ئويغانغاندىن كېيىن (ھېكايە)

erkin2010

	بۇ ھىكايە ئەلكۈيىدىكى بارلىق خانىم-قىزلارنى بەكرەك جەلىپ قىلىۋالدىمۇ-نىمە ؟...

gulyare

	بۇ ھىكايە خانىم - قىزلارنىلا ئەمەس ئەلكۈيىدىكى ھەممەيلەننى ئۆزىگە جەلپ قىلىۋالدى.

dellyar571

	ئىنكاسلارغا : بۇ ئەسەرنىڭ ئەدىبى ھاياجان بىلەن ئىلمىيەتكە خاس سوغاققانلىقىنىڭ يۇغۇرىلىشى قىلىپ چىقىشقا ئۇرۇنۇپ كىلىۋاتىمەن چۇنكى مۇشۇنداق بولغاندا ئەسەر  بىر تەرەپتىن بەك ئىلمى بولۇپ كىتىپ ھەممىنى توغرا چۇشنىش ۋە چۇشەندۇرۇش ئارقىسىدا ئاستا ئاستا  ھىچ نەرسىدىن ھاياجانلانماس بولۇپ ئاجىر مازلىق لالمىلىق گوشباشلىق  بىلەن بىر دۇقمۇشقا ئۇچۇرشىدىغان كەڭ زىيالىلارغا پايدىلىق نەرسىىلەر چىقىدۇ يەنە بىر تەرەپتىن ھە دىسە قىزىق قانلىق قىلىپ سەكرەپ ئالدۇراڭغۇلۇق قىلىشلار گەرجە ھىس ھاياجىنى ساغلام ۋە دۇرۇس بولىسمۇ ئاخرقى  ھىساپتا باشقىلارغا دەلدۇش ۋە رادىكال ياكى زىيادە ھىسىياتچان  كۆرنۇپ چەتكە قىلىپ   قالىدىغان ئادەملەرگە ئاگاھلاندۇرۇش سىگىنالى بولىدۇ .ئەلۋەتتە ئەسەرنىڭ مۇشۇنداق بىر خەيىرىيەتكە دەسىمىگى ئۈچۇن  قەلەم  تەرەتكۈچى ھەم سوغققان بولالىشى ھەم ھىس ھاياجانغا تولغان بولمىقى لازىم .(بۇ مەن ئەڭ قىينىلىۋاتقان ۋە پۇتۇن ئەسەرنى مەغلۇبىيەتكە ئۇچىرىتىش ئىھتىمالى بولغان نۇقتا )مەنچە ھازىرغىچە ئەسەرنىڭ ھىس ھاياجان قىسىمى خانىم قىزلارنىڭ قەلبىگە كىرۋاتىدۇ ئەسىردىكى دىندارلىق ، پەلسەپىلىك ۋە ئىلمىيەت بولسا  يىگىلىرىمىز ۋە ئاتالارنىڭ دىقىنىتىنى تارتىشى مۇنكۈن   ئەسەرنىڭ مۇۋاپىقىيەتلىك چىقىشى ئۈچۈن ھەر قايسىڭلارنىڭ خەيىر دۇئالىرىغا ئىھتىياجم بار بۇ ئەرزىمەس يازمىنىڭ مۇۋاپىقىيىنى ئۈچۇن تورداشلارنىڭ ئىتىبارغا تەكرار تەشەككۇر

ظاەذ

	ئەسسالامۇ ئەلەيكۇم: ئاخىرىنى يېزىۋاتامسىز!! غەيرەت قىلىڭ، ئاللاھ ئىشلىرىڭىزغا ئاسانلىق بەرسۇن.

dellyar571

	يىڭى باب 2001يىل 8-ئاينىڭ 31-كۈنى ئالتە يىللىق ئوقۇش ھاياتىمنىڭ ئەڭ ئاخىرقى يىللىق يېڭى ئوقۇش مەۋسۈمىنى كۈتىۋالدىم. بىزگە بىرمۇ دەرس ئورۇنلاشتۇرۇلماي مەكتەپ قارمىقىدىكى 1- دوختۇرخانىدا پىراكتىكا قىلىش خىزمىتى تاپشۇرۇلدى. تېخىمۇ ئالدىراش بولۇپ كەتتۇق. دۇبەيدە يۈرگەن ئەلىنىڭ پەلسەپەلىرى،توي قىلماقچى بولغان گۈزەلنۇرنى بىرچەتكە قايرىپ قويۇپ ھەر قايسى بۆلۈملەرنى ئايلىنىشنى باشلىۋەتتىم. بىر كۈنى ياتاققا كىرسەم خەنزۇ ساۋاقداشلىرىمنىڭ بىرى « ساڭا ئامېرىكىدىن بىرسى تېلىفون قىپتۇ» دىدى. ئۇنىڭ دىيشىچە تېلىفون قىلغۇچى ئۆزىنىڭ ئىسمىنى قالدۇرماي ياكى باشقا گەپمۇ تاپىلىماي تېلىفوننى قويۇۋېتىپتۇ. خىيالىمغا ئەلى كەلدى. ئۇ ئامېرىكىدا نېمە قىلىدىغاندۇ؟ شۇ كۈنى كەچ ۋاقىت چىقىرىپ ئېنتىرنىت تورىغا چىقتىم. ئەلىدىن كەلگەن ئۈچ-تۆت پارچە يېڭى خەت بار ئىكەن. لېكىن ئامېرىكا توغرىلىق بىر ئېغىزمۇ گەپ يوق. ئاساسلىقى ئۆزىنىڭ ساق-سالامەت يېتىپ بارغانلىقنى، ئۇ يەرنىڭ ھاۋاسى، ئادەملىرى توغرىسىدىكى تەسىراتلىرىنى يېزىپتۇ. ئۇنىڭغا جاۋاپ خەت يېزىشنى نىيەت قىلىپ يېرىم سائەت ئولتۇرغان بولساممۇ كاللامغا «سەن نەدە؟» دىگەن جۈملىدىن باشقا نەرسە كېلىدىغاندەك ئەمەس. شۇنىڭ بىلەن خەت ئىسمى دىگەن يەرگە «سەن نەدە؟» دىگەننى ئۇيغۇر يېڭى يېزىقىدا كىرگۈزۈپ خەت مەزمۇنىغا مۇشۇ جۈملىنى كۆچۈرۈپ چاپلىدىم. خەت ئەۋەتىلگەندىن كېيىن تورخانىدىن چىقىپ كەتتىم. تېلىفوننىڭ كىمدىن كەلگەنلىكىنى بەش كۈندىن كېيىن ئۇقتۇم. ئۇ مەن بىر چاغدا چوڭ مەسجىد تە ئۇچراشقان ئىدىۋىنا نېيرىڭ دىگەن ئامىرىكىلىق ئايال ئىكەن. ئۇ شىئەنگە مېڭىش ئالدىدا ماڭا تېلىفون قىپتۇ. شىئەنگە يېتىپ كەلگەندىن كېيىن مېھمانخانىدا تۇرۇپ يەنە بىر تېلىفون قىپتۇ. ئۇنىڭ  تېلىفوندا دەپ بەرگەن ئادرىسى بويىچە ئۇ چۈشكەن مېھمانخانىغا باردىم. لېكىن ئۇ يوق ئىكەن. مېھمانخانا خىزمەتچىسىدىن سورىسام «چىقىپ كەتكىلى ئىككى سائەت بولدى» دىدى. شۇنىڭ بىلەن مېھمانخانىنىڭ زالىدا ئۇنىڭ قايتىشىنى ساقلاپ ئولتۇردۇم.        ئۇنىڭ بىلەن كۆرۈشمىگىلى يېرىم يىلدىن ئېشىپتۇ. ئەينى ۋاقىتتا ماڭا تاسادىپى ئۇچراشقان بۇ ئايالغا بىر مۇنچە ئىش قىلىپ بەرگەن ئىدىم. خاتىرەمدىن ئۆچەي دەپ قالغان شەخىس مانا ئەمدى يەنە پەيدا بولۇپ قالغىنى قىزىق.  ئۇ مېنىڭ نەرىمگە قىزىقىپ قالغاندۇ؟ بەلكىم شىئەننى بىلىدىغان ئادەم ئىزدەپ ئۆزىنىڭ ساياھىتىنى ئاسانلاشتۇرۇشنى نىيەت قىلغاندۇ. نېمىلا مەقسىتى بولسۇن ئۇنىڭ بىلەن كۆرۈشۈپ  قويۇشۇم كېرەك. ئۇ شۇنچە يىراق ئامېرىكى دىن كەلگەن مېھمان تۇرسا كۈتۈۋالمىسام قاملاشماس.               - مۇھىد، ياخشىمۇسىز ؟ قاچان كەلدىڭىز؟ ئۇ پەلەمپەيدىن چىقىۋېتىپ مەن بىلەن ئەھۋاللاشتى. خۇددى قەدىناس بۇرادىرى بىلەن كۆرۈشكەندەك مەن بىلەن كۆرۈشتى. ئەدەپ يۈزىسىدىن ئۇنىڭ ھەرىكىتىگە ماسلاشتىم. -  بۇ شەھەردە بىر دوستۇمنىڭ بارلىقىدىن ئۆزەمنى بىخەتەر ھېس قىلدىم. قېنى ئولتۇرۇڭ.         ئۇ مېھمانخانا كۈتۈش زالىدىلا مېنى ئولتۇرۇشقا تەكلىپ قىلدى. بىز ئادەتتىكى تەكەللۇپ گەپلىرىنى قىلىشىپ زالدا بىردەم ئولتۇرغاندىن كېيىن ئىدىۋىنا مېنى مېھمانخانىدىكى ياتىقىغا باشلاپ كىردى. ئالدىنقى قېتىمغا ئوخشاش مەن ئاڭلىغۇچى بولدۇم. ئۇ ئۆزىنىڭ ئوتتۇرا شەرىقتە قىلغان يېقىنقى زىيارەتلىرىنى سۆزلەپ ئۆزىنىڭ كەسپىدىكى يېڭى ئۇتۇقلىرىنى بىر قۇر تونۇشتۇردى. ئۇنىڭ سۆزلىرىنى ئاڭلاۋېتىپ « بۇ ئايال بۇلارنى ماڭا ئاڭلىتىپ نېمە قىلماقچىدۇ؟»دەپ ئويلاپ قالدىم. ئۆزىنىڭ باشقىلار قىلالمايدىغان ئىشلارنى قىلىدىغانلىقىنى ئىسپاتلىماقچىمۇ ياكى ئۆزىنى كاتتا ئالىم كۆرسىتش يولى بىلەن ئالاھىدە قىممىتىنى ماڭا بىلدۈرۈپ قويماقچىمۇ؟ ۋەياكى ئۇنىڭ مەسجىدتە يوقۇتۇپ قويغان ئارىسىغا 200 ئامېرىكا دوللىرى قىستۇرۇلغان خاتىرىسىنى تېپىپ قايتۇرۇپ بەرگەنلىكىمدىن خۇرسەن بولۇپ ماڭا ھەقسىز ئىلىم بېرىۋاتقانمىدۇ؟ مېنىڭ ئورنۇمدا ئەلى بولغان بولسا چوقۇم بۇ گەپلەرگە قىزىقىپ ھاياجانلىنىپ بۇ ئايال بىلەن تاڭ ئاتقۇچە تۇرلۇك ساھالەردە  پاراڭلاشقان بولاتتى. ئەلىدەك بولالىغان بولسام ئېھتىمال «نېمىشقا» دىگەن بۇ سوئال كاللامغا كەلمىگەنمۇ بولاتتى.        - بۇلارغا قىزىقامسىز؟،نىمىنى خىيال قىلىۋاتىسىز؟ ئۇنىڭ بۇ سوئالىدىن چۆچۈپ بېشىمنى كۆتۈردۈم . - ھېچنىمە. گەپلىرىڭىزدىن بەكمۇ خۇرسەن بولدۇم. كەسپتە بەك ئەستايىدىل ئىكەنسىز، بۇ ئەستايىدىللىقىڭىز سىزنى جەزمەن مۇۋەپپەقىيەت قازاندۇرىدۇ. - شۇنداقمۇ، -ئۇ كۈلۈپ كەتتى. –مۇھىد سىزنىڭ ماڭا سۆزلەپ بەرگۈدەك ھېكايىڭىز، ئىشلىرىڭىز يوقمۇ؟ مېنى سۆزلە دىسە ئاغزىم بېسىلماي قالىدىكەن، سىز جىم ئولتۇرىۋالىدىكەنسىز. ھېكايە، مەندە نەدىمۇ ھېكايە بولسۇن؟ زادى بار دىسە مەندىن بىر قىز بالا بىلەن قانداق مۇھەببەتلەشكەنلىك ھېكايىسى چىقىدۇ. مېنى قانچە سىلكىسە-سىقسا چىقىدىغىنى مانا مۇشۇ ھەممە ئادەمدىن چىقىدىغان مۇھەببەت ھېكايىسى. - مەن مېدىتسىنا ھەققىدە پاراڭ قىلالايمەن. سىزگە ئوخشاش مول بىلىمگە ئىگە ئەمەس. - ھە ،توغرا،- ئۇ بىر نەرسىنى ئېسىگە ئالغاندەك سومكىسىنى ئاختۇرۇپ قولىغا دورا قۇتىسىدىن بىرنى ئالدى،- بۇ قانداق دورىكەن؟ بۇنى بۈگۈن كىچىك بىر دورىخانىدىن سېتىۋالدىم. پىرىكازچىك ئىنگىلىزچە ئۇقمايدىكەن. ئىشارەت قىلىپ چۈشەندۈرسەم بەرگىنى بۇ دورا بولدى. ئامالسىز سېتىۋېلىپ كىردىم. دورىنى قولۇمغا ئېلىپ قارىسام ئۇ بىر قېپى بىر يۈەنلىك ئاغرىق توختىتىش دورىسى ئىكەن. -سىز نىمە دورا ئالماقچىتىڭىز؟      - مەندە Bتىپلىق جىگەر ياللۇغى بار. ئەنسىرىمىسىڭىزمۇ بولىدۇ. مەندىكى جىگەر ياللۇغى يامان تىپلىق ئەمەس. ئاسانلا ماغدۇرسىزلىنىپ جانسىز بولۇپ قالىمەن. ئالىدىغان دورام شۇنىڭ دورىسى ئىدى. - خاتا دورا ئاپسىز،نەچچە پۇلغا ئالغانتىڭىز؟      - 50 يۈەنگە.      - نىمە ؟نىمانچە قىممەت؟ - ئورنۇمدىن تۇرۇپ كەتتىم. –ئۇ قايسى دورىخانا ئىكەن؟       نيېرىڭ ھەممىنى چۈشىنىپ سائىتىگە قارىدى. - بىز بارغۇچە تاقاپ كىتەرمۇ؟ - ياق دورىخانابولسا 24 سائەت ئىشىكىنى ئۇرسىڭىز ،سىزدىن خاپا بولماسلىقى كېرەك. ئىككىمىز دورىخانىغا بارغاندا ئەھۋالنى ئۇدۇللا خوجايىن ئىشخانىسىغا كىرىپ چۈشەندۈردۈم . ئەسلىدە بۇ خوجايىننى مۇشۇنداق ئىشنى قىلغان پىركازچىكىنى تېپىپ ئەدىپىنى بېرىدۇ. ئاندىن بىزدىن ئەپۇ سورايدۇ دەپ ئويلىغانىدىم. ئىش باشقىچە بولدى. خوجايىن «سىلەردە ئىسپات يوقكەن، دورىخانىمىزنى قالايمىقان قىلماي چىقىپ كېتىڭلار.» دىدى.« جۇڭگولۇق تۇرۇپ نېمە چەتئەللىككە بولۇشىسەن؟ ئۇلار بىزنى ئاز تالان- تاراج قىلدىمۇ؟ھۇ چەتئەللىكنىڭ غالچىسى » دىۋىدى،تېخىمۇ ئاچچىقىم كېلىپ خوجايىنغا ئېتىلىپ بارماقچى بولىۋىدىم، ئەھۋالنىڭ تېخىمۇ يامانلىشىپ كېتىشىدىن ئەنسىرىگەن نيېرىڭ بىلىكىمدىن تارتىپ سۆرەپ مېنى دورىخانىدىن چىقىرىۋالدى. يول بويى ئاچچىقىم بېسىلماي «ئۇلار قاراپ تۇرۇپ يولسىزلىق قىلدى» دەپ قاقشىدىم. لېكىن نيېرىڭ : « سەۋەنلىك مەندە، دورا سېتىۋالغانلىق ئىسپاتى ئېلىۋالماپتىمەن.ئەگەر شۇنداق قىلغان بولسام خوجايىن بىزگە باشقىچە مۇئامىلە قىلاتتى.» دىدى. ئۇنى باشقا دورىخانىغا باشلاپ بېرىپ لازىملىق دورىنى ئېلىپ بەردىم. نيېرىڭ بۇ كۆڭۈلسىزلىكلەرنى ئۇنتۇپ كېتەيلى دەپ ماڭا نەسىردىن  ئەپەندىمنىڭ لەتىپىلىرىدىن بىر نەچچىنى ئېيتىپ بەردى. - موللا نەسىردىننىڭ قوشنىسى ھەققىدىكى ھېكايىنى ئاڭلىغانمۇسىز؟  . - ياق - موللا نەسىردىننىڭ قۇلىقى ئۇزۇن تىڭ –تىڭچى قوشنىسى بولغان ئىكەن. بىر كۈنى ئەپەندىمنىڭ ئايالى ئۇنىڭ ئۆيگە كەچ قايتىقىنىدىن خاپا بولۇپ ئۇنى يەڭگىل بىر ئىتتىرىپتىكەن. پەلەمپەينىڭ يىنىدا تۇرغان ئەپەندىم ئۆزىنى دەڭسىيەلمەي ئەسكى تامدەك ئۆرۈلۈپ چۈشۈپتۇ. ئۆيدىكى گۈلدۈر-قاراستىن قۇلىقى دىڭ تۇرغان قوشنىسى ئالدىراپ تېنەپ كېلىپ ئۇنىڭ ئىشىكىنى چېكىپتۇ. - ئەپەندى ئۆيدە بىرەر ئىش بولمىغاندۇ؟ - ھېچ ئىش يوق. چاپىنىم يەرگە چۈشۈپ كەتتى،- دەپتۇ. ئەپەندىم. - چاپان چۈشسىمۇ شۇنداق قاتتىق ئاۋاز چىقامدۇ؟ - ۋاي قوشنام. چاپاننىڭ ئىچدە مەن بار ئىدىم- دەپتۇ. ئەپەندىم ئامالسىز.         ھەر ئىككىمىز كۈلۈشۈپ مېڭىپ مېھمانخانىدىن ئۆتۈپ كېتىپتىمز. نيېرىڭ: - ئەپەندىنىڭ گېپىنى قىلىپ ئۆزىمىز ئەپەندى بولۇپ قاپتۇق، - دەپ چاقچاق قىلدى. كەينىمىزگە يېنىپ مېھمانخانىنى تېپىۋالدۇق. ياتاققا قايتىپ كىرگەندىن كېيىن ئىدىۋىنا ساياھەت قىلىدىغان نۇقتىلىرىنى شىئەننىڭ خەرىتىسىدىن تېپىپ ئۆزىنىڭ شىئەندە تۇرىدىغان ۋاقتىنى، قىلىدىغان پائالىيەتلىرىنى ئورۇنلاشتۇردى. دوختۇرخانىدا ئالدىراش بولغاچقا ئۇنىڭ ئۈچ كۈنلۈك ساياھىتىگە ھەمراھ بولالمايدىغانلىقىمغا ئۆزرە ئېتىپ ئۇنىڭ بىلەن خوشلاشتىم. ئارىدىن ئۈچ كۈن ئۆتۈپ ساياھەتلىرىنى تۈگەتكەن چېغى نيېرىڭ شىئەندىن ئەتىسى سەھەر ئايرىلىدىغانلىقىنى ئېيتىپ ماڭا تېلىفون قىپتۇ. ئۇ چۈشكەن مېھمانخانىغا يەنە بىر قېتىم باردىم. بۇ نۆۋەت ئۇ ماڭا چوڭ تېمىلاردىن گەپ قىلمىدى، پەقەت سالامەتلىكىنىڭ ناچارلىشىپ كېتىۋاتقانلىقنى ئېيتتى. ئۇنىڭB تىپلىق جىگەر ياللۇغى باشقا كىسەللىرى ئىچىدىكى ئادەتتىكى كېسەل ئىكەن. - بىلەمسىز مۇھىد، بۇ مېنىڭ ئاخىرقى قېتىم شىئەنگە كېلىشىم بولۇپ قالىدۇ. بەلكىم ئۈچ-تۆت يىلدىن كېيىن پەرۋەردىگار بىلەن يۈز كۆرۈشىشىم مۇمكىن.         بۇ گەپنى ئاڭلاپ خۇددى ھازىرلا ئۆلۈپ بېرىدىغان ئادەم بىلەن پاراڭلىشىۋاتقاندەك جىددىيلىشىپ كەتتىم. - نېمە دەۋاتىسىز؟ شۇنداق تىمەن تۇرىسىز، بۇنداق گەپلەرنى قىلماڭ. - مەن قانداق قىلىپ ئەرەبلەرنىڭ مەدەنىيىتىگە قىزىقىپ قالدىم. بىلەمسىز؟ مېنڭ ھاياتىمنى بىر ئەرەب قۇتقۇزۇۋالغان، ئىئوردانىيىدىكى بىر قۇملۇقتا ئۇ مېنى قۇتقۇزىۋالغان. - قانداق قىلىپ؟ - مەن تەۋەككۈلچىرەك ، خەتەرلىك ئىشلارغا ئامراق قىز ئىدىم. ئۇنىۋېرستىتتىكى ۋاقتىمىزدا مەكتەپ بىزنى ئەرەپ دۆلەتلىرىگە يازلىق لاگىرغا تەشكىللىگەن. مەن توپتىن ئايرىلىپ قۇملۇقنىڭ ئىچكىرىسىگە كىرىپ كېتىپ ئېزىپ قالغان. تۆت كۈن يىمەي-ئىچمەي ئاخىرى ھوشۇمدىن كېتىپتىمەن. بىر ئەرەپ مېنى بايقاپ قېلىپ قۇتۇلدۇرىۋالغان. - ئۇ ئەرەب سىزنى ئوتتۇرا شەرقنى تەتقىق قىل دىگەنمىدى؟ - ياق، مەن ئۆلۈم گىرداۋىدىن قۇتۇلۇپ ئىئوردانىيىدە قۇم بارخانلىرى دۆۋىسىدە قايتىدىن تۇغۇلغاندەك بولدۇم. ئەمەلىيەتتە مەن ئۇ ئەرەبنى ھېلىغىچە كۆرۈپ باقمىدىم. - نېمە؟ - شۇنداق ، مەن ئۆزەمنىڭ شەپقەتچىسىنى بىلەيمەن. ئۇ كىشى مېنى تۆگىسىگە ئېلىپ دوختۇرخانىغا ئېلىپ بېرىپ ھايات ئىكەنلىكىمنى ، پات ئارىدا ئەسلىمگە كېلىدىغانلىقمنى ئوقۇپ دوختۇرلارغا يېتەرلىك خىراجەت بېرىپ كېتىپ قالغانچە ئىككىنچى كۆرۈنمەپتۇ. ئەسلىمگە كېلىپ ئۇنى كۆپ سۈرۈشتە قىلدىم. ئۇ پەقەت ماڭا كىچىك بىر باغاقچە قالدۇرۇپتۇ،باغاقچىدا «سىنىڭ كىم ئىكەنلىكىڭىنى بىلمەيمەن سەنمۇ مىنىڭ كىم ئىكەنلىكىمنى بىلمەي ئۆتۈپ كەت ،قىلغان ياخشىلىقىم پەقەت ئاللاھنىڭ رازىلىقى ئۈچۈندۇر بۇندىن سىرىت  ھىچ تامايىم يوق تەكرەر دەي مىنى ھەرگىز ئىزدىمە، سىنىڭ ياخشىلىقىمغا جاۋاب قايتۇرشىڭ بىلەن مەن ئاللاھنىڭ مۇكاپاتىدىن قۇرۇق قىلىشنى خالىمەيمەن .»دەپ باغاقچە يىزىپ قويۇپتۇ ئۇ مىنى ئىزدىمە دېگەن بولسىمۇ ئىزدىدىم ئەمما پەقەت تاپالمىدىم. –ئۇ سومكىسىدىن بىر پارچە رەسىمنى ئالدى، -قاراڭ بۇ ئۇنىڭ رەسىمى . ئۇنى دوختۇرخانىدا كۆرگەنلا ئادەمدىن قېشىنىڭ ، كۆزىنىڭ ، بۇرنىنىڭ ،چاچلىرىنىڭ ھەتتا كىيىملىرىنىڭ قانداق ئىكەنلىكىنى سوراپ مۇشۇ رەسمنى بىر رەسسام ياللاپ سىزدۇردۇم.         بۇ ئادەم قويۇق ساقال قويغان،قاڭشارلىق، قارا چاچلىرى گەدىنىدە ساڭگىلاپ تۇرغان مويسىپىت سۈپەت بىر ئادەمكەن. رەسىم ماي بوياقتا سىزىلىپتۇ، سىنچىلاپ قاراپ رەىسسامنىڭ سۈرەتكە يان تەرەپتىن نۇر بەرگەنلىكىنى سەزدىم. بىراق رەسىمدىكى ئادەم ماڭا ئۇلۇغ بىلىنمىدى. - ئۇ قانداقكەن؟ - بەلكىم ئۇ ئېغىر گۇناھ قىلغان بولسا شۇ گۇناھىنى يۇيۇش ئۈچۈن بىرەر ياخشىلىق قىلاي دەپ سىزنى قۇتقۇزۇپ قالغان  ئادەمدۇ. نيرىڭ سۆزۈمنى ئاڭلاپ تۇرۇپ قالدى. بۇ گەپنى چىقارغانلىقىمدىن ئۆزەممۇ غەيرىلىك ھېس قىلدىم. - مۇھىد، سىز جۇڭگونىڭ تەرىقەت دىنىنى بىلەمسىز؟ - ئېىدىۋىنا شۇنداق دەپ سورىدى. بايىقى گېپىمنى ياندۇرىۋېلىش كېرەكلىكىنى ھېس قىلدىم. ئۇنىڭ سوئالىغا جاۋاپ بەرمەيلا دىدىم. - چىرايىدىن ياخشى ئادەملىكى چىقىپ تۇرىدۇ ، ئۇنى داۋاملىق ئىزدەۋاتامسىز؟ - جۇڭگونىڭ تەرىقەت ددىنىدا، - نىيېرىڭ گېپىنىڭ داۋامىنى قىلغىلى تۇردى. -‹ گۈزەللىك بولمىسا سەتلىك بولمايدۇ، ئاق بولمىسا قارا بولمايدۇ› دەيدىغان كالاملار بار. ئۇلارنىڭ پەلسەپەسىدىن ئۇدۇل مەنە چىقارسا ياخشىلىق يامانلىققا، يامانلىق ياخشىلىققا يۈرگەن چاقپەلەككە ئوخشايدۇ. ئۇنىڭ ياخشىلىق يامانلىق ،قارا ، ئاق دىگەن گەپلىرىنى چۈشەندىم. لېكىن مېنىڭ باياتىن دىگەن گېپىم پەقەت ئۆزەمنى كونتىرول قىلالماي شۇنداقلا چىقىپ كەتكەن گەپ ، خالاس. - نيېرىڭ كەچۈرۈڭ،مەن تەرىقەت دىنىنى بىلمەيمەن. ئىسلام دىنىدىن ئاز-تولا خەۋىرىم بولغاندىن تاشقىرى باشقا دىن ، پەلسەپەلەردىن خەۋىرىم يوقكەن. ئۇ گەپنى قىلغىنىم ياخشى بولمىدى. بەلكىم كىنولاردىن ئاڭلىۋالغان سۆز ئاغزىمدىن چىقىپ قالغان چېغى. - مەيلى رەسىمدىكى بۇ كىشى قانداقلا ئىش قىلغان بولسۇن  مېنىڭ ھاياتىمنى قۇتقۇزۇۋالدى. راست ئۇمېنڭ شەپقەتچىم. ئەگەر ئۇنى ئىزدەپ تاپالىغان بولسام قانداق ياخشى بولاتتى. شۇ ئىشتىن كېيىن ئەرەب مەدەنىيىتىگە باشقىچىلا قىزىقىپ قالدىم. ھازىر ئەرەب كىلاسسىك ئەدىبىياتىنى مەندەك بىلىدىغان ئامېرىكىلىق ساناقلىق. بۇنىڭ ھەممىسى مۇشۇ ئادەمنىڭ تۆھپىسى.-  ئۇرەسىمنى ئۆزىگە قاراتتى. –بۇ ناتونوش ئادەمگە « مالائىكە» دەپ ئات قويۇۋالدىم. ئۇ ئەرەپچە پەرىشتە دىگەن گەپ، مېنڭ بۇ مالائىكەم ماڭا ئاتا-ئانام، ئېرىم ھەتتا بالىلىرىم بەرمىگەن بىر نەرسىنى بەردى. ئۇنى ھايات دىسەممۇ، كەسىپ دىسەممۇ، تۇرمۇش دىسەممۇ بولىۋېرىدۇ، مۇھىد بەزىدە بىر مىنۇت ھەتتا بىر دەقىقە ئىچىدە چىقارغان قارارىڭىز ھاياتىڭىزغا ئۆچمەس تەسىر كۆرسىتىدىكەن. شۇچاغدا قاراملىق قىلىپ ساۋاقداشلارنى تاشلاپ ئۆزەم يالغۇز ھەرىكەت قىلىشنى قارار قىلمىغان بولسام ھازىر پۈتۈنلەي باشقىچە ھايات كەچۈرگەن بولاتتىم. سىز بىلەنمۇ دورىخانىغا بىللە بېرىپ موللا نەسىردىننىڭ لەتىپىلىرىنى ئېيتىشمىغان بولاتتۇق. ئىدىۋىنا نيېرىڭ باشقا قىتئەدىن كەلگەن ئنگىلىز تىلىدا سۆزلەيدىغان چېچى سېرىق، كۆزى دېڭىز سۈيىدەك كۆك ئايال، لېكىن ئۇنىڭ ئاغزىدىن مەن بىر چاغلاردا دىگەن، ئويلىغان نەرسىلەر چىقىۋاتىدۇ. ئۇنىڭ گەپلىرىنى ئاڭلاپ تېنىم جۇغۇلداپ ئىختىيارسىز تۈگۈلۈپ كەتتىم. - مۇھىد، سىزگە نېمىشقا بۇ گەپلەرنى دەۋاتىمەن، بىلەمسىز؟ - ياق، - دورىخانىدىكى ئىشىڭىزدىن بەك تەسىرلەندىم. باشقىلارغا ئىچىڭىزدىن چىقىرىپ كۆيۈنەلەيدىكەنسىز، قېنى ئېيتىڭە، سىزنىڭمۇ مالائىكىڭىز بولغانمۇ؟         ئۇنىڭ مەندىن مۇشۇنداق سوئالنى سوراپ قىلىشىدىن ئەنسىرەپ ئولتۇرغان ئىدىم بۇ سوئال نېمىشقا يەنە سورىلىدۇ؟ گۈزەلنۇرنى ئۇنتىغان، ئۇنى خىيال قىلمايدىغان، ئۇنىڭغا ئاخىر ئۆچ بولۇپ كۆڭلۈمدىن خۇددى ئەخلەتنى سۈپۈرىۋەتكەندەك سۈپۈرۈپ چىقىرىۋەتكەن تۇرسام ئۇ يەنە نېمىشقا سورىلىدۇ. ئۇ بولمىغان بولسا مەكتەپتىكى ھەممىنى ھەيرەتتە قالدۇرۇپ مۇشۇنداق ئالى مەكتەپكە ئۆتەلىشىم ، شىئەن دىگەن بۇ شەھەرنى كۆرۈپ دوختۇرلۇق كەسپىدە ئوقۇشۇم، ھازىر بۇ جايدا ئولتۇرۇپ بۇ ئىنگىلىز ئايال بىلەن پاراڭلىشالىشىم مۇمكىن ئەمەس بولغانلىقىدىنمۇ؟ بۇ ئايال ماڭا خۇددى خۇدانىڭ ئەمرىنى ئىجرا قىلۋاتقاندەك بىلنىدى - مەنمۇ بىر چاغدا مۇشۇنداق رەسىمدىن بىرنى سىزغان ئىدىم. لېكىن ئۇ ماڭا مالائىكە ئەمەس جىن-ئالۋاستى بولدى. - سەل توختىۋالدىم. بۇ مېنىڭ تۇنجى قېتىم گۈزەلنۇر توغرىلىق بىركىمگە ئېغىز ئېچىشىم. ئۇنى يات بىر تىلدا باشقا قىتئەدىن كەلگەن ئادەمگە دىيىش ماڭا يالغۇز ئولتۇرۇپ كاللىدىن ئۆتكۈزگەن بىر خىل ئەسلىمىدەك بىلىندى. شۇنىڭ بىلەن گېپىمنى خاتىرجەم داۋام قىلدىم.        ئۇنىڭغا گۈزەلنۇرنى قانداق ياخشى كۆرۈپ قالغانلىقىمنى، ئۇنىڭ مېنى ياتىقىنىڭ ئالدىدا ھېچ بىر سەۋەپسىزلا قولىغا ئۆمۈچۈك چېكىۋالغان ئەبلەخكە قانداق ئۇرغۇزغانلىقىنى، كېيىن ئۇ خۇمپەرنى قانداق ئۇچرىتىپ قالغانلىقىمنى، ھازىر بۇ قىزغا قانداق ئۆچ بولۇپ كەتكەنلىكىمنى، قانداق نەپرەتلىنىدىغانلىقىمنى ...سۆزلەپ بەردىم. ئېدىۋىنا بىر ئېغىز  گەپ قىلماي گېپىمنى بۆلمەي ئەستايىدىل ئاڭلىدى. قىزىق گەپلىرىمگە كۈلسە، بەزى گەپلىرىمدىن قايغۇرغاندەك بېشىنى چايقاپ كەتتى. گېپىم  توختاپ ھېكايەمنىڭ كەينى ئۇلىنىپ چىقمايدىغانلىقى ئېنىق بولغاندىن كېيىن ئۇ ئېغىز ئاچتى. - مۇھىد، ئۇ قىز بىلەن ئايرىلىپ كېتىشنىڭ ئالدىدا بىرەر ئىش بىلەن ئازارلىشىپ قالغانمىدىڭلار؟ -ياق، -ئۇنىڭ ئاتا-ئانىسى قىزىنى توي قىلىشقا قىستىغاندىمۇ؟ -بۇ مۇمكىن ئەمەس. ئۇنىڭ ئاتا-ئانىسى تەربىيە كۆرگەن ئادەملەر. -ئۇ قىز ئېغىر كېسەلگە ،ساقايماس كېسەلگە گىرىپتار بولمىغاندۇ؟ -ياق .شۇنداق بولسا مەن بىرىنچى بولۇپ بايقىغان بولاتتىم - ئەمىسە –دىدى  ئۇ ئورنىدىن تۇرۇپ ،- ئۇ زىيانكەشلىككە ئۇچراپتۇ. بۇ ئېھتىمالغا ئەڭ يېقىن. ئۇنىڭغا ئۆچ بولۇپ نەپرەتلىنىشتىن ئاۋۋال ئەمەلى ئەھۋالنى ئېنىقلاپ كۆرسىڭىز بوپتىكەن.         زىيانكەشلىككە ئۇچراش ، ئۇنىڭ ئاغزىدىن بۇ گەپنى ئاڭلاپ تۇرۇپ قالدىم. بۇنى بۇرۇپ ئويلاپ باققانمىدىم ؟ ئېسىمگە ئالالمىدىم. بىراق مېنىڭچە بۇ ئامېرىكىلىق ئايال ئۆزىنى ئەقىللىق چاغلاپ قالدى. گۈزەلنۇرغا ئوخشاش ئىچى كۈچلۈك قىز ئۆزىگە زىياتكەشلىك قىلغان بىر ئەبلەخ بىلەن توي قىلىشغا رازى بولامدۇ؟؟ يەنە كېلىپ مىنى قانداق قىلىپ ئۆزىگە زىيانكەشلىك قىلغان ئادەمگە ئورغۇزىدۇ ؟؟؟ - ئۇ قىز ئامېرىكىلىق بولغان ھالەتتىمۇ سىزگە بۇنداق گەپنى دىيەلمەيدۇ. مۇسۇلمانلار دۇنياسىدا تېخىمۇ شۇنداق. ئۇنىڭ گەپلىرىنى ئاڭلاپ بىردىنلا ئۆزۈمنى ئەقىلسىز ئىكەنمەن دەپ ئويلاپ قالدىم. دىمىسىمۇ ئىككىمىز ئارىسىدىكى ئىشقا مانا تۆت ئايدىن ئېشىپتۇ. ئارىلىقتا نۇرغۇن پەلسەپەلەر بىلەن ئۇچرىشىپ بولدۇم. ئاڭلىمىغاننى ئاڭلىدىم. قىلمىغان خىياللىرىم قالمىدى. لېكىن گۈزەلنۇرنىڭ تۇيۇقسىز ئۆزگىرىشنىڭ باشقا سەۋەبلىرى بارمۇ-يوق دەپ ئويلىنىپ باقماپتىمەن. مېنىڭچە بۇنىڭدىكى سەۋەبلەرنىڭ بىرى مەن گۈزەلنۇرنى ئېھتىياتچان ،شەرمى-ھايالىق قىز دەپ تونۇغان. دەرۋەقە ئۇ شۇنداق ئىدى. - ئۇ ئالدىمىزدا توي قىلماقچى، -دىدىم ئارانلا- ئۇ ماڭا ئۆز ئاغزى بىلەن شۇنداق دىگەن. ئۇنىڭ يىگىتىنى كۆردۈم. ئۇ مېنى ئۇرۇپ يېرىم جان قىلىپ قويغانلارنىڭ بىرى. ئۇنىڭ قولىغا چېكىۋالغان قارا ئۆمۈچۈكى يادىمدىن پەقەت چىقمايدۇ. - بۇ قىزنىڭ شۇنچىلىك رەھىمسىز ئىكەنلىكىدىن ھەيرانمەن.بولۇپمۇ ئۆزى بۇرۇن سۆيگەن ئادىمنى ئۆزىگە شەرمەندىلەرچە ئۇسۇل بىلەن قول سۇنغان كىشى ئارقىلىق ئۇرۇپ باپلىشى ئادەمنى راستىللا چۆچىتىدۇ .بىراق سىزمۇ ئەقىل ئالمايدىغان بىر ئىشىنى قىپسىز .نۆلدىن تۆۋەن 28گىرادوسلىق سوغۇقتا ‹نېمە ئۈچۈن ›دېگەن سۇئالغا جاۋاپ تاپالماي  6 سائەتكە يېقىن ئۇنىڭ دەرىيزىسى ئالدىدا ئەرۋاھتەك ئايلىنىپ  تۇرۇش نىمىدىگەن خەتەرلىك ! سىز ئۇنىڭغا ئۆلۇپ بەرگىلى تاس قاپسىز مۇھىت ،بەلكىم ئۇ ھاياتىڭىزنى مۇشۇ ئۇسۇل بىلەن ساقلاپ قالاي دىگەندۇ … ئادەم شۇنداق ئويلاپ باقسىمۇ يەنىلا بىئارام بولىدىكەن،نىمىدىگەن تەس كۈن بۇ !!؟ قىزلار بۇنداق ۋاقىتتا ئۆزىنى سۆيگەن يىگىتىدىن قاچۇرۇشقا، ئۇنىڭ كۆزىگە كۆرۈنمەسلىككە  تىرىىشىش تولا بولسا  يالغان گەپ بىلەن بىلەن ئىشلىرىنى يىغىشتۇراتتى ،بۇ ئىشڭلا بەك چەكتىن ئىشىپ كىتىپتۇ،،،   ئورنۇمدىن قوزغىلىپ بېرىپ ياتاق دەرىزسىنىڭ پەردىسىنى قايرىدىم. ئەينەكتىن چۈشكەن ئاينىڭ يورۇقى ئۆيگە كىرىپ چىراغ نۇرى بىلەن قوشۇلۇپ كەتتى. سائىتىمگە قارىدىم. 5:30 جۈمە. - بامدات نامىزىنى ئوقۇۋالسام بولامدۇ؟ - ئەلۋەتتە، -نىېيرىڭ شۇنداق دەۋېتىپ ماڭا تازىلىق ئۆيىنى كۆرسىتىپ قويدى. تاھارەت ئالدىم. نامىزىمنى ئوقۇپ بولغاندىن كېيىن نيېرىڭ ئەتىگەنلىك چاي تەييارلاپ ئالدىمغا قوىدى. داستىخاندىكى بولكىنىڭ مۇسۇلمانچە دىگەن ئەسكەرتىلىشى بولسىمۇ قورسىقىم ئاچمىغاچقا يىگۈم كەلمىدى. - قانداق قىلماقچىسىز، مۇھىد ؟ - ئۇ چاي قويۇۋېتىپ سورىدى. - ھازىر كاللامدا نىمە ئىش قىلىش توغرىلىق بىرەر نەرسە يوق. - نۇرغۇن ئىشلارنى ۋاقىت ھەل قىلىدۇ، ياخشى ئارام ئېلىپ كەيپىياتىڭىزنى تەڭشەپ تۇرسىڭىز بەزى ئىشلارنىڭ ئۆزلىكىدىن ھەل بولۇپ كېتىۋاتقانلىقىنى كۆرىسىز. كۆرگەنلا نەرسىنى كاللىغا قاچىلىۋالغاننىڭ پايدىسى يوق. سەھەردە شىئەننىڭ سىرتىدىكى تەيبەيشەن دىگەن جايغا چىقىمەن. بولسا مەن بىلەن بىللە بېرىڭ. ئۇ يەرنىڭ مەنزىرىسى سىزگە چوقۇم ئاراملىق بېرىدۇ، قانداق؟ - ئۇيقۇم كېلىپ كۆزلىرىم يۇمۇلۇپ ئىرادەمگە بوي بەرمەي قالدى. - بىردەم ئارام ئېلىۋالامسىز؟         10 مىنۇت كۆزۈمنى يۇمىۋېلىپ ئاندىن مەكتەپكە ماڭماقچى بولدۇم.لىكىن شۇ ياتقانچە ئۇخلاپ قاپتىمەن، كۈچلۈك كۈن نۇرى كۆزۈمنى چېقىپ مېنى ئويغىتىۋەتتى. قارىسام كىيىملىرىم بىلەن مېھمانخانىدا يېتىپتىمەن. كۆزۈم تامغا ئېسىقلىق سائەتكە چۈشتى. ئۇنىڭ كىچىك ئستىرىلكىسى12نى چوڭ ئىستىرىلكىسى 10نى كۆرسىتىپ تۇراتتى. مەكتەپكە بارماپتىمەن- دە! بېشىم يەڭگىل، ئۆزەمنى يېنىك ھېس قىلدىم ۋە ئەتراپقا قاراپ ئامېرىكىلىق ھېلىقى ئايالنى ئىزدەشكە باشلىدىم. - نيېرىڭ، ئىدىۋىنا خانىم ... سادا يوق. قارىسام تېلىۋىزورنىڭ ئۈستىدە قەغەز-قەلەم تۇرىدۇ. ئۇنىڭدىكى خەتنى ئوقۇشقا باشلىدىم.         سالام مۇھىد: دەرسكە كېچىكىپ قالدىغان بولدىڭىز،لېكىن سىزنى ئويغىتىۋەتكۈم كەلمىدى. سىز ئۇخلاپ قېلىپ يېرىم سائەتتىن كېيىنلا ۋاقتىم توشۇپ ماڭىدىغان بولۇپ قالدىم ، سىز بىلەن بۇنداق خوشلاشقىنىمدىن بەكمۇ خىجىلمەن. سىزگە داۋاملىق خەت يېزىپ تۇرىمەن. مەن سىز ئېيتىپ بەرگەن گۈزەلنۇر دىگەن قىزغا قىزىقىپ قالدىم. مېنىڭچە سىزنىڭ بۇ ئاياغلاشمىغان ھېكايىڭىزغا نۇرغۇن يېشىلمىگەن سىرلار يوشۇرۇنغان . مۇشۇنداقلا بولدى قىلسىڭىز سىز ئاللاھنىڭ نامىنى سۈيىئىستىمال قىلىپ ئۆزىڭىزنى ئۆزىڭىز ئالداپ قويغان بولىسىز. جېنىم تېنىمدا بولسا بۇ ھېكايىڭىزنىڭ كەينىنى بىلگىم بار. مەن قېرىپ قالدىم. تېنىمنى كېسەل چىرمىۋالدى. ھېكايەممۇ تۈگەپ قالدى. ئەرەبلەردە « تۆگىنىڭ كەينىدىن تۆگە»  دىگەن گەپ بار. پەرۋەردىگار  سىزنىڭ ئاق، سەممىي كۆڭلىڭىزنى دۇنيانىڭ مەينەتلىرى بىلەن ئەمەس گۆھەرلىرى بىلەن تولدۇرسۇن !ئامىن!                                         ئېدىۋىنا نيېرىڭ              خەتنى پۈكلەپ يەرگە تاشلىدىم .چېچىمنى سىقىملاپ ئولتۇرۇپ ئاتام كۆرمىگەن بۇ چەتئەللىككە شەخسى ئىشلىرىمنى دەپ يۈرگەنلىكىمدىن پۇشايمان قىلدىم. مەكتەپكە يېتىپ كېلىپ دوختۇرخانىغىمۇ چىقماي ياتاققا كىرىپ كارىۋىتىمدا تورۇسقا قاراپ بىر ئاز ياتقاندىن كېيىن بۇ ئايالنىڭ پەيدا بولىشىنى خۇدانىڭ ئورۇنلاشتۇرىشى ھېسابلاپ ئۇنىڭغا دىگەنلىرىمدىن ئۆكۈنۈپمۇ كەتمىدىم. لېكىن ئۇنىڭ گۈزەلنۇرنى زىيانكەشلىككە ئۇچرىغان بولىشى مۇمكىن دەپ ماڭا گەپ ئۆگىتىپ قويىشى بىلەن كاللامدا ئاران تىنجىپ قالغان كونا خامان يەنە سورىلىپ چىقىپ مېنى ئارامسىزلاندۇرۇشقا باشلىدى.           ئەگەر ئۇ راستىنلا زىيانكەشلىككە ئۇچرىغان بولسا نېمىشقا ماڭا ئۇدۇللا دىمەيدۇ؟ راستىنلا باشقىلارنىڭ خورلىشىغا ئۇچرىغان بولسا ئۇنى كەچۈرىۋېتىشىم تامامەن مۇمكىنغۇ؟ دىمەك بۇ ئېھتىماللىق ئەمەلىيەتتىن يىراق. ئەجىبا مەن ئۇ ئامېرىكىلىق دىگەندەك قىزلارنىڭ مەيدانىدا تۇرۇپ مەسىلىلەرنى ئويلىيالمايۋاتامدىم ؟ ياكى مۇسۇلمان دۇنياسىدا ياشاۋاتقان ئاياللارنىڭ پىسخىكىسىدىن بىخەۋەر بولغاچقا ئۇنى چۈشىنىشكە ئامالسىز قېلىۋاتامدىم؟ ياق، مەن گۈزەلنۇر مەجبۇرلىنىپ خورلۇق تارتقاندا ئەرلىك غورۇرىنى كۆتۈرۈپ چىقىدىغان ئۇنداق «ھەقىقي ئەركەك» مۇھىد ئەمەس. ئۇ ئۆزى بۇزۇلغان بولسا بۇ ئايرىم مەسىلە، گۈزەلنۇر مەندىن مۇشۇنچىلىك بىر نەرسىنى ئۇمىد قىلالمايدىغان بولسا ئارىمىزدا يەنە قانداق مۇناسىۋەتتىن سۆز ئاچقىلى بولىدۇ؟  بۇ ئېھتىماللىقنى پۈتۈنلەي چەتكە قاقتىم. بىراق بۇ بولمىسا زادى نىمە ئىش ئۇنىڭ مۇشۇنداق تۇيۇقسىز ئۆزگىرىشىگە سەۋەپ بولدى؟ بۇنىڭ چوقۇم بىر سەۋەبى بار. نيېرىڭ بۇ پەرەزنى خاتا قىلغان تەقدىردىمۇ، ئۇنىڭ « ھېكايىڭىز ئاخىرلاشماپتۇ، ئۇنڭغا نەپرەتلىنىشكەئالدىراپ كېتىپسىز. ئاۋۋال ئەھۋالنى ئۇقۇپ بېقىپ ئاندىن بىر قارارغا كەلسىڭىزمۇ كېچىكمەيسىز» دىگىنى خاتا بولمىغانىدى.           ئورنۇمدىن تۇرۇپ ياتاقتىن چىقتىم ۋە شىئەن شەھەر مەركىزىدىكى شەنشى ئۆلكىسى بويىچە ئەڭ چوڭ شىنخۇا كىتابخانىسىغا باردىم. ئۇ يەردە زىيانكەشلىككە  ئۇچرىغان ئاياللارغا ئائىت يىزىلغان كىتابلارنى ئىزدىدىم. « …زىيانكەشلىككە ئۇچرىغان قىزلارنىڭ ۋەقەدىن كېينكى ئىنكاسى ۋە روھى ھالىتىدىكى ئۆزگىرىشلەر ۋەقەنىڭ ئېغىر-بېنىكلىكى، ئۆزىنىڭ مىجەز-خاراكتېرى ، شۇ جەمئىيەتنىڭ ئەھۋالى قاتارلىق ئامىللارغا قاراپ بىر-بىرگە ئوخشاپ كەتمىسىمۇ لېكىن بىر قىسىم ئىنكاسلار مۇتلەق كۆپ قىسىم قىزلاردا ئورتاق كۆرۈلىدۇ. بۇ ئورتاقلىقنى چۈشىنىش ۋە ئۇنىڭدىن بولغان قىينچىلىقلارنى يېڭىش زىيانكەشلىككە ئۇچىرىغان قىزلارنىڭ كېيىنكى ھايات يولىنى ساغلام ئېلىپ مېڭىشىغا ياردەم بېرىدۇ.         قورقۇش: ئۇلار مۇشۇنداق ئىشنىڭ ئۆزىگە قايتىدىن كېلىشىدىن قورقىدۇ. جەمئىيەتنىڭ تونۇشلىرىنىڭ ئۆزىنى ئەيىپلىشىدىن ۋەھىمىگە چۈشىدۇ. ئۆزىگە ناتونۇش جايلاردىن ھەتتا ئۆزىگە تونۇش ئادەملەردىنمۇ قورقىدۇ.         جىنايەت تۇيغۇسى : زىيانكەشلىككە ئوچرىغۇچى ئۆزىنى مەلۇم قارار ، ھەرىكەت ، سۆز بىلەن مۇشۇنداق ئىشنىڭ كېلىپ چىقىشىغا سەۋەپ بولغاندەك ھېس قىلىدۇ. دائىم «ۋارقىرىغان بولسام، كۈچەپ ئېلىشقان بولسام، تېزرەك يۈگۈرگەن بولسام…بۇ ئشىتىن ساقلىنىپ قالاتتىم.» دەپ ئويلايدۇ.         ئاچچىقلىنىش: بۇ ناھايىتى تەبىئى ئىنكاس. زىيانكەشلىككە ئۇچرىغۇچى ئۆزىنىڭ باشقىلار تەرىپدىن پايدىلىنىپ كېتىلگەنلىكىنى ئىنسانى ئىززەت-ھۆرمىتىنىڭ  دەپسەندە قىلنىپ غۇرۇرىنىڭ يەرگە ئۇرۇلغانلىقدىن قاتتىق خورلۇق ھېس قىلدۇ. ئەگەر قارشى تەرەپ ئۆزىنىڭ تونۇشى بولسا بۇ خىل ئىنكاس تېخىمۇ كۈچلۈك بولىدۇ.         نومۇس ھېس قىلىش: ئۇلار ئۆزلىرىنىڭ شەخىسيىتىگە قىلىنغان بۇ ھۇجۇمدىن نۇمۇس تۇيغۇسىغا كېلىدۇ. ۋەقەنىڭ ئەسلىمىسى ئىختىيارسىز تەكرارلىنىپ بۇ تۇيغۇنى كۈچەيتىدۇ.        ئۆزىنىڭ كونتروللىقىنى يوقىتىش –ۋەقەنىڭ جەريانى ئۇلارنى چارىسىز، ئامالسىز ۋە ئاجىز ئورۇنغا چۈشۈرۈپ قويغان بولغاچقا ئۆزلىرىنى بەكمۇ بىچارە ھەم يۆلەنچۈكسىز ھېس قىلىدۇ. بەزى ئەھۋاللاردا يېقىن ئادەملىرىنىڭ ئۆزىگە يېتەرلىك كۈيۈنمەيۋاتقاندەك تەسىراتقا كېلىپ قالىدۇ» «بۇنداق ئىشلاردا قىزلار كۆپىنچە ئەيىپلىنىش ئوبيېكتى بولىدىغان جەمئىيەتلەردە زىيانكەشلىككە ئۇچرىغۇچى باشقىلارنىڭ بۇ ۋەقەدىن خەۋەر تېپىپ ئۆزىنىڭ باش كۆتىرەلمەي قېلىشىدىن قورقۇپ دېلو مەلۇم قىلمايدۇ ۋە بۇنى قەلبىدە سىر قىلىپ ساقلاپ تاكى ئاشكارىلىنىش زۆرۈرىيىتى تۇغۇلمىغىچە باشقىلاردىن يوشۇرىدۇ. ئەگەر قارشى تەرەپ ۋەقەدىن كېيىن شۇ قىز بىلەن ئۆيلىنىش تەلىپىنى قويسا مۇتلەق كۆپ ساندىكى قىزلار قارشى تەرەپنىڭ تەكلىپىنى ھەتتا كېيىن ئاجرىشىپ كېتىمەن دىگەن خىيال بىلەن قوبۇل قىلىدۇ»        مۇشۇ قۇرلارنى ئوقۇۋېتىپ يۈرىكىم چىغىلداپ كەتتى. كىتابنى دەرھال يېپىپ جايىغا ئېلىپ قويۇۋېتىپ كىتاب تۇتقان قوللىرىمنىڭ ئىختىيارسىز تىتىرەپ كېتىۋاتقانلىقىنى سەزدىم. خىيالىمغا ئىدىۋىنانىڭ «ئۇ ئامېرىكىلىق بولغان تەقدىردىمۇ سىزگە بۇ گەپنى دىيەلمەيدۇ» دىگەن گېپى بىلەن گۈزەلنۇرنىڭ «مەن  توي قىلىمەن» دىگىنى ئۆز-ئارا باغلىنىپ مەندە بىر خىل چۆچۈش پەيدا قىلىدى.        تۆت قەۋەتلىك بۇ كىتابخانىنىڭ ئىككىنچى قەۋىتىگە چۈشكەندە بالىلار كىتابلىرى رايونىدىن ئۆتۈشكە توغرا كەلدى. ھەرخىل كارتون رەسملىرى چۈشۈرۈلگەن رەڭلىك كىتابلارغا قاراپ بالىلىق چاغلىرىمغا قايتىپ بىراقلا بۇ مۇرەككەپ دۇنيانىڭ مۇرەككەپ چىگىش سوئاللىرىدىن قۇتۇلغۇم كېلىپ كەتتى. ئىختىيارسىز بىر كىتابنى ئېلىپ ئىچىنى ئاچتىم ۋە ئۇنىڭدىكى بالىلار ھېكايىسى «شامال بىلەن قۇياش» دىگەن ھېكايىنى بىردەمدىلا ئوقۇپ بولۇپ  كىتابخانىدىن چىقىپ كەتتىم.

bargiya

	بۇدا تېزراق يېزىڭچۇ.. بەكلا جەلىپ قىلارلىق يېرىگە كەلدى...

nurkizi

	تور دۇنياسىدا ئۇقۇغان گۈلەننىڭ <ئامرىكىدىكى مۇساپىر تۇيغۇلار> دىگەن ئەسىرىدىن كىيىن ،ئەڭ قىزىقىپ ھەم ئويلۇنۇپ ئۇقۇغان ئەسەر بوپتۇ بۇ،گەرچە ئەدەبىيات نەزىريەلىرىدىن بەك تۇلۇق خەۋەردار بولمىساممۇ، ئەسەرگە ئەدەبىي نوقتىدىن ئەتراپلىق باھا بىرەلمىسەممۇ، ئۈزەمنىڭ ھىسسىي تۇنۇشۇم بويىچە دىسەم ھازىر مەتبۇئاتلاردىنمۇ بۇنداق ئىسىل ئادەمنى ئويلاندۇرۇپ ئىچىگە ئەكىرىپ كىتىدىغان ئەسەرلەرنى تاپماق تەس.سىزدىن ھەم ئەسىرىڭىزدىن شۇنداق سۈيۈندۇم.ئەسەردىكى مول پەلسەپىۋى پىكىرلەر ئەسەرگە شۇنداق تەبئى يۇسۇندا سىڭىپ مېڭىۋاتىدۇ.ئەسەرمۇ شۇنداق ئەركىن ئۇسلۇپتا كىتىۋاتىدۇ.    مەنمۇ گۈزەلنۇرنى زىيانكەشلىككە ئۈچرىغان بولىشى مۇمكىن دەپ ئويلىغان،ئاياللىق مەيدانىم بويىچە دىسەم ھەرقانداق بىر ۋىجدانلىق قىز ئۈزى كۆڭلىدىن سويگەن ئادەمگە ناپاك ۋۇجۇدىنى تەقدىم قىلىشنى خالىمايدۇ،ھەم بۇ ئىشنىڭ كىيىنكى ھاياتىغا قارا سايە بۇلۇپ قېلىشىنى خالىمايدۇ،گۇزەلنۇرنىڭ سىز باشتىن تەسۋىرلەپ كىلىۋاتقان خاراكتىرى بويىچە بولغاندا ئۇ بىر مۇستەقىل پىكىرگە ئىگە،دادىل،ئادەتتىن تاشقىرىراق قابىلىيەتكە ئىگە بولغان ئىنتايىن ئاز ساندىكى مۇنەۋەر قىزلىرىمىزنىڭ بىرى،لېكىن ئادەم بەرىبىر ھەممە تەرەپتىن مۇكەممەل بۇلۇپ كىتەلمەيدۇ،بەزى ئىشلارنى سىز قەتئىي خالىماي تۇرۇپمۇ قىلىپ سالىسىز،گۈزەلنۇرنىڭ شۇنداق ئادەتتىكى بىر خاتالىقى بەلكىم ئۇنى ئەجەللىك ھەم ئۆمۇرلۈك خاتالىققا سورەپ بارغان بۇلىشى مۇمكىن،بۇ پەقەت مىنىڭ قارىشىم،قالغىنىغا ئەسىرىڭىزنىڭ داۋامىنى ساقلايمەن.

dellyar571

	يىڭى باپ ياتاقتىكى ھەممىمىز يېتىشقا تەمشەلگەندە تېلىفون سايرىدى - ....009714،بۇ قانداق نومۇر؟ - دىدى ياتاقداشلىرىمنىڭ بىرى. - ماۋۇ نومۇرنىڭ ئۇزۇنلىقىنى ، كىمنىڭ تېلىفونى بۇ؟ - دىدى يەنە بىرى. كارىۋىتىمدىن ئالدىراپ چۈشۈپ تېلىفوننى قولۇمغا ئالدىم. - ئەسسالامۇ ئەلەيكۇم. - ۋەئەلەيكۇم ئەسسالام، مۇھىد بۇ سەنمۇ؟ - مەن، ئەلى ئاۋازىڭنى تونۇدۇم. قانداق ئەھۋالىڭ؟ سالامەتمۇسەن؟ سەن ھازىر نەدە؟ - ئەرەب بىرلەشمە خەلىپىلىكى دۇبەيدە، ساڭا خەت يازسام بەرىبىر كۆرمەيدىكەنسەن. ئۇدۇل تېلىفون قىلىشىم. - قانداق يەردە تۇرىۋاتىسەن؟ ئىجارىسى قىممەتمىكەن؟ - پۇلنىڭ گېپىنى قىلما ، مەندە پۇل جىق. ئوقۇش پۇلۇڭنى كۆتۈرىۋېتەيمۇ يا،- ئۇ شۇنداق دەپ كۈلۈپ كەتتى. - نېمە ئىش قىلىۋاتىسەن؟ - نېمە ئىش بولاتتى، تەرجىمانلىق. بىرياقتىن ھۈنەر ئۆگەنگەچ بىر ياقتىن تىجارەت قىلىۋاتىمەن.... ئۇ تېلىفوننى ئنتېرنىت تورىدىن ئۇرۇپتۇ. بىز يېرىم سائەتكە يېقىن پاراڭلاشتۇق. گېپىگە قارىسام ئۇ جىق ئوڭۇشسىزلىققا ئۇچرىمايلا ئۇ يەردىكى تۇرمۇشىنى تەرتىپكە چۈشۈرىۋاپتۇ. ئۆزىنىڭ گېپى بويىچە ئېيتقاندا نەزەر دائىرىسىمۇ كېڭىيىپتۇ. لېكىن ئەسلىدىكى زەم زەم ۋەكالەتچىلىكىنى ئېلىپ خەلقئارا سودا ئۆگىنىمەن، ئاندىن مەھسۇلات ئىشلەپ ئوتتۇرا شەرقتە تونۇلىمەن دەيدىغان تىجارەت خىيالىدا ھېچقانداق ئۆزگىرىش بولماپتۇ. ئۇنىڭغا « شۇ يەردە تۇرۇپمۇ ئەمىلى تىجارەتنىڭ يولىنى كۆرۈپسەن. ۋەكالەتچىلىكنىڭ ئەمدى ئەھمىيىتى قالمىغاندۇ» دىسەم ئۇ « ئۇ بىر ئايرىم مەسىلە، شىنجاڭنىڭ ئىچىدىكى تىجارەت يولىنى بىلشكە ۋەكالەتچىلىك يەنىلا ئەڭ ياخشى ئۇسۇل» دىدى. گەپ ئارىلىقىدا ئۇ يېرىم يىللىق پىراكتىكامنى شىنجاڭدا قىلىش ئىمكانىيىتى بار-يوقلىقىنى سورىۋېدى، شۇنىڭ يولىنى قىلىدىغانلىقىمنى دىدىم. بۇنى ئاڭلاپ ئۇ بەكمۇ خوش بولۇپ كەتتى ھەمدە ئۈرۈمچىدە تۇرۇپ ئۆزى ئۈچۈن نېمە ئىش قىلىپ بېرەلەيدىغانلىقىمنى ناھايىتى تەپسىلى، ئېنىق دىدى. تۇتىۋالالماسلىقىمدىن ئەنسىرەپ بۇلارنى بىر كىچىك قەغەزگە يېزىۋالدىم. ئەلى مېنىڭ ئاغىنىدارچىلىققا يارايدىغانلىقىمنى ماختاپ بىر مىنۇتتىن ئارتۇقراق سۆزلىدى . ئەمەلىيەتتە مېنىڭ بۇ ئويۇمنىڭ ئۇنىڭ بىر چاغلاردىكى نۇتقى ۋە ئارىمىزدىكى مۇناسىۋەتلەر بىلەن ئالاقىسى يوق ئىدى. ئەلىنىڭ تېلىفونىنى ئالغان كۈننىڭ ئەتىسى مەسئۇل مۇئەللىمنىڭ يېنىغا كىرىپ پىراكتىكامنىڭ كېيىنكى يېرىمىنى شىنجاڭ تىببىي ئۇنۋېرسىتىتى قارمىقىدىكى 1- دوختۇرخانىدا قىلىش ئىلتىماسىمنى سۇندۇم. مەن «جىگەر كېسىلى» بولۇپ قالغاندىن بۇيان مەسئۇل مۇئەللىمىمىز ماڭا ئالاھىدە كۆيۈنىدىغان بولۇپ كەتكەنىدى. ھەتتا سىنىپ يىغىنلىرىدا بىر نەچچە قېتىم « ساۋاقداشلار، مۇھىدتىن ئۆگىنىشىمىز كېرەك. گەرچە ئۇنىڭ سالامەتلىكى ياخشى بولمىسىمۇ دەرسلەرگە قىلچە دەخلى يەتكۈزمەي ئوقۇغۇچىلارنىڭ ئالدى بولۇپ مېڭىۋاتىدۇ» دەپ مېنى ماختىغانىدى. بۇ قېتىم ئىلتىماسىمنى قولىغا ئېلىپ ماڭا ھېسداشلىق قىلىدىغانلىقى توغرىسىدىكى گەپلەرنى ئۇنتۇپ قالماي قوشۇپ بەلگىلىمە بويىچە پىراكتىكىنى بەلگىلەنگەن دوختۇرخانىدا قىلىش لازىملىقىنى، مەكتەپنىڭ باشقا شەھەرلەردىمۇ بەلگىلەنگەن پىراكتىكا بازىلىرىنىڭ بارلىقىنى لېكىن ئۈرۈمچىدە يوقلىقىنى ئەسكەرتىپ مېنىڭ بۇ ئالاھىدە ئەھۋالىمنى مەكتەپنىڭ ئالاھىدە ئويلىشىشى لازىملىقىنى ئېيتتى. لېكىن ئۇ مەكتەپ قوشۇلغان تەقدىردىمۇ بۇ ئىشنىڭ مۇۋەپپەقىيەتلىك بولۇش-بولماسلىقى ئۈرۈمچىدىكى مەن كۆرسەتكەن دوختۇرخانىنىڭ ئىنكاسىغا باغلىق ئىكەنلىكىنى ئالاھىدە تەكىتلىدى. بىر ھەپتە ئۆتۈپ كەتتى. مۇئەللىم ماڭا ئۇ توغرىلىق گەپ قىلماي ئىچىم تىتىلداشقا باشلىدى. ئاخىر تاقەت قىلالماي مۇئەللىمدىن سۈرۈشتە قىلمايلا ئاق بىناغا كىرىپ ئوقۇتۇش ئىشلىرى ئىشخانىسىنىڭ ئىشىكىنى چەكتىم. -كىرىڭ،- ياش بىر ئايالنىڭ ئاۋازى ئاڭلاندى. ئىشىكنى يېنىك ئىتتىرىپ ئېچىپ كىردىم ۋە ئۇ ئايالغا كېلىش مەقسىتىمنى چۈشەندۇرگەندىن كېيىن بۇ ئايال لى فامىلىلىك بىرىنچى باشلىقنىڭ بۇنداق ئىشلارغا مەسئۇل ئىكەنلىكىنى ئېيتىپ بەردى. ئۇنىڭ ئىشخانىسىغا كىرىپ ئۇ لى فامىلىلىك ئوقۇتقۇچىنىڭ گېرمانىيىگە ئوقۇشقا كەتكەنلىكىنى، كېلەر ھەپتە قايتىپ كېلىدىغانلىقىنى ئۇقتۇم . ئىشخانىدىن چىقماي ھازىر شۇ ئادەمنىڭ خىزمىتىنى قىلىدىغان مەسئۇل ئوقۇتقۇچى بىلەن كۆرىشىدىغانلىقىمنى ئېيتىپ چىڭ تۇرىۋالدىم. ئىشخانىدىكى باش ئوقۇتقۇچى مېنى « بۆلۈم باشلىقى بىلەن كۆرۈشۈپ باق» دەپ چىقىرىۋەتتى. ئىككى قىزىل بايراق ئۈستىلىگە ئېلىپ قويۇلغان، چىرايىدىن گېنىراللاردەك سۈر ۋە كەسكىنلىك چىقىپ تۇرغان بۆلۈم باشلىقى بىلەنمۇ كۆرۈشتۈم. -بۇ مەكتەپنىڭ بەلگىلىمىسگە خىلاپ، -دىدى ئۇ ماڭا چۈشەندۈرۈشكىمۇ پۇرسەت بەرمەي،- ھەممە ئوقۇغۇچى ساڭا ئوخشاش ئۆيلىرىگە قايتىپ پىراكتىكا قىلىمىز دەپ جېدەل قىلسا بىز مەكتەپنى قانداق باشقۇرىمىز؟ - لېكىن ئاپام ئاغرىپ قالغان. ئۇ دەل مەن پىراكتىكا قىلىشنى ئىلتىماس قىلغان دوختۇرخانىدا داۋالىنىۋاتىدۇ،- ئىلتىماسىمدىكى بايانلارنىڭ ھەممىسىنى ئۇنڭغا دىيىشكە تەمشەلدىم. -بولدى،بولدى، مەن ئىلتىماسىڭىنى كۆرۈپ بولغان. زادى ئۆيگە قايتىمەن دىسەڭ –دىدى ئۇ بىر ئاز ئويلىنىپ ،-بىر يىل ئوقۇشتىن چېكىن. گىرمانىيىدىن قايتىپ كېلىدىغان لى فامىلىلىك ئوقۇتقۇچىنىڭ مېڭىشتىن ئاۋاللا مېنىڭ مەسىلەمنى بىر تەرەپ قىلىپ بولغانلىقىنى بىلىپ يەنە بىر ھەپتە ساقلاشنىڭمۇ ئەھمىيىتى يوقلىقىنى چۈشەندىم. بىراق ئوقۇشتىن چېكىنىش مەن ئەسلا ئويلاپ باقمىغان تاللاش ئەمەس ، مۇمكىن بولمايدىغان تاللاش. ئاق كۆڭۈل سىنىپ مەسئۇلىمنى ئىزدىسەمچۇ؟ ئۇ ئىلتىماسىمنى مۇشۇ يەرگە ئەكىرگەن ئادەم تۇرسا قانداق قىلالايتتى. ئاستا ئورنۇمدىن تۇرۇپ ئىشىك تەرەپكە ماڭدىم. - مۇھىد،-بىرسى مېنىڭ ئىسمىمنى چاقىرىۋاتاتتى. كەينىمگە ئۆرۈلدۈم، ئۇ بايىقى بۆلۈم مەسئۇلى ئىدى. ئۇ مېنىڭ ئىسمىمنى قانداق بىلگەندۇ؟ - فاڭ مۇئەللىم سېنى بەك ماختاپ بەردى. ئاپاڭنىڭ كېسىلىنى بىزنىڭ دوختۇرخانىغا ئەكىلىپ داۋالىساقمۇ بولىدۇ. مەن ئۇنى ئاشقازان كېسىلىنى داۋالاش مەخسۇس تۈر تەتقىقاتىغا بىمار قىلىپ تىزىملىتىپ قويسام ئۇ داۋالىنىش خىراجىتىدىن خالى بولىدۇ.- ئۇ شۇنداق دەپ بىگىز بارمىقىنى ئۈستىلىدىكى پارتىيە بايرىقىغا تەككۈزۈپ تۇرۇپ ماڭا تىكىلدى. –سىلەر شىنجاڭنىڭ سەھىيە ئىشلىرىنى گۈللەندۈرۈشتىكى ئاساسي ئىختىساس ئىگىلىرى بولۇپ قالىسىلەر. ئۆگىنىشكە داۋاملىق كۆڭۈل قويۇشىڭنى ئۈمىد قىلىمەن. ھازىرقى ۋاقتىڭلار تۆت يىلدىن بۇيان ئۆگەنگەن بىلىمىڭلارنى تەدبىقلايدىغان مۇھىم مەزگىل، ۋاقىتنى چىڭ تۇتقىن. بۆلۈم مەسئۇلىنىڭ بۇ گەپلىرىگە مىيىقىمدا كۈلۈپ قويدۇم. - رەھمەت مۇدىر، ئاپام بۇ يەرگە كېلەلمەيدۇ ، قولايسىز. مەن چىقاي. شۇنداق دەپ تۇرۇشىمغا سىنىپ مەسئۇلىمىز فاڭ مۇئەللىم كىرىپ قالدى ۋە مېنى كۆرۈپ «بۇ يەردە نىمە قىلۋاتىسىز، مۇھىد؟ » دەپ سورىدى.«مانا،كۆرىۋاتىسىز» دىگەندەك مۈرەمنى كۆتۈرۈپ قويدۇم. ئۇ چىقىپ كېتىڭ دەپ ماڭا ئىشارەت قىلدى. ئىشىكنى يېپىپ تۇرىشىمغا ئىشخانىدا بولىۋاتقان گەپ-سۆزلەر قۇلىقىمغا كىردى. - مۇدىر، مۇھىد كۆرسەتكەن دوختۇرخانا بىلەن سۆزلەشتىم. ئۇلار قوشۇلىدىكەن. - سىز بۇ ئوقۇغۇچىنىڭ ئىشىغا بەكمۇ ئەستايىدىل بولۇپ كېتىۋاتىسىز. قائىدىنى تۈزۈپ قويۇپ ئىجرا قىلمايمىزمۇ؟ سىزگە قانچە قېتىم دەيمەن. - مۇھىد ئالاھىدە يەنە كېلىپ پەۋقۇلادە ياخشى ئوقۇغىچى ، ئۇ مەكتەپكە كىرگەندىن بۇيان تەڭ يىللىق ساۋاقداشلىرى ئىچىدە بىرىنچىلىكنى قولدىن بەرمەي ئوقىۋاتىدۇ.مەن ئوقۇتقۇچىلىق ھاياتىمدا ئۇدا تۆت يىل ئەڭ يۇقىرى ئوقۇش مۇكاپاتى ئىلىپ  ئوقۇيالغان بىرسىنى كۆرۈپ باقمىدىم .يەنە كېلىپ ئۇنىڭ مەكتەپكە كەلتۇرگەن شەرىپى ئاز ئەمەس ئۆلكىلىك ئالى مەكتەپلەر ئارا  ئىنگىلىزچە نۇتۇق سۆزلەش مۇسابىقىسىدە ئۇدا ئۈچ نۆۋەت  بىرىنچى بولدى. يەنە كىلىنتون مەكتىۋىمىزنى زىيارەت قىلغاندا ئۇنىڭ زۇڭتۇڭدىن  سورىغان سۇئالى ئىسڭىزدىدۇ؟ مەكتىپىمىز شۇ قېتىم پۇتۇن مەملىكەتىكى ئالى مەكتەپلەرنى ھەۋەسلەندۇرگەن ،باشلىق ئۇنىڭ يەنە جىگەر كېسىلى بار. لېكىن ئەزەلدىن ۋايساپ باقمىدى.  مۇھىد ھەقىيقەتەن يۇلتىزى پارلاۋاتقان ياش  ئۇ ... - بولدى فاڭ مۇئەللىم،بەلگىلىمە دىگەن بەلگىلىمە . بۇ ئشنى قايتا تىلغا ئالماڭ. مېنىڭ بىر ئوقۇغۇچى ئۈچۈن كۈندە بىر سائەت ۋاقىت ئاجراتقۇم يوق. بۇ گەپلەرنى ئاڭلاپ فاڭ مۇئەللىمنىڭ تىرىشچانلىقىنىڭمۇ ئەھمىيەتسىز بولىدىغانلىقىنى بىلىپ ئىشىك ئالدىدىن تېز-تېز مېڭىپ كەتتىم. مەمۇرى بىنادىن چىقىپ مەكتەپنىڭ كۆل بويىدا بىردەم تۇرغاندىن كېيىن ياتاققا كىردىم. ياتاقتا ھېچكىم يوق. يەشىكىمنى قويۇپ قويغان يەردىن تارتىپ چىقىرىپ ئۇنىڭدىن« قان سېستىمىسى كېسەللىكلىرى» دىگەن رەڭلىك كىتابنى سۇغۇرۇپ ئېلىپ گۈزەلنۇر بىر يىل بۇرۇن قايتۇرۇپ بەرگەن كونۋېرتنى يەنە بىر قېتىم ئاچتىم. بۇ قېتىم ئۇنىڭ رەسىمىنى ئېلىش خۇددى گۆر كولاپ كېپەن ئېچىشتىنمۇ تەس ۋە ۋەھىمىلىك بىلىنىپ كەتتى. كونۋېرتنى ئېچىۋېتىپ ھەتتا قەغەزنى قۇرت يەپ كەتكەن بولسا دىگەننى ئۈمىد قىلدىم. ئەپسۇس، ئۇ يەنىلا شۇنداق . ئۇنىڭ گېپى راست بولسا ، بۇ قىز ئۇزۇنغا قالماي توي قىلىدۇ. ئۇ توي قىلىدىغان ئادەم باشقا بىرى ئەمەس بەلكى مەن چىرايىنى كۆرمەي تۇرۇپ تايىقىنى يىگەن خۇمپەر! ئۇ نېمىشقا بۇنداق قىلىدۇ؟ بۇ سوئالنى ھەرقېتىم سوراش ئازاپ، سورىماسلىق شەكلى ئۆزگەرگەن يەنە بىر خىل ئازاپ. ئەگەر ئەلى ئۈمىد قىلغاندەك پىراكتىكىنىڭ ئاخىرىنى ئۈرۈمچىدە قىلالمىسام ئۇ توي قىلغاندىن كېيىن نىمە ئىش ئىكەنلىكىنى ئېنىقلاش ئىشىكىنى تاقامدىم؟ مېنى ھېلىقى ئۆمۈچۈك كۈتىۋالامدۇ؟ ئۇ راستىنلا زىيانكەشلىككە ئۇچرىغان بولسىچۇ؟ ئۇ راستىنلا مۇشۇ سەۋەب بىلەن تويغا مەجبۇرلانغان بولسىچۇ؟...ياق،يۈرىكىم ئېچىشىپ خىيالىمنى داۋاملاشتۇرالماي ئالقىنىم بىلەن يۈزۈمنى تۇتىۋالدىم. ئورنۇمدىن تۇرۇپ رىچاردنىڭ مۇزىكا لېنتىسىنى ئىزدەپ كىتاب جازامنى ئاختۇردۇم . ئۇ لېنتىنى كۆيدۈرۈپ تاشلىغانلىقىمنى ئۇنتۇپ قالغىنم قىزىق. قايتىدىن ياستۇققا بېشىمنى قويۇشۇم بىلەن بېتخوۋىننىڭ ماڭابەش يىل ھەمراھ بولغان بەشىنچى سىمفونىيىسى خىيالىمدا ياڭراشقا باشلىدى. ... يېرىم كېچە، ياتاقتا يالغۇز ئولتۇرىمەن. سىرتتا چاقماق چېقىپ قاتتىق يامغۇر يېغىۋاتىدۇ. بىر چاغدا دەرىزە قېقىلغاندەك بولدى. ئىشىكمۇ چېكىلدى. زادى ئىشىك چېكىلىۋاتامدۇ ياكى دەرىزە چېكىلىۋاتامدۇ؟ چاقماق ھەممە يەرنى يورۇتىۋەتتى. دەرىزە سىرتىدا ھېچكىمنى كۆرمىدىم. ئىشىككە قارىدىم. دەرىزىنىڭ چېكىلگەن ئاۋازى يەنە كەلدى. - مۇھىد، مۇھىد.-بۇ گۈزەلنۇرنىڭ ئاۋازى ئەمەسمۇ؟ دەرھال دەرىزە تەرەپكە قارىدىم.- مۇھىد، مېنى كىرگۈزىۋېتىڭ. قورقۇپ كەتتىم. مەن بەك قورقۇپ كەتتىم. - ھېچكىم يوق. گۈزەلنۇر نەدە گەپ قىلىۋاتىدۇ؟ بېرىپ ئىشىكنى ئاچماقچى بولدۇم. لېكىن قانچە كۈچىسەممۇ ئىشىك ئېچىلمايۋاتاتتى. – مۇھىد، مەن بەك قورقۇپ كېتىۋاتىمەن. مېنى كىرگۈزىۋېتىڭ .- ئاۋاز يەنە كەلدى. مەن دەرىزىنى ئاچماقچى بولدۇم. لېكىن ئېچىلمىدى. ئىچىم تىتىلداپ ئورۇندۇقنى ئېلىپ دەرىزىگە قارىتىپ ئاتتىم. لېكىن ئەينەكمۇ  چېقىلمىدى. –مۇھىد ، مۇھىد، ئا...- شۇنداق ئېچىنىشلىق ئاۋاز... چۆچۈپ ئويغىنىپ كەتتىم. نېمىشقا جەزمەن شىنجاڭدا پىراكتىكا قىلش يولىنى تاللايمەن؟- ئۆز-ئۆزەمدىن سورىدىم.-ئەجىبا مېنىڭ گۈزەلنۇر بىلەن كۆرۈشىشىمگە شۇنچە كۆپ ۋاقىت كېتەمدۇ؟ ئەلىنىڭ زەم زەم تىجارىتى ئۈچۈن شۇنداق قىلىۋاتامدىم؟ ۋاقىت ئۆتكەنسېرى مەن شۇنچە پاسسىپ ئورۇنغا چۈشۈپ قالىمەن. «بىر ھەپتىلىك رۇخسەت ئالىمەن». ئويلىنىپ ئولتۇرمايلا ئۆزەمگە شۇنداق دەۋەتتىم-دە كىيىملىرىمنى كىيىپ كارىۋاتتىن چۈشتۈم. 2-سائەتتىن كېيىنكى تەنەپپۇستا سىنىپ مەسئۇلىنىڭ قېشىغا كىرىشنى كۆڭلۈمگە پۈكۈپ ياتاقتىن چىقىشىمغا بىر ياتاقدىشىم توۋلاپ قالدى. - مۇھىد، - نىمە؟-كارىدوردىلا ۋارقىرىدىم. - تېلىفون! بۇ فاڭ مۇئەللىمنىڭ تېلىفونى بولۇپ ئۇ ماڭا ئالاھىدە بىر خوشخەۋەرنى يەتكۈزدى. بۇ خۇشخەۋەرنى كەچتىلا ئىنتېرنىت تورى ئارقىلىق ئەلىگە يەتكۈزۈشنى ئۇنتۇپ قالماي ئاچمىغىلى بىر ئايدىن ئاشقان ئېلخەت ساندۇقۇمنى ئاچتىم. خەتنى يېزىپ بولۇپ چىقىپ كەتمەكچى بولۇپ كومپىيوتېرنىڭ ۋاقتىغا قارىسام يەنە يېرىم سائەتلىك ۋاقتىمنىڭ پۇلى بار ئىكەن. خەت ساندۇقۇمدىكى بۇرۇنقى خەتلەر ئىچىدىن گۈزەلنۇرنىڭ خەتلىرىنى ئېچىپ قالدىم. ...مۇھىد،كومپىيۇتېردا ئۇيغۇرچە يېڭى يېزىق ئىشلەتسە قىزىق بولىدىكەن. QQدا پاراڭلىشايلى دەپسىز. بۇ ئەپسىز بولارمىكىن. ھازىر تورخانىلارنى ئىس-تۈتەك قاپلاپ كېتىدىغان بولۇپ قالدى. ئۇنىڭ ئۈستىگە ھەرخىل بالىلار كىرىدىكەن. بۇ يەردە قىز بالا ئۇزاق تۇرسا بولمىغۇدەك. تورخانىنىڭ قىزلارغا پايدىسىدىن زىيىنى كۆپ بولىدىغاندەك قىلىدۇ... ...مۇھىد، تېرەمگە بىر نەرسە ئۆرلەيدىغان بولۇپ قېلىۋاتىدۇ. بەلكىم بۇنى ياشلىقتا بولىدىغان ئەھۋال دىيىشىڭىز مۇمكىن . لېكىن باشقا قىزلاردا مېنىڭكىدەك جىق ئەمەس. بۇنىڭ بىرەر چارىسى يوقمۇ؟ ئەگەر تېرە كېسىلى بولۇپ چىرايىم سەتلىشىپ كەتسە مەندىن ئايرىلىپ كېتەرسىزمۇ؟.... شىئەنگە مەڭگۈ قايتىپ كەلمەيدىغاندەك بەش يىلنىىڭ ياقى سېتىۋالغان كىتابلىرىمنى ھاۋالە بىلەن يۆتكىۋەتتىم. بۇلارنىڭ ئىچىدە گۈزەلنۇرنىڭ مەن سىزغان رەسىمىمۇ بار. قېپقالغان يوتقان –كۆرپىلىرىمنى كارىۋاتنىڭ بېشىغا يىغىپ مەھكەم چىگىۋەتتىم. پويىزغا چىقىشنىڭ ئالدىدا ئۆيگە تېلىفون قىلدىم. ئاپام مەندىن سائەت قانچىدە كېلىدىغانلىقىمنى ئېنىق سورىۋالدى. گەرچە ماڭا دىمىگەن بولسىمۇ كېلىش ۋاقتىمنى ئېنىق سۈرۈشتە قىلىشىدىن ئاپامنىڭ مەن ئەڭ ياخشى كۆرىدىغان تاماق تۈرمەل قىلىپ تۇرىدىغانلىقىنى پەرەز قىلىۋالدىم. نەفىسە بىلەن رەشىدەگە شىئەندىنلا تاپقىلى بولىدىغان تاش ئويما قونچاقتىن بىردىن ئېلىۋالدىم. ئاپامنىڭ ئىشىنى بىرتال كۈمۈش ئۈزۈك بىلەن ھەل قىلدىم. دادامغا بىر نەرسە ئېلىۋېلىشنى ئويلىغان بولساممۇ نېمە ئېلىش كېرەكلىكىنى ئىتتىك بىلەلمەي ئاخىرى ھەممە ئەركىشى ئىشلىتىدىغان ساقال ئالغۇچ ئېلىۋالدىم. بۇ نەرسىلەر بىلەن پويىزغا چىقىپ 48 سائەتلىك سەپىرىمنى باشلىۋەتتىم. ئورنۇمنى تېپىپ ئولتۇرۇپ پويىز قوزغالغاندىن كېيىن بىشىمدىن ئۆتكەن ئىشلارنى بولۇپمۇ گۈزەلنۇر تۇيۇقسىز ئۆزگەرگەندىن كېيىنكى ئىشلارنى بىر-بىرلەپ خىيال قىلدىم. ...«مەن ئەسكى قىز، مەن راستىنلا ئەسكى، ماڭا ئۆچ بولۇڭ»... سۈيدۈككە تېمىۋاتقان قان...«كەچۈرۈڭ مۇھىد، قىز بالا ئاجىز بولىدىكەن»... مەكتەپ فورمىسى كىيگەن ئىككى قىزنىڭ پىخىلداپ كۈلىشى..مەن  توي قىلىمەن....ئۇنىڭ ياتىقىنىڭ دەرىزە پەردىسى قايرىلىپ يەنە چۈشىدۇ. ...ئاپپاق قار قەھىردان سوغۇق ..6سائەتكە يىقىن ۋاقىت ...زادى نىمە ئۈچۈن .. ماشىنىنىڭ چىراغ نۇرى...«جېنىڭنى خار قىلغۇچە كەتسەڭ بولمامدۇ، بالاڭزا»... ئۆمۈچۈك چېكىلگەن قول... ئاكام كۆزىنى ئاچتى... جېنىم بالام... مەن سېنى ئوغۇل بالا دەپ يۈرسەم خەقتىن شۇنداقمۇ تاياق يەمسەن... ياخشى ئوقۇغىن بالام. بالىمىز دوختۇر بولدى دەپ بېشىمنى كۆتۈرۈپ يۈرەي... ئەزان ئاۋازى ... تۇڭگانلار مەسجىدى... لەيلەپ خاتىرەمنىڭ بېتىگە چۈشكەن چېچەك ... ئاللاھ! مەن بىخەۋەر يۈرۈپتىمەن، سېنىڭ مەۋجۇتلىقىڭنى بىلمەپتىمەن... ئوغلۇم،رەسىم سىزىش گۇناھ...مەن ئۇنىڭغا ئۆچ ،ئۇ شاللاق قىز..سوغۇق قىش ئاخىرلىشىپ چېچەك پەسلى يېتىپ كەپتۇ. باھارنىڭ ئىللىتىشى چېچەكلەرنى ئېچىلدۇردى. ئەمدى شاخلىرىنى چېچەكلەر بىلەن بېزىگەن مېۋىلىك دەرەخلەر ئۆز مېۋىسىنى بېرىشكە قاراپ ماڭىدۇ..تەكرار ۋە تەكرار ئۆلگۇم يوق... دۇبەيگە بىللە ماڭايلى ... ياق ئۇ يەرگە ئۆزۈڭ بار، مەن قىزىقمايمەن... سېنىڭ كاللاڭ ئاددى.. سىزگە بۇ گەپنى دىيەلمەيدۇ... بۇ ئاياغلاشمىغان ھېكايىڭىزنىڭ كەينىنى ئاڭلىغۇم بار..ئاللاھنىڭ نامىنى سۈيىئىستىمال قىلىپ ئۆزىڭىزنى ئۆزىڭىز ئالداپ قويغان بولىسىز... ... 5-سىمفونىيە ... «مۇھىد قورقۇپ كېتىۋاتىمەن، مېنى كىرگۈزىۋېىتىڭ»

nurkizi

	ئىسىل بىر ئەسەر بىلەن ئۇچراشتۇرغان ئەجرىڭىزگە پىكىرلىرىڭىزگە يەنە بىر قېتىم ئاپرىن.

winira

	شۇنچىلىك قىزىقىپ كىتىپتىمەن....داۋامىغا تەشنا.....