رېيتېر ئاگېنتلىقى، موسكۋا، 5- ئاۋغۇست تېلېگراممىسى: مۇناسىۋەتلىك ئەربابلارنىڭ ئاشكارىلىشىچە، رۇسىيە زۇڭتۇڭى پۇتىن، ھۆكۈمەتنىڭ بىر نەچچە يۇقىرى دەرىجىلىك ئەمەلدارلىرى ھەمدە پارلامېنت ئەزالىرى كېلەر ھەپتە قىرىمغا بارىدىكەن. گەرچە غەرب ئەللىرى رۇسىيەگە ئىقتىسادىي جازا چارىسى يۈرگۈزۈۋاتقان بولسىمۇ، لېكىن ئۇلارنىڭ بۇ سەپىرى رۇسىيەنىڭ قارا دېڭىزدىكى بۇ رايوندىن ۋاز كەچمەيدىغانلىقىنى ئىپادىلەپ بەرگەن.
      كىرېمل سارىيىنى قوللايدىغان بىرلىككە كەلگەن رۇسىيە پارتىيەسىدىكى بىر زات پارلامېنت تۆۋەت پالاتاسى دۆلەت دۇماسىدىكى 450 ئەزانىڭ كۆپىنچىسىنىڭ پۇتىن ۋە زۇڭلى مېدىۋېدىۋ بىلەن بىللە 14 - ئاۋغۇست قىرىمدا ئېچىلىدىغان يىغىنغا قاتنىشىش ئېھتىماللىقى بارلىقىنى بىلدۈرگەن.
      كىرېمل سارىيىدىكى بىر ئۇزۇن قۇلاق ئەرباب مۇشۇنداق بىر پىلاننىڭ بارلىقىنى دەلىللىگەن، لېكىن تەپسىلاتلارنى ئاشكارىلاشنى رەت قىلغان. كىرېمل سارىيىنىڭ بىر باياناتچىسى ھەتتا مېدىۋېدىۋنىڭ پۇتىن بىلەن بىللە قىرىمغا بارىدىغان - بارمايدىغانلىقىنىمۇ ئاشكارىلىمىغان.
       بىرلىككە كەلگەن رۇسىيە پارتىيەسىدىكى ئۇزۇن قۇلاق ئەربابلار مۇنداق دېدى: «بۇ قېتىمقى سەپەردە ئاساسلىقى، سىياسىي خاراكتېرلىك ئۇچۇرلار يەتكۈزۈلىدۇ. بۇ قىرىمنىڭ رۇسىيەنىڭ خاس زېمىنى ئىكەنلىكىنى بىلدۈرىدۇ. رۇسىيە گەرچە جازا چارىسىغا ئۇچرىغان بولسىمۇ، لېكىن قىرىمدىن ۋاز كەچمىدى».
بۇ ئۇزۇن قۇلاق ئەرباب پۇتىننىڭ قىرىمدىكى كۈنتەرتىپى توغرىسىدا سورالغان سوئالغا مۇنداق جاۋاب بەردى: «ئۇلار دۆلەت خامچوتىنىڭ قىس بولۇشى، رۇسىيە ئىقتىسادىنىڭ ئېشىش سۈرئىتى ئاستىلاۋاتقان شارائىتتا ئىجتىمائىي تۈرلەرگە قانداق مەبلەغ توپلاش ۋە قىرىمنى قانداق ئېچىش قاتارلىق دۆلەت ئىچىدىكى مەسىلىلەر توغرىسىدا يىغىن ئاچىدۇ. غەب ئەللىرىنىڭ رۇسىيەگە جازا چارىسى يۈرگۈزۈشى قاتارلىق خەلقئارالىق مەسىلىلەرمۇ كۈنتەرتىپ ئىچىگە كىرگۈزۈلدى».
       فىرانسىيە ئاخبارات ئاگېنتلىقى، موسكۋا، 5- ئاۋغۇست تېلېگراممىسى: غەرب ئەللىرى موسكۋانىڭ ئۇكرائىنادىكى رۇسىيەپەرەس ئايرىمىچىلارنى قوللىغانلىقىنى دەستەك قىلىپ، رۇسىيەگە « قوبۇل قىلغىلى بولمايدىغان» جازا چارىسى يۈرگۈزدى، بۇنىڭ بىلەن پۇتىن 5- ئاۋغۇست ھۆكۈمەتنىڭ بۇ جازا چارىلىرىگە تاقابىل تۇرىدىغان لايىھە تۈزۈپ چىقىشى توغرىسىدا بۇيرۇق چۈشۈردى.
       پۇتىن مۇنداق دېدى: «ئىقتىساد جەھەتتىن بېسىم چۈشۈرۈشتەك بۇ سىياسىي ۋاسىتىنى قوبۇل قىلغىلى بولمايدۇ. بۇ جازا چارىلىرى بارلىق ئۆلچەم ۋە مىزانلارغا مۇخالىپ. رۇسىيە ھۆكۈمىتى قىسمەن دۆلەتلەر يۈرگۈزگەن ئاتالمىش جازا چارىسىغا تاقابىل تۇرۇش تەدبىرلىرىنى تۈزۈپ بولدى».
پۇتىننىڭ ئېيتىشىچە، ئىچكى كابىنېت بىر قىسىم چارە - تەدبىرلەرنى تۈزۈپ چىقىپ، خېرىدارلارنىڭ غەرب ئەللىرىنىڭ مەھسۇلاتلىرىغا بولغان ئېھتىياجىنى تەسىرگە ئۇچراتماسلىققا كاپالەتلىك قىلىدىكەن.
       ئامېرىكا ۋە ياۋروپانىڭ ئۆتكەن ھەپتە يولغا قويغان ئەڭ يېڭى ۋە جازالاش خاراكتېرى ئەڭ كۈچلۈك بولغان جازا چارىلىرى ئاساسلىقى، رۇسىيە ئۈچۈن ئىنتايىن مۇھىم بولغان نېفىت ۋە ھەربىي لازىمەتلىكلەر سانائىتىگە قارىتىلغان ئىكەن.
      ياۋروپا ئىتتىپاقى ۋە ئامېرىكا ئۇكرائىنا ۋەزىيىتىنى دەستەك قىلىپ 1- ئاۋغۇستتىن باشلاپ رۇسىيەگە يېڭىدىن بىر يۈرۈش جازا چارىلىرىنى يۈرگۈزۈپ، رۇسىيە بانكىلىرىنىڭ ياۋروپا ئىتتىپاقىدىكى كاپىتال بازىرىغا كىرىشنى چەكلىگەن. بۇنىڭدىن بۇرۇن ئامېرىكا ھۆكۈمىتى رۇسىيەدىكى دۆلەت مۇداپىئەسى ۋە ئېنېرگىيە مەنبەسى كارخانىلىرىغا جازا چارىسى يۈرگۈزگەنىدى.
      رېيتېر ئاگېنتلىقى، موسكۋا، 6- ئاۋغۇست تېلېگراممىسى: نازارەت قىلىپ باشقۇرۇش ئورۇنلىرى 6- ئاۋغۇست مۇنۇلارنى بىلدۈردى: رۇسىيە رومىنىيەدىن كالا گۆشى ۋە تىرىك كالا ئىمپورت قىلىشنى توختاتتى. موسكۋا بۇ سودا چەكلەش بۇيرۇقىنى ئېلان قىلىشتىن بۇرۇن، ئۇكرائىنا كىرىزىسى غەرب ئەللىرىنىڭ رۇسىيەگە يېڭى جازا چارىسى يۈرگۈزۈشىگە تۈرتكە بولغانىدى.
     رۇسىيە فېدېراتسىيەسى ھايۋاناتلار ۋە ئۆسۈملۈكلەر سەھىيە نازارەتچىلىكى ئىدارىسى بايانات ئېلان قىلىپ، بۇ چەكلەش بۇيرۇقىنىڭ ۋاقىتلىق ئىكەنلىكىنى، رومىنىيەدە غالجىر كالا كېسىلى تارقالغاچقا بۇ بۇيرۇقنىڭ چىقىرىلغانلىقىنى بىلدۈرگەن.