بىلىم ئال
مەخمۇت ئاۋۇت(مۇزاتى)
مەنزىلىمدە ئاداشماي يۈرەي دېسەڭ بىلىم ئال،
ئەجىرىمدىن ھالال نەپ كۆرەي دېسەڭ بىلىم ئال.
ھايات يولۇڭ ئىگىز-پەس،بولساڭ مىشچان كۈنۈڭ تەس،
ياقاڭ يىرتىپ يىغلىماي، كۈلەي دېسەڭ بىلىم ئال.
بۈگۈننىلا كۆزلىمە ، ئورۇنسىز لاپ سۆزلىمە ،
رىقابەتتە مۈشكۈلنى يېڭەي دېسەڭ بىلىم ئال.
قانات بىلگىن ئىلىمنى ، نۇرلاندۇرار دىلىڭنى ،
نادانلىقنىڭ چۆلىدە يۈرمەي دېسەڭ بىلىم ئال.
بىئەقىللىق -نادانلىق ، ئۇندىن كېلەر نامراتلىق،
بۇردا نانغا زار بولۇپ ئكتمەي دېسەڭ بىلىم ئال.
ياتساڭ ئۇخلاپ غەپلەتتە، ئۆتەر كۈنۈڭ مۇڭ-دەرتتە،
بەختىم كۈلۈپ ياخشى كۈن كۆرەي دېسەڭ بىلىم ئال.
تالەي كۈلۈپ باقسىمۇ، گەر ئەمىلىڭ ئۆسسىمۇ،
يېڭى مەنزىل ، نىشانغا ئۆرلەي دېسەڭ بىلىم ئال.
يۈزۈم يورۇق دېسەڭ گەر، كېلەر ھۆرمەت تۆكسەڭ تەر،
ئەلدە مەزمۇت پۇت تېرەپ تۇراي دېسەڭ بىلىم ئال.
ئىناقلىقنى كۆزلىگىن ، ھەقىقەتنى سۆزلىگىن ،
ھەق-ناھەقنىڭ پەرقىنى بىلەي دېسەڭ بىلىم ئال.
بولسا سەندە شىجائەت، ياردۇر بەخت-شان،ئامەت،
دۇنيالىقتا ئارمانسىز ئۆتەي دېسەڭ بىلىم ئال.
شېئىرىنىڭ ئاپتورى: باي ناھىيىسىدىن : مەخمۇت ئاۋۇت (مۇزاتى)
بۇ شېئىر :«جۇڭگو مۇسۇلمانلىرى»ژورنىلىنىڭ 2011-يىل 1-سانىدا ئېلان قىلىنغان.
يوللىغان ۋاقتى 2012-4-7 00:13:25
