فىرانسىيە ‹‹ ئازادلىق گېزىتى ››نىڭ 8 –مارت فىرانسىيە ئاگېنتلىقىنىڭ خەۋىرىدىن نەقىل كەلتۈرۈشىچە، ب د ت نىڭ مالىدا تۇرۇشلۇق ئۇنىۋېرسال مۇقىملىقنى قوغداش ئالاھىدە پولكىنىڭ گىدال شەھىرىدىكى گازارمىسى شۇ يەر ۋاقتى 8 -مارت راكېتا بومبا ۋە زەمبىرەك ئوقىنىڭ ھۇجۇمىغا ئۇچراپ، بىر ئەسكەر ۋە ئىككى بالا قازا قىلغان، 12 ئادەم يارىلانغان. ب د ت خەۋپسىزلىك كېڭىشى بايانات ئېلان قىلىپ، بۇ ۋەقەنى كۈچلۈك ئەيىبلىگەن.

مالى مۇقىملىقنى قوغداش پولكى بايانات ئېلان قىلىپ: شۇ يەر ۋاقتى ئەتىگەن سائەت بەشتىن 40 مىنۇت ئۆتكەندە، مۇقىملىق پولك گازارمىسى 30 غا يېقىن راكېتا بومبا ۋە ئوقىنىڭ ھۇجۇمىغا ئۇچراپ، بىر ئەسكەر قازا قىلدى، سەككىز ئەسكەر يارىلاندى. گازارما سىرتىدىكى ئىككى پۇقرا قازا قىلىپ، تۆت كىشى يارىلاندى، دېگەن.

ھازىرغىچە ھېچقانداق تەشكىلات بۇ ۋەقەگە مەسئۇل بولىدىغانلىقىنى جاكارلىمىغان.

خەۋپسىزلىك كېڭىشى بايانات ئېلان قىلىپ مۇنداق دېگەن : مالى مۇقىملىق پولكى گازارمىسىنىڭ 8 – مارت ھۇجۇمغا ئۇچراش ۋەقەسىنى كۈچلۈك ئەيىبلەيمىز، مالى ھۆكۈمىتىدىن بۇ ۋەقەنى تېزدىن تەكشۈرۈپ بىر تەرەپ قىلىشنى، قاتىلنى جازاغا تارتىشنى تەلەپ قىلىمىز. خەۋپسىزلىك كېڭىشى يەنە ، تىنچلىق قوغداش خادىملىرىغا ھۇجۇم قىلغانلىق خەلقئارا ئىنسانپەرۋەلىك قانۇنىغا خىلاپلىق قىلغانلىق بولىدۇ، دەپ تەكىتلىگەن .

خەۋپسىزلىك كېڭىشى مۇنداق تەكىتلىگەن: بارلىق ۋاسىتىلەرنى قوللىنىپ، خەلقئارا تىنچلىق ۋە بىخەتەرلىككە تەھدىت سالىدىغان تېررورلۇق ھەرىكەتلىرىگە زەربە بېرىش كېرەك. ھەرقانداق تېررورلۇق قىلمىشلىرىنىڭ ھەممىسى جىنايەت.
7 -مارت، مالىنىڭ پايتەختى باماكودىكى بىر قاۋاقخانىدا تېررورلۇق ھۇجۇم قىلىش ۋەقەسى يۈز بېرىپ، بەش ئادەم قازا قىلغان، بۇنىڭ ئىچىدە ب د ت نىڭ مالىدىكى مۇقىملىقنى قوغداش پولكى ۋە ياۋروپا ئىتتىپاقى ئەزالىرىمۇ بار ئىكەن. ب د ت نىڭ باش كاتىپى بان كىمون ۋە خەۋپسىزلىك كېڭىشى بايانات ئېلان قىلىپ بۇ ۋەقەنى سادىر قىلغۇچىلارنى قاتتىق جازالاشنى تەلەپ قىلغان .