ئۇستاز ، ئوقۇتۇش ماھارىتىڭىز كۆپ خىل بولسۇن !

paknur2

                       ئۇستاز ، ئوقۇتۇش ماھارىتىڭىز كۆپ خىل بولسۇن !

ئارزۇگۈل ھۈسەن خالەم  

يېڭى دەرس ئىسلاھاتىنىڭ قەدەممۇ -قەدەم چوڭقۇرلىشىشىغا  ئەگىشىپ، ئوقۇتقۇچىلارنىڭ بىلىم  ساپاسىغا قويۇلىدىغان تەلەپمۇ بارغانچە يۇقۇرلاپ بارماقتا . ‹‹ ئۇمىچى يوق مازاردىن شەيخ قېچىپتۇ ›› دىگەندەك ، بىلىمى كونىرغان ئوقۇتقۇچىدىن ئوقۇغۇچىلار قاچىدۇ ئەلۋەتتە .  
ئالىم ئابدۇشۈكۈر مۇھەممەتئېمىن : ‹‹ ھازىرقى دەۋىردە ئوقۇتقۇچى ھەر كۈنى ئۆزىنىڭ بىلىم فۇندىنى بېيىتىپ ۋە يېڭىلاپ تۇرماي ئۆز مەجبۇرىيتنى ئادا قىلىشى مومكىن ئەمەس ›› دىگەن ئىدى .
يۇقارقى ھېكىمەتتىن ئوقۇتقۇچى ئۈچۈن بىلىم يېڭىلاشنىڭ ، ئۆزلىكسىز ئۈگىنىشنىڭ قانچىلىك زۆرۈر ئىكەنلىكىنى بىلىۋېلىش تەس ئەمەس . ئەمما ، ئوقۇتقۇچىدا مول ئۇنۋېرسال بىلىم بولۇش بىلەن بىرگە ئۆزگىچە ئوقۇتۇش ماھارىتىنڭ بولىشىمۇ ئىنتايىن زۆرۈر بولماقتا .
ئوقۇتقۇچىنىڭ ئۆزگىچە ئوقۇتۇش ماھارىتى ئوقۇغۇچىلارنىڭ شۇ دەرىسكە بولغان قىزىقىشىنى ئاشۇرىدۇ ، دەرسخانا كەيپىياتىنى جانلاندۇرىدۇ ،ئوقۇغۇچىلارنىڭ تەسەۋۋۇرىنى دەرىسخانىدىن ، كىتابتىن سىرىتقا باشلاپ چىقىدۇ .ئوقۇتقۇچى ئۆزى بېرىۋاتقان دەرىسنىڭ خاراكتېرى ، دەرس ئۆلچىمىنى پىششىق بىلگەن ئاساستا ئوقۇتۇش ماھارىتىنى يېڭىلاپ تۇرالىسىلا  ئۆزىنىڭ دەرسخانىدىكى ھاياتىي كۈچىنى ئۇرغۇتۇپ تۇرالايدۇ .
مەكتىۋىمىزدە بىر ئوقۇتقۇچى  ‹‹ سىزمۇ  مۇخبىر بولالايسىز ›› ناملىق بىر سائەتلىك ئوچۇق دەرسنى مۇنداق ئۆتكەن بولۇپ ، ئۇنىڭ ئوقۇتۇش ماھارىتى ھەممىمىزنى تولىمۇ قايىل قىلدى .
بۇ بىر سائەتلىك ئوچۇق دەرسنى ئاڭلاشقا ھەر قايسى ئوقۇتۇش گورۇپپا باشلىقلىرى ، ئىلمىي مودىر ، ئوقۇتۇشقا مەسئول مودىرمۇ كىردى .( خىزمەتدىشىم مودىر ۋە ئىلمىي مودىرنى كىرمەيدۇ دەپ ئويلاپتىكەن ) دەرس ناھايتى تەبئىي ئۆتۈلدى . ئوقۇتقۇچى ئالدىن تۈزۈلگەن دەرس دېتالىدىن مۇخبىرلارنىڭ ئاساسىي قاتلاملاردىكى ، ھەرقايسى دۆلەتلەردىكى ، ھەرخىل موھىتلاردىكى ئەمەلىي خىزمەت كۆرۈنىشلىرىنى بىرمۇ -بىر كۆرسۈتۈپ ، ئولارنىڭ ئوخشىمىغان موھىتلاردا ئۇچىرايدىغان  ئوخشىمىغان قېيىنچىلىقلىرىنى ئوقۇغۇچىلارغا ھېس قىلغۇزغان ئاساستا سۆزلەتكۈزدى ،ھەم مۇخبىرلىق خىزمىتىنىڭ جەمىيەتتىكى  ئەھمىيىتى ، رولى ،جاپاسى قاتارلىقلارنى ئوقۇغۇچىلار ئۆزلىرىگە چوڭقۇر ھېس قىلغۇزدى . ئاخىردا ئوقۇغۇچىلارنى دەرس ئاڭلاشقا كىرگەنلەرنى مۇخبىر ئورنىدا تۇرۇپ زىيارەت قىلىشقا تەشكىللىدى .ئوقۇغۇچىلار دەسلەپتە ئاددى -ئاددى سۇئالللارنى سورىدى ،بارا-بارا مەكتەپتىكى قىززىق نوقتىلارنى ، ئوقۇغۇچىلار ئۆز مەنپەئىتىگە مۇناسىۋەتلىك سۇئاللارنى سوراپ ،دەرسخانا كەيپىياتىنى تەسەۋۋۇر قىلغۇسىز دەرىجىدە جانلاندۇردى .
ئوقۇغۇچىلارنىڭ بىر-بىرىدىن ئورۇنلۇق سۇئاللىرىغا مەكتەپ مودىرىمۇ ئويلىنىپ جاۋاپ بېرىشقا باشلىدى . ئوقۇغۇچىلار مۇنداق سۇئاللارنى سورىغان ئىدى .
-    مەكتەپ مودىرى ،   بىزنىڭ تاپشۇرۇقىلىرىمىز بەكلا كۆپ ، بېسىمىمىز ئېغىر ، ئۇيقۇغىمۇ قانمايمىز، تاپشۇرۇقنى ئازلىتىشقا بولامدۇ ؟
-مەكتەپتە ئايدا بىر قېتىم قول-ھۈنەر كۆرگەزمىسى ، رەسىم-ھۆسنخەت كۆرگەزمىسى ئورۇنلاشتۇرۇشقا بولامدۇ ؟
-    بەزى ئوقۇتقۇچىلار ئوچۇق دەرس ۋاقتىدا دەرسنى ناھايتى ياخشى سۆزلەيدۇ ،باشقا ۋاقىتتا ئادەمنى بېزار قىلىدۇ ، مەكتەپ مۇدىرى ، سىزنىڭ ھەممە دەرسنى ئوچۇق دەرستەك ئۆتىدىغان ئوقۇتقۇچىلارنى تەربىيلەشكە قۇربىڭىز يېتەمدۇ ؟ ... دىگەندەك سۇئاللار ئىدى .
شۇ سائەتلىك دەرىستە ئوقۇغۇچىلار ئۆزىنى پۈتۈنلەي ئۇنتۇپ ، ئۆزلىرىنى تېلىۋېزىيە ئىستانىسىنىڭ مۇخبىرلىرىدەك ئورۇنغا قويۇپ زىيارەت قىلدى .دەرستىن چۈشۈش قوڭغۇرىقى چېلىنىپ ۋاقىت توشۇپ كەتكىنىمۇ ھېچكىمنىڭ پەرۋايىغا كەلمىدى .ئوقۇتقۇچى دەرستىن چۈشۇڭلار دىمىگەن بولسا ، بەلكىم كىيىنكى سائەتمۇ داۋامىلىشىدىغاندەك ئىدى .
ئوقۇغۇچىلارغا نەق مەيداندا زىيارەت قىلىش پۇرسىتى يارتىلغاچقا  ئاجايىپ ياخشى ئۈنۈم ھاسىل بولدى ، ئوقۇتقۇچىنىڭ شۇ چاغدىكى ئەمەلىي ئەھۋالغا ، شۇ تېكىستنىڭ خاراكتېرىگە ئاساسەن دەرھاللا بۇ ماھارەتنى قوللىنىشى شۇ سائەتلىك دەرسكە جان كىرگۈزۈپ ،ھەممەيلەن رازى بولغان بىر سائەتلىك مۇۋەپپەقىيەتلىك ئۆتۈلگەن  دەرس بولدى .
مەكتىۋىمىزدىكى يەنە بىر بىئولوگىيە ئوقۇتقۇچىسى ‹‹ قان يەتكۈزگۈچى پومپا –يۈرەك ›› ناملىق دەرىسنى ئۆتتى . بۇ دەرسنى مەن بىلەن يەنە بىر ئوقۇتقۇچى بىرگە كىرىپ ئاڭلىدۇق .
ئوقۇتقۇچى دەرس باشلىنىش بىلەنلا ئۈچ گورۇپقا ئۈچ دانە قوينىڭ يۈىكىنى تارقىتىپ ، يۈرەكنىڭ تۈزۈلىشىگە دائىر مەزمۇننى بەش مىنۇت ئەتىراپىدىلا سۆزلىدى ، ئاندىن يۈرەكنىڭ پۈتكۈل ئىچكى تۈزۈلىشىنى دوسكىغا سىزىپ بولغاندىن كىيىنلا گورۇپپىلار بويىچە ھەمكارلىشىپ ، يۈرەكنى قولى بىلەن تۇتۇپ تۇرۇپ كۈزۈتۈشكە ئورۇنلاشتۇردى . ئوقۇغۇچىلار دوسكىدىكى تۈزۈلۈشكە ئاساسەن قولىدىكى يۈرەككە بەلگە سېلىپ ، ئىچكى تۈزۈلۈشلەرنىڭ نامىنى ئاتاشقا باشلىدى .يۈرەك قولدىن قولغا ئۆتۈپ ،ئوقۇغۇچىلار خۇددى تىببىي ئىلىم ساھەسىدە تەربىيلىنىۋاتقان بولغۇسى دوختۇرلاردەك قوللىرىغا كىچىك پىچاق ئېلىپ يۈرەكتىكى سىرلارنى قېزىشقا باشلىدى .
يۇقارقى ئىككى ئوقۇتقۇچىنىڭ قوللانغان ماھارىتى ئۆتۈۋاتقان دەرسنىڭ خاراكتېرىگە تولىمۇ ماس كەلگەن بولۇپ ، ئوقۇغۇچىلارنى تار نەزىرىيەدىن ھالقىتىپ ئەمەلىيەت ئىچىگە ، تار تەپەككۈر كۆلچەكلىرىدىن ھالقىتىپ مۇلاھىزە دېڭىزلىرىغا باشلاپ كىرگەن .ئوقۇغۇچىلاردا كۈچلۈك قىزىقىش قوزغاپ شۇ سائەتلىك دەرسنىڭ ئۈنۇمىنى ئاشۇرغان .
دىمەك ئوقۇتقۇچىنىڭ ئوقۇتۇش ماھارىتىنىڭ كۆپ خىللىقى دەرسخانىغا جان كىرگۈزۈپلا قالماي ، ئوقۇتقۇچىنىڭ مۇنبەردىكى ھاياتىي كۈچىنى ھەسسىلەپ ئاشۇرىدۇ .



مەنبە -----  ئۆز قەلىمىم

ئىلغار

بىر سائەتلىك دەرسنى ياخشى ئۆتۈش ئۆچۈن ئالدىن پۇختا تەييارلىق قىلىش كېرەك يەنى دەرسنى قايسى نوختىدىن باشلاش،ئوقۇغۇچىلارنى قايسى خىل ئۇسۇللار ئارقىلىق دەرس مەزمۇنىغا قىزىقتۇرۇش قاتارلىقلارنى ئالدىن ئويلىشىش كېرەك

كەۋسەر

ئوقۇتۇش تەتقىقاتىغا ئائىت تېمىلارنى داۋاملىق يوللاپ تۇرۇڭ ~

مەرىپەت

ئوقۇتقۇچىلاردا دەرسنى ئوچۇق دەرس ۋاقتىدا بىرخىل ئۆتىدىغان، ئوچۇق دەرس ئەمەس ۋاقتىدا بىر خىل ئۆتىدىغان ئەھۋاللار مەۋجۈت، ھەر بىر ئوقۇتقۇچى بۇ خىل شەكىلۋازلىقتىن ساقلىنىپ ، ئوقۇغۇچىلارغا كۆيۈنۈپ كۆپ خىل ئوقۇتۇش ئۇسۇلىدىن پايدىلنىپ دەرس ئۆتۈش كېرەك.