ئامېرىكا مەكتەپلىرىدە ئىرقى ئايرىمىچىلىق  ئېغىرلاشماقتا
    [رېيتېر ئا‎گېنتلىقى، 10-يانۋار، ئاتلانتا تېلېگراممىسى] بۈگۈن ئېلان قىلىنغان دوكلاتتا مۇنداق دېيىلدى: ئامېرىكىدىكى نېگىرلار ۋە لاتىن ئامېرىكىسىلىقلارنىڭ ئەۋلادىدىن بولغان ئوقۇغۇچىلار ئوقۇۋاتقان مەكتەپلەردە ئىرقىي ئايرىمىچىلىق كۈنسايىن ئېغىرلاشماقتا. بۇ ھال جامائەتنىڭ ئوباما ھاكىمىيەت يۈرگۈزگەن مەزگىلدە ئامېرىكىدىكى ئىرقىي مۇناسىۋەت ياخشىلىنىپ كېتىدۇ، دېگەن ئۇمىدىنى ئاجىزلاشتۇرۇۋەتتى.
   كالىفۇرنىيە ئۇنىۋېرسىتېتى مىللىي ھوقۇق تەتقىقات تۈرى گۇرۇپپىسىنىڭ دوكلاتىدا مۇنداق دېيىلدى: نېگىرلار ۋە لاتىن ئامېرىكىسىلىقلار ئەۋلادى بىلەن ئاق تەنلىك ئوقۇغۇچىلارنىڭ ئايرىمىچىلىقى مىللىي ھوقۇق ھەرىكىتىدىن بۇيانقى ئەڭ ئېغىر دەرىجىگە يەتتى، نۇرغۇن مەكتەپلەر قىيىن ئەھۋالدا قالدى.
   مائارىپ تارماقلىرى ئىرقىي بىرلىك ۋە ئۇنى قوغداش تەدبىرلىرىنى  قوللانمىغانلىقتىن، مەملىكەت بويىچە نۇرغۇن رايونلاردا ئاھالىلارنىڭ ئىرقىي ئايرىمىچىلىقى بارغانسېرى ئېغىرلاپ كەتكەن، بۇ ھال تېخىمۇ زور دەرىجىدە مەكتەپلەردىكى ئىرقچىلىقنى پەيدا قىلغان.
   دوكلاتتا مۇنداق دېيىلدى: بۇنداق ۋەزىيەتنىڭ ئاقىۋىتى شۇكى، %39 نېگىر ئوقۇغۇچى ۋە %40 سۈرئەتتە كۆپىيىۋاتقان لاتىن ئامېرىكىسىلىقلار ئەۋلادىدىن بولغان ئۇقۇغۇچىلار بارغانسېرى ئىرقىي بىرلىك بولمىغان مەكتەپلەردە يېتىم  قېلىۋاتىدۇ.
   دوكلاتتا يەنە مۇنداق دېيىلدى: بىر مەكتەپتىكى نېگىر ۋە لاتىن ئامېرىكىسىلىقلار ئەۋلادىدىن بولغان ئوقۇغۇچىلارنىڭ ٪60كە يېقىنى نامرات ياكى نامراتراق ئائىلىنىڭ پەرزەنتلىرى ئىكەن.
    ئىرقىي ئايرىمىچىلىق مەۋجۇت ۋە نامرات ئائىلىلەرنىڭ پەرزەنتلىرى ئوقۇيدىغان مەكتەپ دەپ قارالغان بۇ مەكتەپلەردە ئوقۇتقۇچىلار قوشۇنى ئاجىزراق بولۇپ، ئوقۇغۇچىلىرى تېخىمۇ تۇراقسىز. ئىنگلىزچىنى بىلمەيدىغان ئائىلىلەر پەرزەنتلىرىنىڭ نىسبىتىمۇ يۇقىرى. بۇ ئامىللار ئوقۇغۇچىلار نەتىجىسىنىڭ ياخشى بولۇشىغا پايدىسىز.