شىنخۇا تورى، ۋاشىنگىتون، 30-مارت تېلېگراممىسى: ئامېرىكا دۆلەت بىخەتەرلىك ئىدارىسى باش ئىشتابىنىڭ دەرۋازىسى ئالدىدا 30-مارت ئېتىشىش ۋەقەسى يۈز بېرىپ، بىر ئادەم قازا قىلغان، ئىككى ئادەم يارىلانغان.
ئامېرىكا دۆلەت بىخەتەرلىك ئىدارىسى بايانات ئېلان قىلىپ مۇنداق دېگەن: شۇ كۈنى چۈشتىن بۇرۇن سائەت 9:00 ئەتراپىدا، ئايالچە ياسىنىۋالغان ئىككى ئەر مارىلاند ئىشتاتىدىكى دۆلەت بىخەتەرلىك ئىدارىسىنىڭ باش ئىشتابى دەرۋازىسىغا ئاپتوموبىل بىلەن ھۇجۇم قىلغان، دۆلەت بىخەتەرلىك ئىدارىسىنىڭ قوغداش خادىملىرى ئوق چىقىرىپ توسقان، ئاپتوموبىلدىكى بىر ئەر نەق مەيداندا قازا قىلغان، يەنە بىرى يارىلانغان. دۆلەت بىخەتەرلىك ئىدارىسىنىڭ بىر ساقچىسى يارىلانغان.
ئامېرىكا تاراتقۇلىرىنىڭ خەۋەر قىلىشىچە، ساقچى تەرەپ كېيىن ئاپتوموبىلدا زەھەرلىك چېكىملىك ۋە تاپانچا بارلىقىنى بايقىغان.
ئامېرىكا فېدېراتىپ تەكشۈرۈش ئىدارىسى شۇ كۈنى بايانات ئېلان قىلىپ مۇنداق دېگەن، بۇ ئىدارىنىڭ تەكشۈرۈش خادىملىرى دۆلەت بىخەتەرلىك ئىدارىسى بىلەن بىرلىكتە بۇ دېلونى تەكشۈرۈۋاتىدۇ، نۆۋەتتە ھېچقانداق بەلگە بۇ ۋەقەنىڭ تېررورلۇق ۋەقەسى بىلەن چېتىشلىق ئىكەنلىكىنى ئىسپاتلىمىدى.
ئامېرىكا دۆلەت بىخەتەرلىك ئىدارىسى باش ئىشتابى ئەتراپىدا موشۇ ئاينىڭ 3-كۈنىمۇ قوراللىق ئېتىشىش ۋەقەسى يۈز بەرگەن، ئامېرىكا فېدېراتىپ تەكشۈرۈش ئىدارىسى كېيىن تەكشۈرۈش ئارقىلىق بۇ ۋەقەنىڭ تېررورلۇق ھۇجۇم قىلىش ۋەقەسى ئىكەنلىكىنى نەزەردىن ساقىت قىلغان.