كەتمەن ساداسى

版权声明：转载时请以超链接形式标明文章原始出处和作者信息及本声明
logs/83376517.html

مەتبۇئاتلاردا ئىلان قىلىنغان شېئىرلىرىم(6)


ساداقەتجان ھاجى


دانا بولماق قېيىن ھاياتتا

ئاسان دىسەڭ ئاسان ئەمەستۇر،
قېيىن دىسەڭ ھەممىدىن قېيىن.
ئەرزان دىسەڭ ئەرزان ئەمەستۇر،
قىممەت دىسەڭ پەقەت بىر تىيىن.
كۆكتە تۇرۇپ يەرنى پەس دىسەڭ،
يەرگە چۈشۈپ قارىساڭ ئېگىز.
ئىچمەي تۇرۇپ بولدۇم مەس دىسەڭ،
بىر قەدەھ مەي بەلكىم بىر دېڭىز.
تاتلىق دىسەڭ تاتلىقمۇ ئەمەس،
ئاچچىق دىسەڭ چاپلىشار لېۋىڭ.
ياخشى دىسەڭ ياخشى بولماق تەس،
بەلكىم كۆپتۇر سېنىڭ ئەيىپىڭ...
شادلىقىمىز ئەمەستۇر پۈتۈن،
دەردىمىز بار ئازراق شۇ تاپتا.
نادانلارنى قۇتقۇزۇش ئۈچۈن،
دانا بولماق قېيىن ھاياتتا.
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
(1989-يىلى 24-سىنتەبىر. «قەشقەر گېزىتى» 1994-يىل 3-سىنتەبېر)
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭


سەھەر لىرىكىسى

ئۇپۇق ياندى شەپەق ئوتىدا،
قىزغۇچ رەڭدە چاقنىدى شەرق.
ئاپتاپ سۆيدى زىمىن لېۋىگە،
نۇر ۋەسلىگە كائىنات غەرق.
زەڭگەر كۆكتە ئوينار شاماللار.
چوققىلاردا قاردەك ئاق بۇلۇت.
شەبنەم كۈلگەن يېشىلزار تاللار
تۇيغۇلارغا بېغىشلايدۇ قۇت.
ئاسمان ئارا قۇشلار پەر قېقىپ
دەريالارغا تاشلايدۇ قوشاق.
ئىچ-ئىچىدىن بۇلدۇقلاپ ئېقىپ
يەر ئىشقىنى كۈيلەيدۇ بۇلاق.
سەرخۇش بولۇپ رەڭمۇ رەڭ گۈللەر
جىلۋە قىلار يوپۇرماق ئارا.
سۆگەتلەرگە ئورالغان كۆللەر
چاقنار يېشىل ياقۇتتەك گويا.
زەر قۇياشقا تەلپۈنۈپ شائىر
تاڭ ئىشقىدىن ئىزدەيدۇ ئىلھام.
بولۇپ كۆكتە گۈزەللىك زاھىر
كۆڭۈللەرگە بېرىدۇ ئارام ...
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
(1989-يىلى 6-ئۆكتەبىر. «قەشقەر ئەدەبىياتى» 1996-يىللىق 2-سان)
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭


ئالتۇن قۇياش، كۈمۈشرەڭ ئاپتاپ

كۆكتە قۇياش، زىمىندا ئاپتاپ
تەبىئەتكە تاراتماقتا نۇر.
نۇردىن ئېلىپ قانىتىغا كۈچ
قۇشلار قانات قاقماقتا مەغرۇر.
ئويناق سۇلار شىرىلداپ ئېقىپ
تۇيغۇلارغا بەرمەكتە ھوزۇر.
زىمىندىن سۇ، كۆكتىن نۇر ئېمىپ
ئېچىلماقتا گۈللەرمۇ پۇزۇر.
سالقىن شامال ئۇچماقتا لەرزان
ئەركىلىتىپ يوپۇرماقلارنى.
ناخشا ئېيتىپ ئەمگەكچى ئىنسان
ئويغاتماقتا ئوي بۇلاقلارنى.
يېشىل ساھىل، يېشىل تەبىئەت،
يېشىل دولقۇن چاچراتماقتا زەر.
ئالتۇن قۇياش كۈمۈشرەڭ ئاپتاپ
قۇچىقىدا ياشنىماقتا يەر!
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
(1989-يىلى 28-ئۆكتەبىر. «شىنجاڭ گېزىتى» 1997-يىل 20-دىكابىر)
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭


سۆيگۈ قەسىمى

سۆيدۈم سېنى، سۆيدۈڭ سەن مېنى.
ۋىسال قۇچتۇق بەخت ئىچىدە.
خىيال قىلدۇق گۈزەل ئەتىنى
ئايغا قاراپ ئايدىڭ كېچىدە.
بىلىنمىدى ھاۋامۇ سوغۇق،
يۈرىكىمىز تۇرغاچ لاۋۇلداپ.
مۇھەببەتتىن ئالدۇق شىرىن زوق،
قەلبىمىزدە يۇلتۇزلار چاقناپ.
ئىشەنچ قىلىپ ئەقىدىمىزگە
يىراقلارغا تاشلىدۇق نەزەر.
گۈزەل بولۇپ تۇيۇلدى بىزگە
ئايدىڭدىكى ھايات شۇ قەدەر.
ئاھ، نىگارىم ئويلىدىڭمۇ سەن؟
سۆيگۈمىزگە تەشنادۇر ۋەتەن!
بىز ياشايلى ۋەتەننى سۆيۈپ،
ئاڭا پىدا بولسۇن جانۇ-تەن.
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
(1989-يىل 17-نويابىر. «قەشقەر گېزىتى» 1993-يىل 23-ئۆكتەبىر)
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭


تاڭ ئىشقى

تاڭ يورۇپ كۈلدى ئۇپۇق چاقناپ شەپەق.
پارلىدى نۇر ئىلكىدە قىزغۇچ قىيا.
ئۆرلىدى كۆككە گۈزەل ئالتۇن قۇياش
يەر-زېمىن، گۈل-غۇنچىغا پۈركۈپ زىيا.
قاقتى پەر قۇشلار ئۇچۇپ ئۆرلەپ ئېگىز،
قالدى پەستە ئاق بۇلۇت، زەڭگەر ساما.
شوخ شامال چىرماشتى گۈللەر بەرگىگە،
قاپلىدى ئالەمنى خۇشبۇي ساپ ھاۋا.
بۇ گۈزەل تاڭ ئىشقىدىن ئىلھام ئېلىپ
چىقتى شائىر قەلبىدىن ئوتلۇق ناۋا.
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
(1989-يىل 18-دىكابىر. «قەشقەر گېزىتى» 1994-يىل 9-ئاپرىل)
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭


قار لىرىكىسى

(1)
كۆككە مەپتۇن بولۇپ باققان چاغدا جىم،
چۈشەر ئۈستىمىزگە قارلار لەپىلدەپ.
تېخى قار مىھرىنى سەزمىگەن ھېچكىم،
پەقەت بىز كېلىمىز قارلارغا دەسسەپ.
ئاپئاق چېچەك كەبى قار ئۇچقۇنلىرى
قاخشال دەرەخلەرگە سېلىشىپ گىرە
ياسار شۇدەم بىزنىڭ كۆز ئالدىمىزدا
باھارنىڭ ھۆسنىدەك گۈزەل مەنزىرە …
ئىسسىق تىنىقلاردا ئىرىپ شۇررىدە
قارلار كىرپىكلەرگە كەتمەكتە سىڭىپ.
ئاڭلاپ شەپىمىزنى قۇچقاچ پۇررىدە
ئۇچۇپ كەتتىق بىزگە قارلارنى چېچىپ …

(2)
ھەيھات، قىشنىڭ ئاچچىق شامىلى سوقۇپ
قارلار توختىماستىن چۈشەر ئۇچقۇنداپ.
بىزمۇ قاخشال شاخقا يۆلىنىپ تۇرۇپ
توڭغان قولىمىزنى سۆيۈشتۇق ھورداپ.
بىراق قەلبىمىزدە يانغان مۇھەببەت
سوغۇق شاماللارغا قىلمايدۇ پەرۋا.
قارلار تەبىئەتكە سىزغاچقا سۈرەت
باھار كەبى گۈزەل كۆرۈنەر دۇنيا.
كۆكتىن لەيلەپ چۈشۈپ شاخلارغا قونۇپ
قارلار تەبىئەتكە سىزماقتا سۈرەت.
يارىم گۈزەللىككە بىزمۇ جۆر بولۇپ
قاردەك پاكلىق بىلەن ياشايلى ئەبەت!
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
(1989-يىل 12-ئاي. «قەشقەر گېزىتى» 1990-يىل 10-فىۋرال)
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭


تىلسىمات دۇنياسى

كۆزلىرىڭ گوياكى تىلسىمات بوشلۇق،
بىر تامچە ياش ئۇندا تۇرىدۇ لەيلەپ.
بىپەرۋا تەبەسسۇم، ئىزتىراپ، خۇشلۇق
دۇنيانى جەلپ ئېتەر ئۈنسىز سېھىرلەپ.
 
كىرپىكلەر سۆيۈشۈپ ۋىسال قۇچقان دەم،
سېھىرلىك شەبنەمدەك سىرغىپ چۈشەر ياش.
گويا تاڭ سەھەردە چاقنىغان شەبنەم
مىسالى مەڭزىڭدە پارلايدۇ قۇياش.
 
ئۆكسىگەن تىنىقلار ئۆرلەپ كۆككە سۇس،
سۈپ-سۈزۈك شەبنەمنى مۇزلىتار پىنھان.
خۇشاللىق ۋە ئازاب، ئۈمىد ھەم ئەپسۇس...
تىمتاس بىر سۈكۈتتە، سۈكۈتتە ھەرئان.
 
ئۆچكەن كۈل توزۇغان ئوچاقتەك گويا،
ھارغىن جۈپ كۆزۈڭدە چاقنار كۆز يېشى.
چانىقىڭ مىسالى بىپەرۋا دۇنيا.
مۈمكىنغۇ ئاخىرى كۆزسىز قېلىشى...

نە ئۇپۇق، نە شەپەق، نە پارلاق قۇياش،
نە سېنىڭ كۆزۈڭگە بەرسۇن قايتا نۇر؟
تىكەندەك كىرپىكىڭ يەنىلا يۇۋاش.
سەندە يوق چۇڭقۇر دەرد، سەندە يوق غۇرۇر...
 
ۋەلېكىن كۆزلىرىڭ يەنە تىلسىمات.
بەزىدە كۆرىمەن ئاچچىق ئەلەمنى.
ئۇنتۇلغان چۈش كەبى شۇ قەدەر سەن شاد.
تۇرار ھەم شادلىقىڭ يوشۇرۇپ غەمنى.
 
مۇزلىتىپ بىر تامچە ياشنى بوشلۇقتا،
ئۆكسىدى يۈرىكىڭ دولقۇنلاپ ئەنسىز.
پارلىتىپ قۇياشنى كۆزۈڭ خۇشلۇقتا،
قالدۇردى بىر تامچە ياشنى ۋەتەنسىز...
 
بىلمىدىم نە قۇياش، نە سۈزۈك شەبنەم
يوشۇرۇن تەبەسسۇم قىلدى يۈزۈڭدە؟
ئۈمىدسىز بىر ۋىجدان، يا ئۈمىدۋار غەم،
ئىككىدىن بىرسى بار بەلكىم كۆزۈڭدە...
 
سېغىنىش ئازابمۇ؟ ئۇنتۇش ئازابمۇ؟
كۆز يېشى ئۇلۇغمۇ؟ قۇياش ئۇلۇغمۇ؟
جىملىقىڭ سۈكۈتمۇ؟ يا ئىزتىراپمۇ؟
بىلمىدىم، كۆزۈڭ كور... قەلبىڭ قۇرۇقمۇ؟؟
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
(1990-يىل 10-فىۋرال. «تارىم» 1990-يىللىق 9-سان)
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭


يۈرىكىم

ۋەزنى تاغدىن يىنىك ئەمەستۇر،
قارىماققا مۇشتەك يۈرىكىم.
ئۇچار چەكسىز كۆكنى باغاشلاپ،
كىچىككىنە قۇشتەك يۈرىكىم.
نىچۈن دەمسەن؟
چۈنكى يۈرەكتە
ئانا ۋەتەن مۇھەببىتى بار!
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
(1990-يىل. «قەشقەر پېداگوگىكا ئىنىستىتوتى گېزىتى» 1990-يىل 25-ئاپرىل)
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭


تۈمەن دەرياسىغا بېغىشلىما

بويۇڭدا تۇرىمەن خىيالغا پېتىپ،
مىڭ يىللىق تارىخنى ئېسىمغا ئېلىپ.
كىچىك بىر ئېقىندەك تۇرساڭمۇ لېكىن
كەلدىڭ چوڭ دەريادەك ئۇخلىماي ئېقىپ.

تارىخنىڭ شاھىدى-مەھمۇد كاشغەرىي
قويۇپتۇ نامىڭنى كىتابقا پۈتۈپ.
بۈگۈنمۇ قۇرىماي ئېقىپ تۇرۇپسەن
ئارىدىن كۆپ ئەسىر كەتسىمۇ ئۆتۈپ.
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
(1990-يىل 6-فىۋرال. «قەشقەر گېزىتى» 1990-يىل 31-مارت)
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭


باھار زوقى

قۇياش ئانا يەرگە چاچتى ئىللىق نۇر.
كەلدى نورۇز ئېيى باھارنى باشلاپ.
نۇرلار ناۋاسىدىن ئېرىگەن قارلار
ئاقتى مىھرى بىلەن يەرنى باغاشلاپ.
ئىللىق شامال سۆيدى مەڭزىمگە تاتلىق.
باھار زوقى بەردى دىلىمغا شاتلىق.
مەنمۇ شېئىرىمنى چېچىپ ئېتىزغا،
يەرنىڭ ۋۇجۇدىغا بەردىم ھاياتلىق.
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
(1990-يىل 3-ئاي. «قەشقەر گېزىتى» 1990-يىل 31-مارت)
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭


كۆكلەم كۈيى

ئۇچتى ئويناپ شوخ شامال كۆكلەم ئارا.
قۇچتى باغرىمنى شۇدەم ئىللىق ھاۋا.
تۆكتى تال-تال نۇر زىمىنغا زەر قۇياش،
چاقنىدى شەبنەمدە ئالتۇنرەڭ زىيا.
ئاقتى سۇلار شارقىراپ، كۈي ياڭرىتىپ،
ئىرىگەچ قار نۇرلىنىپ ئىگىز قىيا.
جىلۋە قىلدى شاختا رەڭدار ئۇز چېچەك،
ياپ-يېشىل ياپراق چىقاردى گۈل-گىياھ.
ئوينىشىپ كۆك قەھرىدە قۇشلار خۇشال،
نەۋباھار شەنىگە ياڭراتتى ناۋا.
شاد-خۇرام كۈي ئەۋجىدە ياشناپ ھايات،
كۆيدى يالقۇنلاپ يۈرەكتە ئوت-لاۋا.
كۈيلىدىم ئىشقىڭنى كۆكلەم نەزمىدە
مەن بىلىپ قەدرىڭنى شۇدەم بىباھا.
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
(1990-يىل. «قەشقەر گېزىتى» 1994-يىل 9-ئاپرىل)
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭


بەختسىزلىك

ئىسسىق ياش ئەگىيدۇ كۆزۈمدىن شۇدەم،
كىرپىكىم تىترەيدۇ دولقۇن مەۋجىدە.
دۇتتارنىڭ زەر تارى دەردلىك باغرىمدا
ئۈزۈلدى ئازابلىق ناخشا ئەۋجىدە.

سۈكۈنات ئىچىدە خىيالغا پاتتىم،
ئويلىرىم شامالدا ئۆتتى يەلپۈنۈپ.
سۆيۈشتىن مەن قاچان بەختىمنى تاپتىم؟
ئۆتەمدۇ ھاياتىم ساڭا تەلپۈنۈپ؟
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
(1990-يىل 25-مارت. «قۇمۇل گېزىتى» 1997-يىل 7-ئاينىڭ 12-كۈنى)
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭


روھىم ئەل قەلبىدە

«ئۆزۈم ھەرجايدا مەن، كۆڭلۈم سەندەدۇر»
نۇرلۇق ۋىسالىڭغا ئىشقىم بەندەدۇر.
ماڭار يولۇم گەرچە بولمىش تىكەنلىك،
خىيال بۇلبۇللىرىم گۈل-چىمەندەدۇر.
ئۈمىد-ئىشەنچىمنى باغلىدىم ساڭا،
سېنىڭ جانىڭغا ھەم جان پەيۋەندەدۇر.
مۇراد-مەقسىدىمگە يېتەرمەن بىر كۈن
قۇچۈپ ۋىسالىڭنى جانىم تەندەدۇر.
مەگەر ئادا بولسام ۋەسلىڭ  يولىدا،
روھىم ئەل قەلبىدە-ئەڭ بەلەندەدۇر.
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
(1990-يىل 2-نويابىر. «قەشقەر ئەدەبىياتى» 1997-يىللىق 5-سان)
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭


كۆزلىرىڭ

كىرپىك بوستانلىرى ئارا كۆزلىرىڭ،
بېقىپ جىلۋە بىرلە قارا كۆزلىرىڭ،
چېچىپ مۇھەببەتنىڭ سىرلىق نۇرىنى،
قىلدى يۈرىكىمنى يارا كۆزلىرىڭ.
خىيال دەرياسىغا ئەيلىدى غەرق
بۇزۇپ ئارامىمنى بالا كۆزلىرىڭ.
ۋەسلىڭگە زار بولۇپ يۈردۈم كوچاڭدا،
سالدى جېنىمغا كۆپ جاپا كۆزلىرىڭ.
كىمگە ئېيتاي يۈرەك دەردىمنى يارەي؟
ئەگەر ئەيلىمىسە ۋاپا كۆزلىرىڭ.
يورۇتسۇن ئىشقى بىدارنىڭ يولىنى،
قىلىپ ئۆز بۇرچىنى ئادا كۆزلىرىڭ.
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
(1991-يىل 5-ئاۋغۇست. «قەشقەر ئەدەبىياتى» 1997-يىللىق 5-سان)
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭


مەشرەب يولى

بابا رەھىم مەشرەب مەردانە
بىر جانىنى قىلىپ مىڭ دانە
مەي ۋەسلىدە كېزىپ مەيخانە
بۇ كوچىدىن ئۆتكەن بىر چاغلار.
 
بۇلبۇل كەبى نالەلەر قىلىپ
باغرىنى قان لالەلەر قىلىپ
يار ۋەسلىدە چارەلەر قىلىپ
بۇ كوچىدىن ئۆتكەن بىر چاغلار.
 
جان رىشتىنى سازغا تار قىلىپ
غەزەللەرنى دىلغا يار قىلىپ
ئەلنى ھەقتىن ئۈمىدۋار قىلىپ
بۇ كوچىدىن ئۆتكەن بىر چاغلار.
 
«ئەنەلھەق» دەپ نىدالار قىلىپ
ھەق ئۈچۈن جان پىدالار قىلىپ
جاھالەتنىڭ باغرىنى تىلىپ
بۇ كوچىدىن ئۆتكەن بىر چاغلار.
 
  كۈي ياڭرىتىپ ئۇيغۇر تىلىدا،
نۇر چاقنىتىپ ئۇيغۇر دىلىدا،
مەشرەپ ياشاپ ئۇيغۇر ئېلىدا،
بۇ كوچىدىن ئۆتكەن بىر چاغلار.
 
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
(1991-يىل. «ئىشچىلار ۋاقىت گېزىتى» 2001-يىل 16-يانۋار)

٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
(بۇ شېئىرلىرىمنى كۆچۈرۈپ باشقا توربىكەتلەرگە يوللىسىڭىز بولمايدۇ)
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭