپۇ قىلىش گۈزەل ئەخلاق ھېساپلىنىدۇ . ئەمما ئەپۇ قىلىش ئاسان ئەمەس . سىز باشقىلار تەرىپىدىن ئېغىر زەربىگە ئۇچرىغاندا ، سىز ئۇنى مەڭگۈ كەچۈرمەيدىغانلىغىڭىزنى ھىس قىلىسىز . ئەگەر سىز ئېرىڭىز بىلەن تاكاللىشىپ قالغاندا ، ھامان ئېرىڭىزنىڭ ئەپۇ سورىشىنى كۈتىسىز . سىزنى رەنجىتكەن بىر خىزمەتچىدىن ئۆچ ئېلىشنى ئويلايسىز . ئەمما ئۆزىڭىزنىڭ سالامەتلىكىنى كۆزدە تۇتۇپ ، باشقىلارنى ئەپۇ قىلغىدەك ئىش بولسا ئەپۇ قىلىڭ . ئەمما سىزنى رەنجىتكەن بىرىنى كەچۈرىۋېتىشنى ئويلىغىنىڭىزدا بۇ ئىشنى دىمەككە ئاسان بولغىنى بىلەن ، ئەمەلىيەتتە ئانچە ئاسان ئەمەسلىكىنى ھېس قىلىسىز . ئىلگىرىكى ئاغرىنىشلارنى كۆڭۈلدىن چىقىرىۋېتىش ھەقىقەتەنمۇ قىيىن . بۇلۇپمۇ بىگۇناھ تۇرۇپ ئەيىپلەشكە ئۇچرىغانلىغىمىزنى ھىس قىلغاندا تېخىمۇ شۇنداق .
ئەپۇ قىلىشنىڭ باشقىلار بىلەن ئالاقىسى يوق . نېرۋا پىسخولوگىيە دوختۇرى مۇنداق دىگەن . ‹‹ ئەپۇ قىلىش ئىككى ئادەم ئوتتۇرىسىدىكى ئىش ، بۇنىڭ باشقا ئادەم بىلەن ئالاقىسى يوق ، ئەپۇ قىلىش سىز قوللانغان مەلۇم بىر خىل ھەركەت بولماستىن ، بەلكى بىر خىل پوزىتسىيە ، شۇنداقلا بىر خىل تۇرمۇش ھالىتى . ئەپۇ قىلىش « بۇنىڭ توغرا ، ئۇنىڭ خاتا » دەپ باشقىلارغا باھا بېرىش ئەمەس ، « پالانى ئادەم سەۋەنلىك ئۆتكۈزگەن ، چوقۇم جازالىنىشى كېرەك » دەپ باشقىلار بىلەن تالىشىپ ئولتۇرۇشنىڭمۇ ھاجىتى يوق . ئەپۇ قىلىش بىر خىل ئىچكى مايىللىق ، شۇڭا بەزىدە يۈزەكى ھادىسىلەردىن ھالقىپ ، سىز « ھەقىقەت » دەپ چۈشەنگەن ئىشنىمۇ يېڭىشىڭىزگە توغرا كېلىدۇ ›› .
ئەمەلىي ئەھۋال شۇنداقكى ، بىز مەلۇم بىر رېئال ئەمەلىيەتكە دۇچ كېلىپ ئۆز ھېسسىياتىمىزنى ئېتىراپ قىلغاندىن كېيىن ، ئاندىن ناھايىتى ئەگرى - توقاي يوللارنى بېسىپ ، ئەپۇ قىلىش مەنزىلىگە يېتىمىز . بەختنىڭ مەنزىلىگىمۇ شۇنداق يېتىپ بارىمىز .
بەزىلەر « ئاچچىقىنى چېقىرىۋېلىشنى ئەپۇ قىلىشنىڭ ئورنىغا دەسسىتىشكە بولىدۇ ، بولۇپمۇ سىز باشقىلار تەرىپىدىن بوزەك قىلىنغاندا تېخىمۇ شۇنداق بولىدۇ » دەپ قارايدۇ . ھەتتا بەزى كىشىلەر « ئاچچىقىنى چىقىرىۋالغاندىن كېيىن كۆڭلى قايتىدىن ئارام تاپىدۇ » دەپ ھىساپلايدۇ . ئەمەلىيەتتە ھەرگىز ئۇنداق بولمايدۇ . چۇنكى ئاچچىقنى چىقىرىۋېلىش بىلەن مەنىۋىي ھاياتىمىزدىكى بوشلۇقنى ھەرگىز تولدۇرىۋالغىلى بولمايدۇ .
باشقىلارنى ئەپۇ قىلىش ھەقىقەتەنمۇ كىشىنى ھاياجانغا سالىدىغان ئىش . باشقىلارنى ئەپۇ قىلمايدىغان كىشلەر ھېسسىياتى ئاجىز ، مىجەزى قوپال ، ئىنتايىن شەخسىيەتچى كىشىلەردۇر .

مەنبە :  كروران تورى  http://www.kroran.net/ud/thread-4246-1-1.html