كىتاب ئوقۇشقا ئامراق ئاياللار ئەڭ گۈزەل
شۇنداق ئاياللار باركى،ئۇلار كىتاب ئوقۇشقا ئامراق.ئۇلار كىتاب سېتىۋالىدۇ،كىتاب ئوقۇيدۇ،كىتاب يازىدۇ.كىتاب-ئۇلارنىڭ چىداملىق كىيىمى ۋە گىرىمى.ئاددىي-ساددا كىيىنىپ،گىرىمسىز يۈرۈيدىغان ئاياللار رەڭگارەڭ گىرىم قىلىۋالغان ئاياللارنىڭ ئارىسىدىمۇ ئۆزگىچە جەلپكارلىققا ئىگە بولىدۇ.پىسخىكىلىق تەبىئىتى،تەربىيەلىنىشى ۋە ۋۇجۇدىدىن ئۇرغۇپ چىققان كىتاب پۇرىقى ئۇلارنى باشقىلاردىن ئالاھىدە پەرقلەندۈرۈپ تۇرىدۇ.”بىلىملىك كىشى قاراشقىلا گۈزەل كۆرىنىدۇ“،بۇ ھېكمەتلىك سۆز ئۇلارغا تولىمۇ ماس كېلىدۇ.
كىتابقا نىسبەتەن،ئوخشىمىغان ئاياللاردا ئوخشىمىغان پۇراق بولىدۇ، ئوخشىمىغان پۇراقتا ئوخشىمىغان تاللاش بولىدۇ، ئوخشىمىغان تاللاشتا ئوخشىمىغان ئۈنۈمگە ئېرىشىدۇ،شۇ سەۋەبتىن ئاياللار بىلەن كىتاب ئوتتۇرسىدا ئاجايىپ بىر مەنزىرە رايونى پەيدا بولىدۇ.
بەزى ئاياللار بىلىمگە ئېرشىش ۋە قابىلىيىتىنى ئۆستۈرۈش ئۈچۈن كىتاب ئوقۇيدۇ،بۇنداق ئاياللار ئىددىيەۋىلىكى كۈچلۈك،پەلسەپىۋىلىككە ئىگە،مەناسى چۇڭقۇر كىتابلارنى ئوقۇشقا ئەھمىيەت بېرىدۇ.كىتاب ئۇلارنىڭ ھايات مەنزىلىنى يۇقۇرى كۆتۈرىدۇ،تۇرمۇشىنى بېيىتىدۇ.بۇنداق ئاياللارنى ئەسلىدىنلا بىر پارچە كىتاب،كىشىنى چۇڭقۇر ئويلاندۇرىدىغان بىر پارچە كىتاب،دىيىشكە بولىدۇ.
بەزى ئاياللار جىسمانىي ۋە روھىي جەھەتتىن خۇشاللىق تېپىش ۋە مىجەز-خۇلقىنى چېنىقتۇرۇش ئۈچۈن كىتاب ئوقۇيدۇ. بۇنداق ئاياللار تاڭ ۋە سوڭ سۇلالىسى دەۋرىدىكى شېئىرلارنى، قەدىمكى ۋە ھازىرقى جۇڭگو ۋە چەتئەللەرنىڭ نەسىرلىرىنى ئوقۇشقا ئامراق بولۇپ،ئەركىن ۋە بىمالال ھالدا ئۆزىنى ئۆزى كامالەتكە ئېرىشتۈرىدۇ،كىشىلىك ھاياتىنى ئاتاق-ئابرويسىز ئۆتكۈزىدۇ. بۇنداق ئاياللار گويا بىر كۇبلېت شېئىر بولۇپ،ئىنتايىن غۇبارسىز ۋە سۆيۈملۈكتۇر.
يەنە بەزى ئاياللار كۆڭۈل ئېچىش ۋە ئىچ پۇشۇقىنى چىقىرىش ياكى ئۆزىنى مەلۇماتلىق قىلىپ كۆرسىتىش ئۈچۈن كىتاب ئوقۇيدۇ. بۇنداق ئاياللار چەكسىز قايغۇ-ھەسرەت تەسۋىرلەنگەن ئىشق-مۇھەببەت ھېكايىللىرى ۋە كىنو چولپانلىرى،ناخشا چولپانلىرى توغرىسىدىكى چىلتەكلىك خەۋەرلەرگە قىزىقىدۇ. بۇنداق ئاياللار نىسبەتەن ئەمەلىي بولۇپ،ئازىراق قوپال كېلىدۇ،نېمىلا دىگەن بىلەن،ئۇلار ئازراقمۇ بولسا كىتاب ئوقۇش ئارقىلىق بەزى ئىشلاردىن خەۋەردار بولالايدۇ.
كىتاب ئادەمنىڭ قەلبىگە تەسىر كۆرسىتىدۇ،ئادەمنىڭ قەلبى بىلەن مىجەزى ئۆزئارا باغلىنىشلىق بولىدۇ.ئۆزىڭىزنى سۆيۈملۈك،چىرايلىق ياكى جەلىپكار ياساندۇراي دىسىڭىز،كىتاب ئوقۇڭ!
كىتاب ئوقۇش- ئاياللارنىڭ جاھاندارچىلىق دەستۇرىدۇر.كىتاب ئوقۇشقا ئامراق ئاياللارنىڭ ئوقۇش تارىخى ئانچە يۇقۇرى بولماسلىقى مۇمكىن،لېكىن ئۇلار شۈبھىسىزكى مەدەنىيەت مەلۇماتىغا ئىگە. مەدەنىيەت مەلۇماتىغا ئىگە ئاياللار ئۇقۇمۇشلۇق كېلىدۇ،ئىشلارنى سوغۇققانلىق بىلەن بىر تەرەپ قىلدۇ،باشقىلارنىڭ كۆڭلىنى ئېلىشقا ماھىر كېلىدۇ. بولۇپمۇ باشقىلارغا سالماق ۋە لايىقىدا مۇئامىلە قىلىدۇ. دائىم كىتاب ئوقۇيدىغان ئادەمنى كىشىلەر توپىدىن بىر قاراپلا بىلىۋالغىلى بولىدۇ. دائىم كىتاب ئوقۇيدىغان ئادەملەر قالايمىقان سۆزلىمەيدۇ،ئاساسسىز گەپلەرنى قىلمايدۇ،باشقىلار نېمە دېسە شۇنى دەپ دورامچىلىق قىلميدۇ،ئاغزىغا كەلگەننى جۆيلىمەيدۇ،بەلكى ھەرقانداق ئىشتا ئەقلىي خۇلاسە چىقىرىدۇ.
دائىم كىتاب ئوقۇيدىغان ئاياللار ئىش قىلغاندا مۇلاھىزەگە تايىنىدۇ،ئامال-چارە تېپىشنى بىلىدۇ.ئۇلار ئەقىللىق بولغاچقا،مۇرەككەپ،چىگىش ئىشلارنى بىر ياقىلىق قىلالايدۇ،مەسىلىلەرنى تۈپ يىلتىزىدىن ھەل قىلىش چارىسىنى تېپىپ چىقالايدۇ،ئىلىم-پەن قارىغۇلارچە ئىش كۆرۈشنى رەت قىلىدۇ؛ئۇلار ھەربىر قەدەمنى ئەتراپلىق ئويلاپ باسىدۇ.بۇنداق خىسلەت ئادەتتە كىتاب ئوقۇمايدىغان ئادەملەردە تېپىلمايدۇ.
كىتاب ئوقۇشقا ئامراق ئاياللار تولىمۇ گۈزەل، كىتاب ئوقۇشقا ئامراق ئاياللار ئۆزگىچە گۈزەل.ئۇلار گۈل ئەمەس، ئالىي سورتلۇق ھاراقمۇ ئەمەس،بەلكى سۇس دەملەنگەن سىنچايدۇر.ئۇلار ئۇپا-ئەڭلىك سۈرتمىسىمۇ تېتىك ۋە روھلۇق، سالاپەتلىك،ئەركىن-ئازادە،لاتاپەتلىك كۆرىنىدۇ.
كىتاب ئاياللارنى ئەقىللىق قىلىدۇ،قەيسەر قىلىدۇ،پىشىپ يېتىلدۈرىدۇ؛ئاياللارغا سىرتقى گۈزەللىكنىڭ ئەلۋەتتە موھىملىقىنى،لېكىن،ئىچكى گۈزەللىكنىڭ تېخىمۇ موھىملىقىنى چۈشەندۈرۈپ بېرىدۇ.ئادەم كىتاب بىلەن بىرگە ياشىسا مەڭگۈ خورسىنمايدۇ.ياخشى كىتابلارنى ئوقۇيلى،بىلىم-بىردىنبىر پەرداز بويۇمىدۇر،كىتاب-ئاياللارنىڭ زامانىۋى كىيىمى.
كىتاب-ئاياللارنىڭ مەڭگۈلۈك گۈزەللىك ھامىيسى.
نىجات ئىبراھىم
يوللىغان ۋاقتى 2012-5-4 23:00:25
