شىنخۇا تورى كاتماندو 13- ماي خەۋىرى : نېپال ئىچكى كابىنېتىنىڭ 12- ماي يېرىم كېچىدە ئېلان قىلغان سانلىق مەلۇماتىغا قارىغاندا، 12- ماي يۈز بەرگەن كۈچلۈك يەر تەۋرەشتە نېپال چېگىرىسىدا 61 ئادەم قازا قىلغان ، 1261 ئادەم يارىلانغان.
نېپالدىكى 30 دىن ئارتۇق ناھىيە بۇ قېتىمقى يەر تەۋرەشنىڭ تەسىرىگە ئۇچرىغان. ئاپەت ئەڭ ئېغىر بولغانلىرى پايتەخت كاتماندونىڭ شەرقىگە ئون نەچچە كىلومېتىر كېلىدىغان دوركا ناھىيەسى بولۇپ، 34 ئادەم قازا قىلغان ؛ يەنە بىرسى سىندۇپارېچالك ناھىيەسى بولۇپ، 11 ئادەم قازا قىلغان.
بۇ قېتىم يۈز بەرگەن يەر تەۋرەش نېپالنىڭ ئاپەتتىن قۇتقۇزۇش خىزمىتىگە ئېغىر توسالغۇ ئېلىپ كەلگەن. 25- ئاپرىلدىكى يەر تەۋرەشتە بۇزۇلغان ئۆيلەر پۈتۈنلەي ئۆرۈلۈپ چۈشكەن ياكى تېخىمۇ خەتەرلىك بولۇپ قالغان . ئالدىنقى ھەپتە ئەمدىلا ئېچىلغان جۇڭگو - نېپال قۇرۇقلۇق يولى « ھاياتلىق لىنىيەسى » ـــــــ ئانىكا تاشيولى گۈمۈرۈلۈپ چۈشكەنلىكتىن يەنە ئۈزۈلۈپ قالغان.
نېپال مائارىپ مىنىستىرلىقى مەملىكەتتىكى قايتىدىن دەرس باشلىماقچى بولغان مەكتەپلەرنىڭ دەرس باشلاش ۋاقتىنىڭ يەنە ئىككى ھەپتە كەينىگە سۈرۈلىدىغانلىقىنى، ئەسلى پىلاندىكى دەرس باشلاش ۋاقتى 15-مايدىن 30 مايغا ئۆزگەرگەنلىكىنى جاكارلىغان.سەھىيە ۋە نوپۇس مىنىستىرلىقى چەت ئەل داۋالاش ئەترەتلىرىنى ۋاقتىنچە ئايرىلماسلىققا مۇراجىئەت قىلغان. نۆۋەتتە، 30 دۆلەت ۋە رايوندىن كەلگەن 1000 دىن ئارتۇق تېببىي خادىم 100 دىن ئارتۇق تارماق ئەترەتكە بۆلۈنۈپ، نېپالنىڭ ھەر قايسى جايلىرىدا يارىدارلارنى قۇتقۇزۇۋېتىپتۇ.
جۇڭگو يەر تەۋرەشنى كۆزىتىش ئىستانسىسىنىڭ ئاپتوماتىك ئۆلچەپ بېكىتىشىگە قارىغاندا، 12-ماي سائەت 15:05 دە نېپال(شىمالىي كەڭلىك 27.8 گىرادۇس، شەرقىي ئۇزۇنلۇق 86.1 گىرادۇس) دا 7.5 بال يەر تەۋرىگەن بولۇپ، تەۋرەش مەنبەسىنىڭ چوڭقۇرلۇقى 10 كىلومېتىر كېلىدىكەن.