دومودېدوۋو ئايرودرومىنىڭ سىرتقى كۆرۈنۈشى
رۇسىيە تەھقىقلەش كومىتېتىنىڭ باياناتچىسى ۋلادىمىر مالگىننىڭ 29–يانۋار ئېيتىشىچە ، رازۋېتكا خادىملىرى پايتەخت موسكىۋادىكى دومودېدوۋو ئايرودرومىنى پارتلىتىش دېلوسىنى سادىر قىلغۇچىنىڭ سالاھىيىتىنى ئېنىقلىغان بولۇپ ، دېلو سادىر قىلغۇچى شىمالىي كاۋكاز رايونىدىن كەلگەن 20 ياشلىق ئەر ئىكەن .
مالگىن ئاخبارات ۋاستىلىرىنى دېلو سادىر قىلغۇچىغا مۇناسىۋەتلىك تېخىمۇ كۆپ تەپسىلات بىلەن تەمىنلىمىگەن .
دومودېدوۋو ئايرودرومىدا 24–يانۋار پارتلىتىپ ھۇجۇم قىلىش ۋەقەسى يۈز بەرگەن بولۇپ ، دېلو سادىر قىلغۇچى خەلقئارا نۆۋەتچى ئايروپىلاننىڭ كۈتۈش زالىغا كېلىپ ، بومبىنى پارتلاتقان . پارتلاشتا ، 35 ئادەم قازا قىلغان ، 100 دىن ئارتۇق ئادەم يارىلانغان .
24–يانۋار ، قۇتقۇزۇش خادىملىرى پارتلاشتا يارىلانغانلارنى قۇتقۇزماقتا
رۇسىيە تەھقىقلەش كومىتېتىنىڭ قارىشىچە ، بۇ قېتىمقى تېررورلۇق ھۇجۇم قىلىش ۋەقەسىنىڭ مۇھىم نىشانى چەت ئەللىكلەر ئىكەن . مالگىن: تەھلىللەرگە قارىغاندا تېررورچىلار ھۇجۇمنى چەت ئەللىكلەرگە قاراتقان ، دېدى .
رۇسىيە خەلقئارا ئىنتېرفاكىس ئاگېنتلىقىنىڭ خەۋەر قىلىشىچە ، نۆۋەتتە ، ساقچى تەرەپ پارتلىتىش دېلوسىدىكى مۇھىم جىنايەت گۇماندارىنى ئىزدەۋاتقان بولۇپ ، ھېچقانداق تەشكىلات بۇ ۋەقەگە مەسئۇل بولىدىغانلىقىنى ئېيتمىغان .
رۇسىيە ‹‹ سودىگەرلەر گېزىتى››نىڭ ساقچى تەرەپنىڭ 27–يانۋاردىكى سۆزىنى نەقىل كەلتۈرۈپ خەۋەر قىلىشىچە ، ۋىتال رازدوبۇجىكې ئىسىملىك بىر ئەر بۇ قېتىمقى ۋەقەنى سادىر قىلغۇچى بولۇپ ، ئۇ شىمالىي كاۋكاز رايونىدىكى ھۆكۈمەتكە قارشى قوراللىق تەشكىلات ‹‹ نوغاي ئىسلام دىن تارقتىىش جەمئىيىتى›› نىڭ ئەزاسى ئىكەن .
