ب د ت نىڭ بىلدۈرۈشىچە، سۈرىيە ئىچكى ئۇرۇشى ۋە كۈنسېرى داۋاملىشىۋاتقان توقۇنۇش سەۋەبىدىن بۇ يىل يۇرتىدىن ئايرىلىشقا مەجبۇر بولغان ئادەمنىڭ سانى 60 مىليوندىن «خېلىلا ئېشىپ» كەتكەن ۋە يېڭى رېكورت ياراتقان بولۇشى مۇمكىن ئىكەن.ب د ت مۇساپىرلار مەھكىمىسنىڭ دوكلاتىدا بىلدۈرۈشىچە، يۇقىرىقى مۆلچەرلەنگەن سانلىق مەلۇمات ئۇرۇشتىن قاچقان 20 مىليون مۇساپىرنى ئۆز ئىچىگە ئالىدىكەن. بۇ 1992-يىلى يۇگۇسلاۋىيە توقۇنۇش پارتلىغاندىن بۇيان دۇنيا مىقياسىدىكى ئەڭ چوڭ مۇساپىرلار دولقۇنى ئىكەن.

     دوكلاتتا دېيىلىشىچە، يەنە 2 مىليون 500 مىڭ پاناھلىق ئىلتىماسى بىر تەرەپ قىلىنىشنى كۈتۈپ تۇرۇپتۇ. گېرمانىيە، روسىيە ۋە ئامېرىكا بۇ يىلنىڭ ئالدىنقى يېرىمىدا تاپشۇرۇپ ئالغان پاناھلىق ئىلتىماسى 1مىليونغا يېتىدىكەن.

     كۆرسىتىلىشىچە، 2015-يىلى پۈتۈن دۇنيادا يۇرت ماكانىدىن ئايرىلغان ئادەم تۇنجى قېتىم 60 مىليوندىن ئېشىپ كەتكەن، ھازىر دۇنيادا ھەر 122 ئادەم ئارىسىدا بىر ئادەم يۇرت ماكانىدىن ئايرىلغان ئىكەن، 2014-يىلى بۇ سان 59 مىليون 500 ئىدى.

    ئىگەللىنىشىچە، توقۇنۇش بولۇۋاتقان رايون بىلەن چېگرىلىنىدىغان تەرەققىي قىلىۋاتقان دۆلەتلەر قوبۇل قىلغان مۇساپىرلارنىڭ نىسبىتى ئەڭ يۇقىركەن. مەزكۇر دوكلات كۈنسېرى ئېشىپ بېرىۋاتقان «غەزەپ» ھېسسىياتى ۋە «مۇساپىرلار سىياسىيلىشىشى» دىن ئاگاھلاندۇرۇش بەرگەن.

ب د ت مۇساپىرلا مەھكىمىسىنىڭ بىلدۈرۈشىچە، 2011-يىلدىن بۇيان يۈز بەرگەن سۈرىيە ئىچكى ئۇرۇشى كىشىلەرنىڭ كەڭ كۆلەمدە سەرگەردان بولۇشىنىڭ ئاساسلىق سەۋەبى ئىكەن. بۇ يىلنىڭ ئوتتۇرىسىغىچە 4 مىليون 200 مىڭ سۈرىيەلىك يۇرتىدىن ئايرىلىپ چەتئەلگە قاچقان، 7 مىليون 600 ئادەم دۆلەت ئىچىدە كۆچكەن.

    بۇ ئورگاننىڭ بىلدۈرۈشىچە، سۈرىيەلىكلەر ۋە ئۇكرائىنالىقلار بۇ يىلنىڭ ئالدىنقى يېرىمىدا يېڭىدىن كۆپەيگەن 839 مىڭ مۇساپىرنىڭ يېرىمىنى ئىگەللەيدىكەن.