خەلق تورى 6-ئاۋغۇست تېلېگراممىسى : تەيۋەن ‹‹ جۇڭگو ۋاقىت گېزىتى ›› خەۋىرىگە قارىغاندا ، ‹‹ئالما›› شىركىتى بىلەن مۇناسىۋىتى ناھايىتى ياخشى بىر دوكتۇر قۇرغان ئاخبارات ۋاسىتىسى Recode نىڭ خەۋىرىدىن مەلۇم بولۇشىچە ، ‹‹ئالما›› شىركىتى 9-سېنتەبىر ھەممە دىققەت قىلىۋاتقان يېڭى بىر ئەۋلاد چوڭ ئېكرانلىق iPhone يانفونىنى ئېلان قىلىدىكەن . يېقىندىن بۇيان ، ‹‹ئالما›› شىركىتىنىڭ يېڭى يانفوننى ئېلان قىلىدىغانلىقى ھەققىدىكى مىش-مىش گەپلەر ئاۋۇپ قالغان بولسىمۇ ، Recode تۇنجى قېتىم بۇ توغرىسىدىكى ئېنىق ئۇچۇرنى تارقاتقان .

خەۋەردە: ‹‹ يېڭىدىن بازارغا سېلىنىدىغان iPhone يانفونىغا ھېسابلاش سۈرئىتى تېخىمۇ تېز بولغان بىر تەرەپ قىلغۇچ ئىشلىتىلگەن ، يانفون ئېكرانى4.7 سۇڭلۇق ۋە 5.5 سۇڭلۇق ئىككى خىل بولىدۇ ›› دېيىلگەن . ‹‹ئالما›› شىركىتى بۇ خەۋەرگە ھېچقانداق ئىنكاس قايتۇرمىغان .

ئالدىنقى پەسىلدە ، ‹‹ئالما›› شىركىتى تەخمىنەن 35 مىليون دانە iPhone يانفونىنى ساتقان ، بىراق ، iPhone نىڭ دۇنيا ئەقلىي ئىقتىدارلىق يانفون بازىرىدا ئىگىلىگەن نىسبىتىدە ئازىيىش كۆرۈلگەن . بازار تەتقىقات ئورگىنى StrategyAnalytics نىڭ كۆرسىتىشىچە ، بۇ يىلنىڭ 2-پەسلىدە ، Android مەشغۇلات سىستېمىسىنى ئىشلىتىدىغان يانفونلار دۇنيادىكى %85 بازارنى ئىگىلىگەن بولۇپ ، ‹‹ ئالما ›› يانفونلىرىنىڭ دۇنيا بازىرىدا ئىگىلىگەن نىسبىتى %13.4 تىن %11.9 كە چۈشۈپ قالغان .