يېقىندا يەمەن ۋەزىيىتى يامانلىشىپ، ھۆكۈمەت ئۆزىنىڭ كونتروللۇقىنى يوقۇتۇپ قويدى، بىرلەشكەن دۆلەتلەر تەشكىلاتى بىلەن پارس قولتۇقى رايونىدىكى ئەرەب ئەللىرى ھەمكارلىق تەشكىلاتى يەمەن كىرىزىسىنى ھەل قىلىشنى كۈچلۈك تەلەپ قىلدى.

يېقىنقى بىر ھەپتىدىن بۇيان، يەمەننىڭ بىخەتەرلىك ۋەزىيىتىنى ئويلىشىپ، ئامېرىكا، فىرانسىيە، ئەنگلىيە ۋە گېرمانىيە قاتارلىق دۆلەتلەر يەمەندە تۇرۇشلۇق ئەلچىخانىسىنىڭ خىزمىتىنى ۋاقتىنچە ئارقا ئارقىدىن توختاتتى، ھەمدە دىپلوماتلىرىنى چېكىندۈردى. خۇسەي قوراللىق تەشكىلاتىنىڭ ئۆز ئالدىغا ھاكىمىيەتنى قولغا ئىلىشتەك ھەرىكىتى يەمەن ۋەزىيىتىنى يامانلاشتۇرۇۋەتتى، بىرلەشكەن دۆلەتلەر تەشكىلاتى، پارس قولتۇقىدىكى ئەرەب ئەللىرى ھەمكارلىق كومىتېتى قاتارلىق تەشكىلاتلار يەمەندىكى ھەر قايسى پارتىيەلەرنى شىئە مەزھىپىدىكى خۇسەي قوراللىق تەشكىلاتى بىلەن سۆھبەت ئۆتكۈزۈپ، سىياسىي مۇساپىنى تېزدىن ئەسلىگە كەلتۈرۈشكە دەۋەت قىلدى.

كىشىلەر شىئە مەزھىپىدىكى خۇسەي قوراللىق تەشكىلاتى زادى قانداق تەشكىلات ؟، ئۇنىڭ بازا تەشكىلاتى ئەرەب يېرىم ئارال شۆبىسى بىلەن ئالاقىسى بارمۇ يوقمۇ؟، يەمەندىكى قالايمىقانچىلىق ۋەزىيىتى ئۇزاق مۇددەت داۋاملىشامدۇ يوق ؟، دەپ سۆرىشى مۇمكىن.

خۇسەي قوراللىق تەشكىلاتى بىر ھەربىي قوماندان ھەسەن خۇسەينىڭ ئىسمى بىلەن ئاتالغان تەشكىلات بولۇپ، يەمەننىڭ شىمالىدىكى سادا ئۆلكىسىدە قۇرۇلغان بولۇپ، ئاساسلىقى شىئە مەزھىپىدىكى خەلق ئەسكەرلىرىدىن تەركىب تاپقان، 2003- يىلى،ئامېرىكا ئىراققا ھۇجۇم قىلغاندا خۇسەي قوراللىق كۈچلىرى يەمەن ھۆكۈمىتىدىن ئەينى ۋاقىتتىكى سادام ھاكىمىيتىنى قوللاشنى تەلەپ قىلغان ئىدى. 2004 -يىلى ھەسەن خۇسەي خەلقنى ئەينى ۋاقىتتىكى سالىخ ھۆكۈمىتىنى ئاغدۇرۇپ تاشلاشقا چاقىرغان ئىدى، كېيىن ئۇ ئۇرۇشتا ھۆكۈمەت ئارمىيەسى تەرىپىدىن ئېتىپ تاشلانغان، ئۇندىن كىيىن بۇ تەشكىلات بىلەن ھۆكۈمەت ئارمىيەسى يەمەننىڭ شىمالىي قىسىمىدا كۆپ يىل كەسكىن ئۇرۇش قىلغان. نۆۋەتتە بۇ تەشكىلاتقا ھەسەن خۇسەينىڭ ئىنىسى ئابدۇل، مالىك خۇسەي رەھبەرلىك قىلماقتا.

2011-يىلى يەمەندە قالايمىقانچىلىق يۈز بېرىپ ھاكىمىيەت ئالمىشىپ، ھازىرقى ھاكىمىيەت بىلەن سابىق ھاكىمىيەتنىڭ يۇقىرى دەرىجىلىك ئەمەلدارلىرى ئوتتۇرسىدىكى سۈركۈلۈش توختىمىغانلىقتىن، ھاكىمىيەت ئاجىزلاپ، ئارمىيە پارچىلاندى، خۇسەي قوراللىق تەشكىلاتى بۇ پۇرسەتتىن پايدىلىنىپ ئۆزىنىڭ كۈچ دائىرىسىنى پايتەختىنىڭ ئەتراپىدىكى رايونلارغىچە كېڭەيتتى. يەمەن ھۆكۈمەت تەرەپ خۇسەي قوراللىق تەشكىلاتىنىڭ 20 مىڭدىن 30 مىڭغىچە قوراللىق خادىمى بار دەپ ھېسابلىدى. بىراق بۇ تەشكىلات ئۆزىنىڭ 100 مىڭدىن كۆپرەك ئادىمىنىڭ بارلىقىنى ئېيتتى.

2009-يىلى، يەمەن بىلەن سەئۇدى ئەرەبىستانىدىكى بازا تەشكىلاتىنىڭ شۆبىسى بىرلىشىپ بازا تەشكىلاتى ئەرەب يېرىم ئارال شۆبىسىنى قۇرۇپ، سۈننى مەزھىپىدىكى قوراللىق خادىملارنى ئاساس قىلىپ، يەمەننىڭ جەنۇبىي قىسىمىدا ئۇزاقتىن بۇيان ھەرىكەت قىلىپ كەلدى، ھەمدە شۇ يەردىكى سۈننى مەزھىپىدىكى قەبىلىلەر بىلەن ئاستا ئاستا بىرىكىپ، يەمەن ھۆكۈمىتى ، ئارمىيەسى ۋە چەتئەل پۇقرالىرى ھەمدە ئەلچىخانىلارغا ھۇجۇم قوزغىدى. بۇ يىلنىڭ باشلىرىدا فىرانسىيەدە چىقىدىغان چارلى ھەپتىلىك ژۇرنىلىنىڭ باش ئورگىنى ھۇجۇمغا ئۇچراپ، 12 كىشى قازا قىلدى. ئارقىدىن بازا تەشكىلات ئەرەب يېرىم ئارال شۆبىسى ۋە ئۇنىڭ رەھبەرلىرى بۇ قېتىمقى ھەرىكەتنى ئۆزلىرى پىلانلىغانلىقىنى ۋە مەبلەغ بىلەن تەمىنلىگەنلىكىنى جاكارلىدى.

يەمەن ھۆكۈمىتى بىلەن پارس قولتۇقى ئەرەب ئەللىرى ھەمكارلىق كومىتېتى كۆپ يىللاردىن بۇيان ئىراننى خۇسەي قوراللىق تەشكىلاتىنىڭ ھاكىمىيەتنى قولغا ئىلىشنى قوللاپ، رايون ۋەزىيىتىگە تەھىدىت پەيدا قىلدى دەپ ئەيىبلەپ كەلدى، بىراق ئىران خۇسەي قوراللىق تەشكىلاتىنى قوللىغانلىقىنى ئىنكار قىلدى. خۇسەي قوراللىق تەشكىلاتى بىلەن بازا تەشكىلاتى ئەرەب يېرىم ئارال شۆبىسىنىڭ پۈتكۈل يەمەننى كونترول قىلىشتەك قارا نىيىتى بولغانلىقى ئۈچۈن، ئىككى تەرەپ يەمەننىڭ جەنۇبىي رايونىدا كۆپ قېتىم سوقۇشۇپ، كۆپلىگەن كىشىلەرنىڭ قازا قىلىش ۋە يارىلىنىشىنى كەلتۈرۈپ چىقاردى، خۇسەي قوراللىق تەشكىلاتى بۇنىڭ بىلەن جەنۇبىي قىسىم رايونغا چېكىنىشكە مەجبۇر بولدى.

بۇنىڭدىن، خۇسەي قوراللىق تەشكىلاتى بىلەن ئەرەب يېرىم ئارىلى شۆبىسىنىڭ تامامەن ئوخشىمايدىغان ئىككى قوراللىق تەشكىلات ئىكەنلىكىنى، ئۇلارنىڭ ئوتتۇرىسىدا ھېچقانداق ئالاقىنىڭ يوقلىغىنى كىرىۋېلىشقا بولىدۇ.

بۇ يىل 2-ئاينىڭ 6- كۈنى، خۇسەي قوراللىق تەشكىلاتى زۇڭتۇڭ بىلەن پارلامېنتنىڭ ئورنىدا دۆلەتنى ئىدارە قىلىش ئۈچۈن، ئۆز ئالدىغا زۇڭتۇڭ كومىتېتى بىلەن مەملىكەتلىك ئۆتكۈنچى كومىتېتىنى قۇرغانلىقىنى جاكارلىدى. بۇ ھەرىكەت يەمەننى ھۆكۈمەتسىز ھالەتكە ئىلىپ كىردى، پايتەخت سانانى كونترول قىلغاندىن كىيىن، بۇ تەشكىلات قوراللىق خادىملىرىنى جەنۇبىي قىسىم رايونغا ئورۇنلاشتۇردى، بىراق بازا تەشكىلاتى ئەرەب يېرىم ئارال شۆبىسى بىلەن سۈننى مەزھىپىدىن بولغان قەبىلىلەرنىڭ كۈچلۈك قارشى تۇرۇشىغا ئۇچرىدى. خەلقئارا جەمئىيەت بازا تەشكىلاتى ئەرەب يېرىم ئارال شۆبىسىنىڭ بۇ پۇرسەتتىن پايدىلىنىپ تەرەققىي قىلىپ زورىيىشىدىن ، ھەمدە غەرب ئەللىرىگە ھۇجۇم قوزغاش ئىقتىدارىنى ھازىرلىشىدىن ئەندىشە قىلدى.

بىرلەشكەن دۆلەتلەر تەشكىلاتىنىڭ باش كاتىپى بان كىمون يېقىندا، يەمەننىڭ قالايمىقانچىلىق ۋەزىيىتىگە قارتا، خەلقئارا جەمئىيەتنىڭ قاراپ تۇرمايدىغانلىقىنى، بارلىق ۋاسىتىلارنى قوللىنىپ يەمەننىڭ سىياسىي مۇساپىسىنى ئەسلىگە كەلتۈرىدىغانلىقىنى بىلدۈردى. پارس قولتۇقىدىكى ئەرەب ئەللىرى ھەمكارلىق كومىتېتى 14- فېۋرال بىرلەشكەن دۆلەتلەر تەشكىلاتىنىڭ يامانلىشىۋاتقان يەمەن ۋەزىيىتىگە قارتا كۈچلۈك تەدبىر قوللىنىپ، قۇرال كۈچى ئىشلىتىش توغرىسىدىكى مەزمۇنلار بولغان بىرلەشكەن دۆلەتلەر تەشكىلاتى خارتىسىنىڭ 7- ماددىسىغا ئاساسەن يەمەن مەسىلىسى توغرىسىدا قارا لايىھەسىنى ماقۇللىشىنى تەلەپ قىلدى. سانا ئونىۋېرسىتېتى سىياسەت فاكۇلتېتىنىڭ پروفىسسورى فىئەيد سالىش مۇنداق دېدى: ئەگەر خۇسەي قوراللىق تەشكىلاتى بىرلەشكەن دۆلەتلەر تەشكىلاتى يېتەكچىلىك قىلغان سۆھبەتنى قوبۇل قىلىشنى رەت قىلىدىغان بولسا، پايتەخت سانادا قوراللىق توقۇنۇش پارتلاپ، ئەھۋال 2011- يىلدىكىدىنمۇ يامانلىشىدىغانلىقىنى بىلدۈردى.