چىلى سان خوسې مىس كانىدا ، چىلى زۇڭتۇڭى پىنيېرا (ئوڭدىكى كىشى) تۇنجى بولۇپ كان ئاستىدىن يەر يۈزىگە قۇتقۇزۇپ چىقىلغان كان ئىشچىسى فلورېنسىئو ئاۋالوس بىلەن قۇچاقلىشىپ كۆرۈشمەكتە
شىنخۇا تورى ، چىلى سان خوسې مىس كانى 13–ئۆكتەبىر تېلېگراممىسى : شۇ يەر ۋاقتى 13–ئۆكتەبىر سەھەردە ، چىلى سان خوسې مىس كانىدىكى كۆمۈركان ئىشچىلىرىنى قۇتقۇزۇش خىزمىتى باشلىنىپ بەش سائەتتىن كېيىن ، كان ئاستىغا قاپسىلىپ قالغان ئەڭ ئاخىرقى بەش نەپەر كان ئىشچىسى قايتا يۇرۇقلۇققا ئېرىشتى .
شۇ جاي ۋاقتى 13–ئۆكتەبىر سائەت 4 دىن 10 مىنۇت(بېيجىڭ ۋاقتى سائەت 15 دىن 10 مىنۇت) ئۆتكەندە ، كانغا قاپسىلىپ قالغان 33 نەپەر كان ئىشچىسى ئىچىدىكى يېشى ئەڭ كىچىك بولغان ، 19 ياشلىق گىمى سانچېز مۇۋەپپەقىيەتلىك قۇتقۇزۇپ چىقىلدى . كان ئىشچىسى ئائىلىسىدە تۇغۇلغان سانچېز قۇتۇلۇپ چىققاندىن كېيىن مۇنداق دېدې : مەن قۇدۇق ئاستىدا تۇرغان بۇ كۈنلەردە ، تۇرمۇشىمنى ئۆزگەرتىشىم كېرەكمۇ -يوق؟ دېگەن مەسىلە ئۈستىدە ئىزچىل ئويلاندىم .
شۇ جاي ۋاقتى 13-ئۆكتەبىر سائەت 0 دىن 12 مىنۇت (بېيجىڭ ۋاقتى سائەت 11 دىن 12 مىنۇت) ئۆتكەندە ، قۇتقۇزۇش خادىملىرى 31 ياشلىق كان ئىشچىسى فلورېنسىئو ئاۋالوسنى مۇۋەپپەقىيەتلىك قۇتقۇزۇپ چىققان . ئارقىدىن ، مارىئۇ سېپۇلۋېدا ، خۇئان ئىلىئانس ۋە بولىۋىيەلىك كان ئىشچىسى كارلوس مامانى ئارقا-ئارقىدىن كان ئاستىدىن قۇتۇلدۇرۇپ چىقىلغان . كان ئاستىغا قاپسىلىپ قالغان كان ئىشچىلىرى قايتىدىن يۇرۇقلۇققا ئېرىشكەندىن كېيىن ، خۇشال ھالدا ئائىلىسىدىكىلەر ۋە قۇتقۇزۇش خادىملىرى بىلەن قۇچاقلىشىپ كۆرۈشكەن بولۇپ ، قارىماققا ئۇلارنىڭ روھىي ھالىتى ۋە سالامەتلىك ئەھۋالى ياخشى ئىدى . مارىئۇ سېپۇلۋېدا 700 مېتىر چوڭقۇرلۇقتىكى قۇدۇق ئاستىدىن بىر ئاز تاش پارچىلىرىنى يەر يۈزىگە ئېلىپ چىقىپ ، بۇنى ھالاكەت گىردابىدىن قۇتۇلۇش سەرگۈزەشتىسىنىڭ ‹‹ خاتىرە بۇيۇمى›› قىلغان .
13–ئۆكتەبىر كەچ ، قۇتقۇزۇش خادىملىرى سان خوسې مىس كانىغا قاپسىلىپ قالغان ئەڭ ئاخىرقى بىر نەپەر كان ئىشچىسى لۇيىس ئۇرسۇيانى مۇۋەپپەقىيەتلىك ھالدا يەر يۈزىگە قۇتقۇزۇپ چىققان . بۇنىڭ بىلەن ، مىس كانىغا قاپسىلىپ قالغان 33 نەپەر كان ئىشچىسىنىڭ ھەممىسى ئوڭۇشلۇق ھالدا يەر يۈزىگە قۇتقۇزۇپ چىقىلىپ ، نەچچە ئايغا سوزۇلغان قۇتقۇزۇش خىزمىتى تاماملانغان .
بۇ يىل 5–ئاۋغۇست ، چىلىنىڭ شىمالىدىكى سان خوسې مىس كانىدا كان گۈمۈرۈلۈپ چۈشۈش ۋەقەسى يۈز بېرىپ ، 33 نەپەر كان ئىشچىسى 700 مېتىر چوڭقۇرلۇقتىكى قۇدۇق ئاستىغا قاپسىلىپ قالغان . ئۇزۇنغا سوزۇلغان تەييارلىق خىزمىتىدىن كېيىن ، قۇتقۇزۇش خادىملىرى ئاخىرى قۇتقۇزۇش قانىلىنى قېزىپ چىقىپ ، شۇ جاي ۋاقتى 12-ئۆكتەبىر كەچتىن باشلاپ ئەڭ ئاخىرقى باسقۇچلۇق قۇتقۇزۇش خىزمىتىنى قانات يايدۇرغان .
