سۈرەتلىك خەۋەر
بوكس ماھىرى مەمەتتۇرسۇن چوڭ ھەققىدە يىڭى خەۋەر
قەشقەر يېڭىشەھەر ناھىيەسىدە بوكىس ماھىرى مەمەتتۇرسۇن چوڭنىڭ لوندون ئولىمپىك تەنھەركەت يىغىنىغا قاتنىشىش سالاھىيىتىگە ئېرىشكەنلىكىنى تەبرىكلەش پائالىيىتى ئۆتكۈزۈلدى.
قەشقەر يېڭىشەھەر ناھىيەسىدە ئۆسۈپ چوڭ بولغان بوكىس ماھىرى مەمەتتۇرسۇن چوڭ يېقىندا قازاقىستاندا ئۆتكۈزۈلگەن ئاسىيا لەۋھە تالىشىشى بوكس مۇسابىقىسىنىڭ ئولىمپىك تەنھەرىكەت يىغىنىغا قاتنىشىش سالاھىيىتىنى تالىشىش مۇسابىقىسىدە فىلىپپىن، قىرغىزىستان ۋە ئىران ماھىرلىرىنى يېڭىپ، لوندون 30 - نۆۋەتلىك ئولىمپىك تەنھەرىكەت يىغىنىغا قاتنىشىش سالاھىيىتىگە ئېرىشكەنلىكى بۇ ناھىيەدىكى ھەر مىللەت خەلقىنى ھاياجانغا سالدى.
4 - ئاينىڭ 26 - كۈنى قەشقەر يېڭىشەھەر ناھىيەلىك 1 - ئوتتۇرا مەكتەپتە مەمەتتۇرسۇن چوڭنىڭ لوندون ئولىمپىك تەنھەرىكەت يىغىنىغا قاتنىشىش سالاھىيىتىگە ئېرىشكەنلىكىنى تەبرىكلەش پائالىيىتى داغدۇغىلىق ئۆتكۈزۈلدى، پائالىيەتتە مەمەتتۇرسۇن چوڭ ئۆزىنىڭ پارتىيە – ھۆكۈمەتنىڭ غەمخورلۇقىدا ئۆسۈپ يېتىلىش، تەربىيەلىنىش ئەھۋالىنى تۇنۇشتۇردى. 3 مىڭدىن كۆپرەك ئادەم قاتناشقان مۇراسىمدا مەكتەپ مەسئۇللىرى مەمەتتۇرسۇن چوڭنىڭ ئېرىشكەن شان - شەرەپلىرى ۋە نەتىجىلىرىنى تۇنۇشتۇردى. مەكتەپ مەسئۇللىرى، ئوقۇغۇچىلار ۋەكىللىرى ئۇنىڭغا گۈل تەقدىم قىلدى ۋە ئۇنىڭ لوندون ئولىمپىك تەنھەرىكەت يېغىنىدا تېخىمۇ زور شان – شەرەپلەرنى قولغا كەلتۈرۈشىگە ئىلھام ۋە مەدەت بەردى.
مەمەتتۇرسۇن چوڭ قەشقەر يېڭىشەھەر ناھىيەسىنىڭ باغچا يېزا 12 - كەنتىدە دېھقان ئائىلىسىدە تۇغۇلغان. ئۇ ھازىر دۆلەتلىك بوكس كوماندىسىنىڭ ئەزاسى، خەلقئارا دەرىجىلىك تەنھەرىكەت ماھىرى، شىنجاڭ بوكس كوماندىسىنىڭ ئەزاسى، ئۇ كىچىكىدىن باشلاپ بوكسىيورلۇققا ھەۋەس قىلىپ، جاپالىق مەشىق قىلىش ۋە تەربىيەلىنىش نەتىجىسىدە 2002 - يىلى ئاپتونۇم رايوننىڭ يىللىق مۇسابىقىسىدە شىنجاڭ بوكىسچىلار كوماندىسىغا تاللانغان.2004-يىلى ئاسىيا ياش - ئۆسمۈرلەرنىڭ لەۋھە تالىشىش مۇسابىقىسىدە 2 - بولغان. 2007 - يىللىق دۇنيا لوڭقىسىنى تالىشىش مۇسابىقىسىدە 5 - بولغان. 2004 - يىلى11 - نۆۋەتلىك مەملىكەتلىك تەنھەرىكەت مۇسابىقىسىنىڭ بوكس تۈرىدە 64 كىلوگىراملىقلار تۈرىدە چىمپىيون بولغان. 2008 - يىلى بېيجىڭ ئولىمپىك تەنھەرىكەت مۇسابىقىسىگە قاتناشقان. 2011 - يىلى ئاسىيا لەۋھە تالىشىش مۇسابىقىسىدە چىمپىيون بولغان.
ئىگىلىنىشىچە، ئۇ ئىككى نۆۋەت ئولىمپىك تەنھەرىكەت يىغىنىنىڭ بوكس مۇسابىقىسىگە قاتناشقان تۇنجى ئۇيغۇر تەنھەرىكەتچى ھېسابلىنىدىكەن. بۇ كۈنى مەمەتتۇرسۇن چوڭ ناھىيەلىك 1 - ئوتتۇرا مەكتەپنىڭ بوكس كوماندىسىدىكى ئوقۇغۇچىلارنى بىر قېتىم ئەمەلىي مەشىقلەندۈردى ۋە بوكس ماھارىتى كۆرسىتىپ بەردى.
ناھىيەلىك 1 - ئوتتۇرا مەكتەپنىڭ بوكس كوماندىسىدىكى ئوقۇغۇچىسى نۇرئەخمەت مۇنداق دېدى: ئولىمپىك ئوغلانى مەمەتتۇرسۇن چوڭ ئاكىمىز بۈگۈن مەكتىپىمىزگە كېلىپ ئۆزىنىڭ قانداق تىرىشىپ ئۆگەنگەنلىكى، قانداق نەتىجىلەرگە ئىرىشكەنلىكىنى سۆزلەپ، بىزنى چوڭقۇر تەسىرلەندۈردى. مەن تىرىشىپ ئۆگىنىپ ۋەتەن، خەلققە ياراملىق ئىز باسارلاردىن بولىمەن.
سۈرەتتە: 1. مەمەتتۇرسۇن چوڭ ئوقۇغۇچىلاغا ماھارەت ئۆگەتمەكتە.
2. مەكتەپ مۇدىرى ئەسقەر ئابلەت گۈل تەقدىم قىلماقتا.
سابىرجان سىيىت
ماھىرە قاسىم، دىلخۇمار ئەنۋەر
قەشقەر يېڭىشەھەر ناھىيەلىك رادىيو - تېلېۋىزىيە ئىدارىسى
يوللىغان ۋاقتى 2012-4-26 21:19:43
