جۇڭگو ئۇيغۇرچە رادىيو تورى 31-ئۆكتەبىر بېيجىڭ خەۋىرى: يۈننەن ئۆلكىلىك يۇقىرى خەلق سوت مەھكىمىسى 31-ئۆكتەبىر 2-سوتتا كۇنمىڭ ۋوگزالىدىكى 1-مارت ئېغىر زوراۋانلىق تېررورلۇق دېلوسىغا ئاشكارا سوت ئاچتى ھەمدە نەق مەيداندا ھۆكۈم ئېلان قىلدى. ھۈسەن مەمەتنىڭ يۇقىرىغا سۇنغان ئەرزىنى قايتۇرۇۋەتتى، 1-سوتتىكى ئىسكەندەر ئەھەت، تۇرغۇن توخنىياز، ھۈسەن مەمەتكە بېرىلگەن ئۆلۈم جازاسى ھەمدە پاتىگۈل توختىغا بېرىلگەن مۇددەتسىز قاماق جازاسى توغرىسىدىكى ھۆكۈمنى ساقلاپ قالدى.

يۈننەن ئۆلكىلىك يۇقىرى خەلق سوت مەھكىمىسى مۇنداق دەپ قارىدى: يۇقىرىغا ئەرز سۇنغۇچى ھۈسەن مەمەت بىلەن ئەسلى سوتلانغان جاۋابكار ئىسكەندەر ئەھەت باشقىلارنى تېررورلۇق تەشكىلاتقا كىرىشكە تەكلىپ قىلغان ۋە ئادەم توپلىغان، ئەسلى جاۋابكار تۇرغۇن توخنىياز تېررورلۇق تەشكىلاتنىڭ پائالىيەتلىرىنى نەق پۇل بىلەن تەمىنلىگەن، ئۈچ كىشى تېررورلۇق تەشكىلاتتا تەشكىللەش، رەھبەرلىك قىلىش رولىنى ئوينىغان ھەمدە كۇنمىڭ ۋوگزالىدىكى زوراۋانلىق تېررورلۇق ھەرىكىتىنى بىرلىكتە پىلانلىغان، ئۈچ كىشى تېررورلۇق تەشكىلات ھەمدە بۇ تەشكىلاتنى تەشكىللەش، قوماندانلىق قىلىشقا ئائىت بارلىق جىنايى ھەرىكەتلەرنىڭ جىنايى ئىشلار جاۋابكارلىقىنى ئۈستىگە ئېلىشى كېرەك.

ئەسلى جاۋابكار پاتىگۈل توختى تېررورلۇق تەشكىلاتقا ئاكتىپلىق بىلەن قاتناشقان ھەمدە ئادەم ئۆلتۈرۈش ھەرىكىتىگە قاتناشقان، ئۆزى قاتناشقان بارلىق جىنايى ھەرىكەتلەرنىڭ جىنايى ئىشلار جاۋابكارلىقىنى ئۈستىگە ئېلىشى كېرەك. يۇقىرىغا ئەرز قىلغۇچى ھۈسەن مەمەتنىڭ ئادەم ئۆلتۈرۈش ھەرىكىتىگە قاتناشمىغانلىقى، قەستەن ئادەم ئۆلتۈرۈش جىنايىتى شەكىللەندۈرمىگەنلىكى توغرىسىدىكى يۇقىرىغا قىلغان ئەرزنىڭ سەۋەبلىرى تەكشۈرۈپ ئېنىقلانغان پاكىت ھەمدە قانۇندىكى بەلگىلىمىگە ئۇيغۇن ئەمەس، پۇت تىرەپ تۇرالمايدۇ. كۇنمىڭ شەھەرلىك ئوتتۇرا خەلق سوت مەھكىمىسى جاۋابكار ئىسكەندەر ئەھەت، تۇرغۇن توختىنىياز، ھۈسەن مەمەتنىڭ تېررورلۇققا تەشكىلاتنى تەشكىللەش، رەھبەرلىك قىلىش جىنايىتى، قەستەن ئادەم ئۆلتۈرۈش جىنايى، جاۋابكار پاتىگۈل توختىنىڭ تېررورلۇق تەشكىلاتقا قاتنىشىش، قەستەن ئادەم ئۆلتۈرۈش جىنايىتى بارلىقىغا ئائىت پاكىتلار ئېنىق، توغرا، تولۇق، شۇڭا بۇلارغا چىقىرىلغان ھۆكۈم توغرا، بېرىلگەن جازا مۇۋاپىق، سوت تەرتىپى قانۇنغا ئۇيغۇن دەپ جەزملەشتۈردى.

جاۋابكار پاتىگۈل توختى تېررورلۇق تەشكىلاتىغا ئاكتىپلىق بىلەن قاتناشقۇچى، ئادەم ئۆلتۈرۈش قىلمىشىنى يولغا قويغۇچى، ئۇنىڭ جىنايىتى ئېغىر، لېكىن ئۇ دېلو سادىر قىلغاندا ئىككى قات، شۇڭا «جۇڭخۇا خەلق جۇمھۇرىيىتى جىنايى ئىشلار قانۇنى»نىڭ 49-ماددىسى 1-تارمىقىدىكى بەلگىلىمىگە ئاساسەن، سوت قىلغاندا ئىككى قات ئاياللارغا قانۇن بويىچە ئۆلۈم جازاسى بېرىلمەيدۇ.
ئۇندىن باشقا يۈننەن ئۆلكىلىك يۇقىرى خەلق سوت مەھكىمىسى 2-سوتتا قانۇن بويىچە ئۇلارنىڭ ئەرزىنى قايتۇرۇپ، ئەسلى ھۆكۈمنى ساقلاپ قېلىش ھەققىدە ھۆكۈم چىقاردى.