كەتمەن ساداسى

版权声明：转载时请以超链接形式标明文章原始出处和作者信息及本声明
logs/92814240.html

ئەخمەتجان ئوسمان شېئىرلىرى

بۈيۈك لەڭگەر

ئەخمەتجان ئوسمان


گۈل ئىكەن بېشىمغا سانجىلغان تەقدىر
كۆزۈمدىن ئاققىنى ئۆرتەنگەن تىكەن
چاقىردى مېنى: ئەي، ئازاب تۇغقان شىر!
كېسىلگەن بېشىمنى كوتەرگەن لىگەن

ئۇرۇلدى تېنىمغا نۇر ئويغانغان دەم
قۇياش دەپ ئاتالغان شۇ بۈيۈك لەڭگەر
قېنىمغا ئەلمىساق بولغان ئىدى جەم
بىلمىدىم، يوقالدى مەندە ئەڭگۈشتەر

ئۈنۈمگە تەڭرىقۇت چۆككەندىن بۇيان
كۆكسۈمدە گۈپۈلدەر پارلىغان زۇلمەت
ماڭلايدا ساداقتەك سۇنمايدۇ گۇمان
گۈللەردىن تۇماندەك ئۆرلەيدۇ ھەسرەت

ئاھ! دېسەم، گېلىمدا يىقىلار ئاھۇ
ياق! دېسەم، چېقىلار قەلبىمدە ياقۇت
يېشىمدا نەملەنگەن قايسى ئىلاھ ئۇ؟
بۇ قۇتلۇق زېمىننى ئەيلىگەن تاۋۇت؟
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭


ھارۋىكەش ناخشىسى

ئەخمەتجان ئوسمان


ۋەتەنسىز تەندە جان بولماس،
تىرىكلەر قەيتىدە سەن يوق.
ۋەتەنسىز گۆردە شان بولماس،
قىيامەت پەيتىدە سەن يوق.

تىلى قۇلدا زۇۋان بولماس،
دىلى قۇلدا ئىمان بولماس.
ئىمانلىق بەندە قۇل بولماس،
ئازادلىق قەستىدە سەن يوق.

بېشىڭدا يا ساۋاق تۇرماس،
پېشىڭدا يا پىچاق تۇرماس.
يامانغا باقى دۇنيا بۇ،
ياۋاشلىق دەستىدە سەن يوق.

تىلىڭنىڭ ئۇچىدا راھمان،
دىلىڭنىڭ شېخىدا شەيتان.
يورۇقلۇقتا پۈتۈن ئەللەر،
زاۋاللىق دەشتىدە سەن يوق.
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭