شىنخۇا تورى ، موسكىۋا 27 ــ دېكابىر تېلېگراممىسى : رۇسىيە زابايقال چېگرا رايونلۇق ھۆكۈمەتنىڭ ئېيتىشىچە ، زابايقال چېگرا رايونىدىكى بىر نېفىت ئايرىش زاۋۇتىدا 27 ــ دېكابىر سەھەر پارتلاش يۈز بېرىپ ، بەش جۇڭگولۇق ئىشچى ئىز ــ دېرەكسىز يوقاپ كەتكەن .
زابايقال چېگرا رايونلۇق ھۆكۈمەتنىڭ خەۋىرىگە قارىغاندا ، زابايقال چېگرا رايونىنىڭ داغۇرىئاز كەنتىگە جايلاشقان بىر نېفىت ئايرىش زاۋۇتىنىڭ ماي زاپىسى تۇرۇبىسى شۇ يەر ۋاقتى 27 ــ دېكابىر سەھەردە پارتلىغان . پارتلاش يۈز بەرگەندە 18 نەپەرجۇڭگولۇق ئىشچى نەق مەيداندا بار بولۇپ ، نۆۋەتتە بەش ئىشچىنىڭ تا ھازىرغىچە ئىز ــ دېرىكى بولمىغان . ئوت ئۆچۈرۈش خادىملىرى نەق مەيداندىن بىر جەسەتنى تاپقان بولۇپ ، بۇ جەسەتنىڭ سالاھىيىتى ئېنىقلىنىۋېتىپتۇ .
ۋەقە يۈز بەرگەندىن كېيىن ، شۇ يەردىكى ئۆت ئۆچۈرۈش ۋە قۇتقۇزۇش خادىملىرى دەرھال نەق مەيدانغا يېتىپ بارغان . پارتلاشتا ئەتراپتىكى ئاھالىلەرنىڭ ئۆيلىرىنىڭ ئەينەكلىرى چېقىلىپ كەتكەن ، بىراق ئاھالىلەرنىڭ يارىلىنىش ، ئۆلۈش ئەھۋالى كۆرۈلمىگەن .
دەسلەپكى تەكشۈرۈش نەتىجىسىدىن مەلۇم بولۇشىچە ، مەلۇم بىرەيلەننىڭ ئوت ئۆچۈرۈش قائىدىسىگە خىلاپ ھالدا ئوچۇق يالقۇننى ئىشلىتىشىنىڭ بۇ قېتىمقى پارتلاش ۋەقەسىنى كەلتۈرۈپ چىقىرىش مۇمكىنچىلىكى بار ئىكەن .
