ھېسام بوۋام تەڭرىتاغ مۇنبىرىدىكى بارلىق ئەزالارغا سالام يوللىدى 
ئەسسالامۇ ئەلەيكۇم ھۆرمەتلىك مۇنبەرداشلار ، خىزمەت مۇناسىۋىتى بىلەن غۇلجىغا كېتىپ قېلىپ ، مۇنبەرگە چىقالماي قالدىم ، نەچچە كۈندىن بېرى مۇنبەرمۇ راسا قىزىپتۇ ، بۇنى كۆرۈپ ناھايىتى خۇش بولدۇم . مۇنبەرداشلارنىڭ مۇنبىرىمىزنى قوللاۋاتقانلىقىغا كۆپتىن كۆپ تەشەككۈر . ئۆزۈمنى ئېلىپ ئېيتسام مەنمۇ غۇلجىغا بېرىپ بىكار يۈرمەپتىمەن ، بۇ قېتىمقى غۇلجا سەپىرىمدە مەن بىز ئۇيغۇرلاردىن چىققان داڭلىق چاقچاقچى ، ‹‹ ھايات نەسىردىن ئەپەندى ›› دەپ نام ئالغان ھېسام قۇربان بوۋىمىز ( نۇرغۇن جايلاردا ھېسامكام دەپلا ئېلىنىدۇ ) بىلەن دىدار كۆرۈشۈش شەرىپىگە مۇناسىپ بولدۇم ، ئۇنىڭ قولىنى چىڭ تۇتۇپ تۇرۇپ ئۇنىڭ بىلەن يۈز تۇرانە سۆھبەتلەشتىم ، كۆڭلۈم خۇشاللىققا تولدى .
‹‹ ھېسامكام ›› 80 دىن ئېشىپتۇ ، يىللار ‹‹ ھېسامكام ›› نى قېرىتىپتۇ ، سېخىي يىللار ھېسام بوۋىمىزغا ئاپئاق چاچ ، تېخىمۇ كۆپ قورۇقلارنى ئاتا قىلىپتۇ ، كۆزلىرى ئولتۇرۇشۇپ كېتىپتۇ ، مەن ئىلگىرى تېلېۋىزورلاردا كۆرگەن ‹‹ ھېسامكام ›› ئوبرازىدىن ئەسەرمۇ قالماپتۇ . بىراق ھېسام بوۋىمىز بىزگە ئۆزىنىڭ بالا ۋاقىتلىرىدىكى بەزى ئەسلىمىلىرىنى سۆزلەپ بەردى ، ھەقىقەتەن ھاياجانلاندۇق ، قەلبىمىز شادلىققا تولدى . ‹‹ ھېسامكام ›› نىڭ بەزى چاقچاقلىرىدا تىلغا ئېلىنىدىغان ئايالى زىمىنىخان ھەدىمىزنىڭمۇ سالامەتلىكى ناھايىتى ياخشىكەن ، ئۆزى ناھايىتى خۇشچاخچاق ، مېھماندوست ، كىچىك پېئىل ئايالكەن ، ‹‹ ھېسامكام ›› غا ياخشى قاراپ ، ھالىدىن ياخشى خەۋەر ئېلىپ كېلىۋېتىپتۇ ، بىز بۇنىڭدىن ناھايىتى خۇش بولدۇق . ‹‹ ھېسامكام ›› ھازىرمۇ ئۆزىنىڭ بەزى سورۇنلارغا بارىدىغانلىقىنى ، سورۇنغا تەكلىپ قىلىپ كەلگۈچىلەرنىڭ ‹‹ ھېسامكام ›› نى پەقەت ئولتۇرۇپ بەرسە دېسىمۇ ‹‹ ھېسامكام ›› سورۇنغا بېرىپلا چاقچاققا چۈشۈپ كېتىدىغانلىقىنى ئېيتىپ بەردى . سۆھبىتىمىز ناھايىتى قىزغىن داۋاملاشتى ، ۋاقىت تۈپەيلىدىن بىز بۇ بىر جۈپ ياشانغانلارنىڭ تېنىگە سالامەتلىك ، ئىشلىرىغا ئۇتۇق تىلەپ ئۇلار بىلەن خوشلاشتۇق .
مېڭىش ئالدىدا ھېسام بوۋا سىزنىڭ چاقچاقلىرىڭىزنى ياقتۇرۇپ ئاڭلايدىغان ، سىزنى ياخشى كۆرىدىغان ، سىزگە قىزىقىدىغان نۇرغۇن كىشىلەر بار ، مەن سىزنى تورغا چىقىرىمەن ، ھەممىسى قىزىقىپ كۆرىدۇ دېسەم ھېسام بوۋام دەرھاللا :
- مېنىڭدەك چىرايلىق ئادەمنى تورغا چىقىرىپ قويساڭ ، ھەممە ئادەم قېچىپ كېتىپ تورۇڭنى كۆرىدىغان ئادەم چىقاي بازىرىڭ كاسات بولامىكىن دېمەسمۇ ، ھەممەيلەن پاراققىدە كۈلۈشۈپ كەتتۇق .
ئاخىرىدا ھېسام بوۋام ئۆزىنى يېقىندىن قوللاپ ، ئۆزىنىڭ چاخچاقلىرىنى ياقتۇرۇپ ئاڭلاۋاتقان بارلىق خەلقىمىزگە چىن دىلىدىن ئۆزىنىڭ قۇربان ھېيتلىق سالىمىنى يوللىدى . بىزمۇ ئۇلارنىڭ يىتىپ كېلىش ئالدىدا تۇرغان قۇربان ھېيتىنى مۇبارەكلەپ يېنىپ چىقتۇق .
ھېسام قۇربان ھاياتىنىڭ 70 يىللىقى مۇناسىۋىتى بىلەن ئۆتكۈزۈلگەن مۇھاكىمە يىغىنىدا شائىر مۇھەممەتجان راشىدىننىڭ يازغان شېئىرى ( قىسقارتىپ ئېلىندى )
مۇھەممەتجان راشىدىن
تۈنۈگۈنكى يۇمۇرلۇق يىگىت ، كىرىپ قاپسەن بۈگۈن يەتمىشكە . جاۋاب بېرىپ كەلگىنىڭ تۆھپە ، چاقچاق بىلەن جىمى كەچمىشكە .
ئاسان ئەمەس سەندەك ياشىماق ، يولاتماستىن قايغۇ ئەلەمنى . يىغىلىغانغا ئۆزۈڭ تەسەللىي ، قايغۇرغانلار ئۇنتۇيدۇ غەمنى .
بىز يىغلىغان يىللار ئاز ئەمەس ، ھەتتا ھەر كىم جاندىن غەم يىگەن . بىرەر سۆزنى ئاڭلىماپتىمىز ، ئەمما ‹‹ ھېسام يىغلاپتۇ ›› دېگەن .
ۋادىمىزنى لەرزىگە سالغان ، ناخشىدىن ئۇز چاقچاقلىرىڭ بار . ياندۇرىدۇ يانمىغان ئوتنى ، چاقچاقلاردا چاقماقلىرىڭ بار .
سېنىڭ روھىڭ ئىلىنىڭ روھى ، خەلقىمىزنىڭ بىر بايلىقى سەن . ئۆز - ئۆزۈڭنى يۈرمە كەمسىتىپ ، جىمى ئەلنىڭ چىرايلىقى سەن .
باشقا مۇنبەرلەرگە كۆچۈرۈلسە تېما مەنبەسىنىڭ ئەڭ ئۈستىگە ئەسكەرتىلىشىنى سورايمەن ، بولمىسا قالايمىقان كۆچۈرمەڭ
| 
يوللىغان ۋاقتى 2011-11-1 10:13:55
يوللىغان ۋاقتى 2011-11-1 10:21:07
