تۇنجى نۆۋەتلىك ئابلاجان ئاۋۇت ئايۇپ مۇزىكا مۇكاپاتى تارقىتىلدى

تەڭرىتاغ

	تۇنجى نۆۋەتلىك ئابلاجان ئاۋۇت ئايۇپ مۇزىكا مۇكاپاتى تارقىتىلدى نىجات نىياز ئېھسان     دوستۇم ، بەلكىم سىز مەملىكىتىمىزنىڭ ئىچكىرى ئۆلكىلىرىدە تارقىتىلغان خىلمۇ خىل مۇزىكا مۇكاپاتى ، كىنو مۇكاپاتلىرىنىڭ تارقىتىش مۇراسىملىرىنى تېلېۋىزور ، تورلاردىن كۆرگەن ۋە ياكى ئاڭلىغان بولۇشىڭىز مۇمكىن . بىراق ، ئۇيغۇرلار ئارىسىدا بۇنداق مۇكاپات تارقىتىلغانلىقىنى بىلمەيسىزغۇ دەيمەن ؟ بەلكىم ئويلاپمۇ ھېس قىلالماسلىقىڭىز مۇمكىن . مەن ھازىر سىزنى مانا مۇشۇنداق ئەھمىيەتلىك ، داغدۇغىلىق ئۆتكۈزۈلگەن ، ئۇيغۇرلار ئارىسىدا تۇنجى بولۇپ ئۆتكۈزۈلگەن ئابلاجان ئاۋۇت ئايۇپ مۇزىكا مۇكاپاتىنى تارقىتىش كېچىلىكىدىن بەھرىمان قىلماقچىمەن .     7 - دېكابىر كەچ ، ئۈرۈمچى شەھىرىنىڭ يەنئەن يولىغا جايلاشقان ئۈزۈمزار رېستۇرانى بۆلەكچىلا قىززىپ كەتكەنىدى ، بۈگۈن بۇ يەرگە مىللىتىمىزدىن چىققان داڭلىق ئاكتىيورلار ، رىياسەتچىلەر ، مۇزىكانتلار ، سەنئەتچىلەر ۋە باشقا ھەر ساھە ھەر كەسىپتىن بولغان مېھمانلار ، ئوقۇغۇچىلار ، ئوماق ، سەبىي بالىلار يىغىلغان بولۇپ ، ھەممەيلەن بىرلىكتە ئابلاجان ئاۋۇت ئايۇپنىڭ مۇزىكا مۇكاپاتى كېچىلىكىنىڭ باشلىنىشىغا تەقەززا بولۇپ ئولتۇراتتى .     ئۈرۈمچى ۋاقتى سائەت 6 يېرىملار ئەتراپىدا ، ئابلاجان مۇزىكا مۇكاپاتى كېچىلىكى رەسمىي باشلاندى ، بىزنىڭ سۆيۈملۈك دېكتورلىرىمىز ، ئاكتيورلىرىمىز ، سەنئەتكارلىرىمىز ، ئەدەبىيات - سەنئەت خىزمىتى بىلەن شۇغۇللانغۇچىلار بىر - بىرلەپ سەھنىگە چىقىپ ئابلاجان ئاۋۇت ئايۇپ ئورۇندىغان ناخشىلاردىكى ئەڭ ياخشى ئۇسسۇلچى ، ئەڭ ياخشى ئارتىس ، ئەڭ ياخشى مۇزىكا ئىشلىگۈچى ، ئەڭ ياخشى مونتاژ ، ئەڭ ياخشى رېژىسسور ، ئەڭ ياخشى ئوپېراتور ، ئەڭ ياخشى ھەمكارلاشقۇچى ... قاتارلىق تۈرلەر بويىچە تاللانغان نامزاتلارنى ئېلان قىلىپ ، ئۇلارغا مۇكاپات بۇيۇمى تارقىتىپ بەردى ، ئىككى سائەتكە يېقىن داۋاملاشقان ئابلاجان مۇزىكا مۇكاپاتى كېچىلىكى ناھايىتى جۇشقۇن كەيپىيات ئىچىدە ئېلىپ بېرىلدى .     بۇلارنى كۆرۈپ كۆزىڭىزگە ئىشەنمەيۋاتقان بولۇشىڭىز مۇمكىن ، لېكىن بۇ ئەمەلىيەت . مانا بۇ يېقىنقى بىر نەچچە يىلدىن بۇيان بالىلارنىڭ ناخشىلىرىنى ۋايىغا يەتكۈزۈپ ئورۇنداپ ، چەت ئەل ياكى باشقا مىللەتلەرنىڭ مودا مۇزىكىلىرىنى قارىغۇلارچە ، چۈشەنمەيلا ئاڭلاشتەك قالاق ئىدىيەنى بۆسۈپ تاشلاپ ، بالىلارغا خۇشاللىق ۋە ئۈمىد ئېلىپ كەلگەن ئابلاجان ئاۋۇت ئايۇپنىڭ نەچچە يىللىق تىرىشىشىنىڭ نەتىجىسى ئىدى . يەنە بىر تەرەپتىن ئېيتقاندا ، بىزنىڭ پېشقەدەم سەنئەتكارلىرىمىزنىڭ كۆڭلىدە ئويلىغان ، ئەمما خىلمۇ خىل سەۋەبلەر تۈپەيلى ئەمەلىيلەشتۈرۈشكە ئامالسىز قالغان ، ئۇيغۇر سەنئەتكارلىرى ئارىسىدىكى تۇنجى قېتىملىق مۇزىكا مۇكاپاتى تارقىتىش كېچىلىكى ھېسابلىناتتى .     مۇكاپاتلار تارقىتىلىپ بولغاندىن كېيىن ئابلاجان ئاۋۇت ئايۇپ بۈگۈنكى مۇزىكا كېچىلىكىگە قاتنىشىپ بەرگەن بارلىق مېھمانلارغا چىن كۆڭلىدىن رەھمىتىنى بىلدۈردى ، ئۇ مۇنداق دېدى : بۈگۈن مەن ناھايىتى خۇشال ، مېنى قوللاپ ، ماڭا مەدەت بېرىپ ، ماڭا يېقىندىن ياردەم قىلغان كىشىلەرگە ئەڭ ئوتلۇق سالىمىمنى يوللايمەن ، بۇ مېنىڭ تۇنجى نۆۋەتلىك مۇزىكا مۇكاپاتى تارقىتىش كېچىلىكىنى ئۆتكۈزۈشۈم بولغاچقا ، بەزىبىر سەۋەنلىكلەردىن خالىي بولالمىدۇق ، لېكىن بۇنىڭدىن كېيىن تېخىمۇ ياخشى بولۇپ كېتىدىغانلىقىغا ئىشەنچىم كامىل ، ئاخىرىدا مېنىڭ ناخشىلىرىمنى ياقتۇرۇپ ئاڭلىغان ، ماڭا ياردەم قىلغان بارلىق كىشىلەرگە يەنە بىر قېتىم رەھمەت ئېيتىمەن .

marbiya

	نىمە دىگەن ئەھمىيەتلىك كېچىلىك! سۆرەتلەردىن قارىغاندا بۇ كېچىلىك مۇۋەپپەقىيەتلىك ئۆتكۈزۈلۈپتۇ. ئۇيغۇر مۇزىكا ئىشلىرىنىڭ تېخىمۇ جۇش ئۇرۇپ راۋاجلىنىشىغا تىلەكداشمەن!

سىنچى

	ئابلاجان ئاۋۇت ئايۇپنىڭ بۇ خاسىيەتلىك ئىشىغا تەشەككۇر ! مەن بۇ شوخ يىگىتنىڭ ناخشىلىرىنى ياخشى كۆرىمەن . ئۇنىڭ بالىلار بىلەن بىللە سەنئەت نومۇرلىرىنى ئورۇنلىشى ، بالىلار ئۈچۇنمۇ زور مەدەت بولىدۇ . ئۇنىڭ بۇندىن كېيىنكى ئىشلىرىغا ئۇتۇق تىلەيمەن .

atax

KALBIM

	ھەقىقەتەن ئەھمىيەتلىك سەنئەت كېچىلىكى بولۇپتۇ....تېخىمۇ راۋاجلىنىشىغا تىلەكداشمەن....

uighur

	بەك ئەھمىيەتلىك پائالىيەت بوپتۇغۇ، بەك خوش بولدۇم. مانا داڭلىق ئۇيغۇر سەنئەتكارلىرى بولسىمۇ بىر يەرگە جەم بوپ 1 داستىخاندا ئولتۇرالاپتۇ.بەك خوش بولۇۋاتىمەن مۇشۇ تاپتا.... 10 قوشقارنىڭ بېشى مانا بۈگۈنلۈكتە بىر قازانغا پېتىپتۇ. ئىشلىرىڭلارغا داۋاملىق ئامەت تىلەيمەن ئابلاجان ئۇكام. تىرىشقىن!!! مۇشۇنىڭ سىن ھۆججىتىنى كۆرۈپ بېقىشقا پۇرسەت يوقمىدۇ ؟ نەدىن كۆرىمىز؟

mehrim

	ئابلاجانىڭ بۇنىڭدىن كېيىنكى سەنئەت ھايتىنىڭ تېخىمۇ پارلاق بولۇشىنى ھەم   زور ئۇتۇقلارغا مۇيەسسەر بولۇشىنى چىن دىلىدىن ئۈمۈد  قىلىمەن .

دۆت

	نەچچە قېتىم سەنئەت كېچىلىكى ئۈتكۈزۈپ، 100نەچچە قىسىملىق تېلۋىزىيە تىياتىرى ئىشلەپ،نۇرغۇن بايلىق (ئەلبەتتە ھالال) تاپقان بىر-بىرنى ياراتماي يۈرىدىغان «نوچىلىىرىمىزمۇ» كۆزىنى پارقىىرىتپلا تۇرۇپتۇغۇ؟؟؟« ئىلھام، مەدەت بولغاندۇ سىلەرگىمۇ مۇشۇ ئىش»دەپ سورىغىم كىلىۋاتىدۇ شۇلاردىن.

tashqin

	ئابلاجان  ھازىرقى زامان ئۇيغۇر ناخشىچىلىرى ئىچىدە ناخشىلىرىنىڭ ئاھاڭدارلىقى كۈچلۈك، مەزمۇنى چوڭقۇر ناخشا ئېيتىدىغان يىتىلىۋاتقان ناخشىچىلىرىمىزدىن بىرى . ئۇنىڭ ئىشلىرىغا ئۇتۇق تىلەيمەن.

hasanjan

	بۇ بۇسۇش خارەكتىرلك يېڭلق ياراتتى