مۇخبىر 29- دېكابىر شىنجاڭ قىشلىق تەنھەرىكەت تۈرلىرىنى باشقۇرۇش مەركىزىدىن ئىگىلىشىچە، قىشلىق تەنھەرىكەت مۇسابىقە مەيدانىدا  شىنجاڭ بويىچە تۇنجى ئەقلىي ئىقتىدارلىق كوچا ياسالغان. ئۈرۈمچى ناھىيەسىنىڭ ھۆكۈمەت ئىشلىرى ئېلېكتىرون ئىشخانىسىنىڭ مۇدىرى ۋاڭ لېي مۇنداق دېدى: «ئىشچىلار ئەقلىي ئىقتىدارلىق يول چىرىغى ئورنىتىۋاتىدۇ. ئېگىزلىكى 12 مېتىر كېلىدىغان يول چىرىغى ئىشلىتىشكە كىرىشكەندىن كېيىن، ئىندۇكسىيەگە ئاساسەن يورۇقلۇق دەرىجىسى ئۆزلۈكىدىن تەڭشىلىپ، ئېنېرگىيە تېجەش ئۈنۈمىگە يەتكىلى بولىدۇ. ھەربىر يول چىرىغىنىڭ ئۈستىگە يەنە جىددىي ئەھۋال كۇنۇپكىسى ئورنىتىلىپ، جىددىي ئەھۋال يۈز بەرگەندە، كۇنۇپكا بېسىلىپ ساقچىغا مەلۇم قىلىش سىستېمىسىغا ئاپتوماتىك ئۇلىنىدۇ».بۇ ئەقلىي ئىقتىدارلىق كوچىنىڭ ئومۇمىي ئۇزۇنلۇقى 11.4 كىلومېتىر كېلىدۇ، ئۈرۈمچى شەھىرىنىڭ ئەقلىي ئىقتىدارىغا ئىگە شەھەر قۇرۇلۇشىدىكى سىناق قۇرۇلۇش، يەنى مەملىكەتلىك 13- نۆۋەتلىك قىشلىق تەنھەرىكەت مۇسابىقىسىنىڭ يۈرۈشلەشكەن قۇرۇلۇشىنى كاپالەتلەندۈرۈش تۈرى ھېسابلىنىدۇ. بۇ قۇرۇلۇش تۈرى ـــ 302 ئەقلىي ئىقتىدارىغا ئىگە يول چىرىغى، ئون ئەقلىي ئىقتىدارىغا ئىگە ئېگىز خادىلىق چىراغ، ئىككى ئەقلىي ئىقتىدارىغا ئىگە كوچا ئاپتوبۇس بېكىتى ۋە ئىككى ئەقلىي ئىقتىدارىغا ئىگە ئۇنىۋېرسال قانۇننى ئىجرا قىلىش پونكىتى، يۈرۈشلەشكەن ئېلېكتر ئېنېرگىيەسى، ئالاقە ۋە تور ئەسلىھەلىرى ھەم ئەقلىي ئىقتىدارىغا ئىگە باشقۇرۇش سۇپىسى ئارقىلىق كونترول قىلىش سىستېما ئەسلىھەسى قاتارلىقلارنى ئۆز ئىچىگە ئالغان.

     ۋاڭ لېي مۇنداق دېدى: «قۇرۇلۇش ئىشلىتىشكە كىرىشكەندىن كېيىن، مەملىكەتلىك 13- نۆۋەتلىك قىشلىق تەنھەرىكەت مۇسابىقىسىنىڭ ئوڭۇشلۇق ئېچىلىشىغا تېخىمۇ ئەقلىي ئىقتىدارلاشتۇرۇلغان، تېخىمۇ قولايلىق مۇلازىمەت بىلەن تەمىنلەپ، ئۈرۈمچى شەھىرىنىڭ شەھەر قۇرۇلۇش ۋە باشقۇرۇش سەۋىيەسىنىڭ ئۆسۈشىنى مەزكەزلىك نامايەن قىلىدۇ».

مۆلچەرلىنىشىچە، بۇ تۈر 2016- يىلى 5- يانۋار تاماملىنىپ، 10- يانۋار ئەتراپىدا سىناق قىلىنىدىكەن.

سۈرەتتە: ئەقلىي ئىقتىدارلىق بېكەت.

(سۈرەتنى ئۈرۈمچى ناھىيەسىنىڭ ھۆكۈمەت ئىشلىرى ئېلېكتىرون ئىشخانىسى تەمىنلىگەن)