شىنجاڭ تورى خەۋىرى: ئۈرۈمچى شەھەرلىك مائارىپ ئىدارىسى 11-ماي 2015-يىللىق تولۇق ئوتتۇرىغا ئۆرلەپ ئوقۇش ئىمتىھانىنىڭ ۋاقتىنى بېكىتتى: ئىمتىھان 24-ئىيۇندىن 26-ئىيۇنغىچە ئېلىنىدۇ، جەمئي 28 مىڭ 574 ئوقۇغۇچى قاتنىشىدۇ.
ئىگىلىنىشىچە، ئۈرۈمچى شەھىرى يەنىلا شىنجاڭدىكى ئۆز ئالدىغا سوئال چىقىرالايدىغان بىردىنبىر رايون بولۇپ، ئىمتىھان ۋاقتى، ئىمتىھان سوئالى ۋە تەكشۈرۈپ تۈزىتىش قاتارلىق خىزمەتلەرنى مۇستەقىل بېكىتىپ ئېلىپ بارالايدىكەن.
2015-يىللىق تولۇق ئوتتۇرىغا ئۆرلەپ ئوقۇش ئىمتىھانىنىڭ ئومۇمىي نومۇرى 800 بولۇپ، ئەدەبىيات، ماتېماتىكا، ئىنگلىز تىلى، فىزىكا-خىمىيە(بىرلەشمە ئىمتىھان قەغىزى)، ئىدىيە-ئەخلاق ۋە تارىخ (بىرلەشمە ئىمتىھان قەغىزى) قاتارلىق پەنلەرنىڭ نومۇرى ئوتتۇرىچە 150 بولىدۇ، ئەدەبىيات، ئىدىيە-ئەخلاق ۋە تارىخ(بىرلەشمە ئىمتىھان قەغىزى) قاتارلىق پەنلەرنىڭ ئىمتىھان ۋاقتى 150 مىنۇت، باشقا پەنلەرنىڭ ئىمتىھان ۋاقتى 120 مىنۇت بولىدۇ. بۇنىڭدىن باشقا تەنتەربىيە ئىمتىھانىنىڭ نومۇرى 50 بولىدۇ. قىيىن سوئال، ئوتتۇراھال سوئال ۋە ئاسان سوئاللارنىڭ نىسبىتى 2:3:5 بولىدۇ، ئاسان سوئاللارنىڭ قىيىنلىق كوئېففىتسېنتى 0.7 دىن يۇقىرى، ئوتتۇراھال سوئاللارنىڭ قىيىنلىق كوئېففىتسېنتى 0.4 دىن 0.7 غىچە، قىيىن سوئاللارنىڭ قىيىنلىق كوئېففىتسېنتى 0.2 دىن 0.4 غىچە بولىدۇ، كوئېففىتسېنت قانچە يۇقىرى بولسا قىيىنلىق دەرىجىىسى شۇنچە تۆۋەن بولىدۇ.