1-ئاينىڭ 27-كۈنى كەچ سائەت سەككىزدىن 40 مىنۇتلار ئۆتكەندە، بېيجىڭدىن نەننىڭغا قاراپ يولغا چىققان Z285 قېتىملىق نۆۋەتچى پويىزدىكى رادىئودىن ناھايىتى جىددىي بېرىلگەن ئۇچۇر ئاڭلاندى:«پويىزدا بىر ھامىلدار ئايال يەڭگىش ئالدىدا تۇرماقتا، بالا تۇغدۇرۇپ باققان تەجرىبىلىك دوختۇرلار ياكى يولۇچىلار تېزدىن 8-ۋاگونغا كېلىپ ياردەم قىلىڭلار». رادىئودىن بۇ ئۇچۇرنى ئاڭلىغان جېڭجۇ ئۇنۋېرسىتىتى قارمىقىدىكى 1-دوختۇرخانىنىڭ دوختۇرى- ۋاڭ مېڭ بىلەن لىيۇجۇدىن پېنسىيىگە چىققان دوختۇر- سەي گۇيرۇڭ قاتارلىقلار دەرھال نەق مەيدانغا يېتىپ كەلگەن ھەم پويىز خادىملىرى تەييارلىغان ۋاقىتلىق تۇغۇت ئۆيىدە ھامىلدار ئايالنى تۇغدۇرۇشقا باشلىغان.

       شۇنىڭ بىلەن بىر ۋاقىتتا، پويىز باشلىقى-سۇڭ شىيەننەن جېڭجۇ تۆمۈر يول ئىدارىسى يولۇچىلار پويىزى دىسپېتچېرىلىك ئىشخانىسىغا بۇ ئەھۋالنى دوكلات قىلىپ، جېڭجۇ 120 جىددىي قۇتقۇزۇش مەركىزىنىڭ دەرھال جېڭجۇ ۋوگزالىغا ماشىنا ئەۋەتىپ ياردەم قىلىشىنى تەلەپ قىلغان. پويىزدىكى يولۇچىلارنىڭ ياردىمى ئاستىدا، «تۇغۇت ئۆيى» دىن توختىماستىن خۇش خەۋەر تارقىلىشقا باشلىغان، يەنە بۇ ھامىلدار ئايال ساغلام ئوغۇل بوۋاق يەڭگىگەن بولۇپ، پويىزمۇ جېڭجۇ ۋوگزالىغا كىرىپ كەلگەن، ۋوگزال سۇپىسىدا ساقلاپ تۇرغان جېڭجۇ 120 جىددىي قۇتقۇزۇش مەركىزىنىڭ دوختۇر-سېستىرالىرى دەرھال تۇغۇتلۇق ئايال بىلەن يېڭى تۇغۇلغان بوۋاقنى پويىزدىن چۈشۈرۈپ دوختۇرخانىغا ئېلىپ كەتكەن.

        پويىز باشلىقى-سۇڭ شىيەننەننىڭ تونۇشتۇرۇشىچە، ھامىلدار ئايال بۇ يىل 30 ياشقا كىرگەن بولۇپ، پويىزغا چىققان چاغدا ئالغان بېلىتى ئۈستۈنكى كارۋاتنىڭ بېلىتى ئىكەن، پويىز خادىملىرى ئۇنىڭ ھەركەت قىلىشىنىڭ قولايسىزلىقىنى نەزەردە تۇتۇپ ئۇنىڭ ئورنىنى ئاستىنقى كارۋاتلىق ئورۇنغا تەڭشەپ بەرگەن، لېكىن پويىز ئۈچ سائەت ماڭا-ماڭمايلا بۇ ئايالنىڭ قورسىقى قاتتىق ئاغرىشقا باشلىغان، بەختكە يارىشا، پويىزدا جىددىي قۇتقۇزۇش دورا ساندۇقى بار بولۇپ، تەلىيىگە يارىشا، يەنە پويىزدىن دوختۇرلارمۇ تېپىلغان، شۇنىڭ بىلەن بۇ ئايال ساق-سالامەت ھالدا يەڭگىۋالغان.