ئۇچۇردىكى مۇھەببەت(يۇمۇرىستىك ھىكايە)

خەنجىرى

                                                            خەنجىرى
بىر كۈنى   قىلىدىغان ئىش تاپالماي، مال- مۈلۈكىنى ئۇتتۇرۋەتكەن ئوغرى- قىمارۋازنىڭ ئىچى پۇشقاندەك، مىنىڭمۇ ئىچىم
پۇشۇپ ئۇ يانغا قارىدىم،  بۇ يانغا قارىدىم.  قارىسام قىلىدىغان ئىش يوق. كوچىغا چىقىپ مەدىكار ئىشلەشنى ئويلىدىم. بىراق مەندە يۆتەلگۈدەكمۇ ماغدۇر يوق تۇرسا قانداق مەدىكار بولۇپ ئىشلەيمەن؟  شۇنداقتىمۇ كوچىغا چىقىپ ، بار- يوقى ئىككى يېرىم موچەن پۇلۇمنى دەسمى قىلىپ سېلىپ ئاداشلىرىم بىلەن ھوشۇق ئېتىپ ،ئۇلاردىن ئۇتۇۋالغان تۆت يۈەن پۇلنىڭ ئۈچ يۈەنىگە بىر دانە قىزىل چاي، قالغان بىر يۈەنىگە بەش موچەنلىك گىردىدىن ئىككى تۇياق ئېلىپ قورساق تويغۇزۇشنى ئويلاپ، شۇزامات بىر پايپىقىمنى كىيىپ، يەنە بىر پايپىقىمنى كىيمەي ياغاچتەك قېتىپ كەتكەن پۇتلىرىمنى داتلىشىپ كىتىپ تۆمۈردەك بوپ قالغان ئاياغقا مىڭ ئۈچنى يۆتىلىپ دەپ ساپتىم.كوچىغا چىقسام مىنىڭ ئاداشلىرىم، دوستلىرىم، بۇرادەرلىرىم، يېقىن دوستلىرىم،يېقىن بۇرادەرلىرىم،يىراق بۇردەرلىرىم، ئەڭ يېقىن بۇرادەرلىرىم، ئەڭ يېقىن دوستلىرىم، ئەڭ يېقىن ئاداشلىرىم، ئەڭ يىراق ئاداشلىرىم مەر-مەر ئويىنىغىلى ئاقساقمارال ئۆستەڭنىڭ بويىغا كىتىپتۇ. بۇ كالا شۇملار توپىلىق يەردە قانداق مەر-مەر ئوينايدىغاندۇ؟،دەپ ئويلاپ ئۆيگە كىردىم. ئاندىن تېلىفۇن بىلەن راسا ھەپىلىشىپ ئۇنىڭ<<ۋايجىنىنى>>چىقىرىۋىتەي دەپ، تېلىفۇننى قولۇمغا ئېلىپ قارىسام،بۇ كاساپەت تېلىفۇننىڭ توكى خۇددى ئۆيدە تاماق ئىتىدىغان قوي يېغى بىلەن سۇ يېغى تۈگەپ كەتكەندەك تۈگەپ كىتىپتۇ . بىرسىدىن ئالىدىغان ئاچچىقىمنى ئالالماي ئاران تۇرغاندا ،تىلفۇننىڭ توكىنىڭ يوقلۇقى << ئالتۇن ئۈزۈككە ياقۇت كۆز >> ياراشقاندەك تازا ياراشتى . ئاچچىقىم شۇنداق قاتتىق كەلگەن ئىدىكى ، شۇ تاپتا پۇتبۇل مەيدانىدا بولغان بولسام  ۋارتارنى << پوش>> دىمەي  توپتىن ئۈچنى كىرگۈزۋەتكەن ، ۋاسكىتبۇل مەيدانىدا بولغان بولسام ئوتتۇز بەش نۇمۇرلۇق توپتىن ئوتتۇز بەشنى سولىۋەتكەن بولار ئىدىم .  تېلىفۇننى ئىگىز كۆتۈرۈپ خىيالىمدا :‹‹گارغا تاشلىدىم››، دەپ تېلىفۇننى ئىسىلىشىپ  قاپقارا بوپ كەتكەن مورىغا ئاتقىلى تاس قاپتىمەن.ئۈستىگە قارىسام گار يوق.شۇڭا بۇ ئويۇمدىن يېنىپ،تېلىفۇننى ئاتماي،ئىككى سائەتچە توككا چېتىپ قويۇپ گازىر چاقتىم.ئارىدىن ئىككى-ئۈچ سائەتچە ئۆتكەندە بولسا كىرەك،ماينى تېلىفۇنغا سېلىپ ، تېلىفۇنۇمنى قوزغاتتىم.ئۇچۇرلار خۇددى-‹‹ئەللىك بەش تىپلىق تراكتۇر ›› گۈرۈلدەپ يەر ھەيدىگىلى كەلگەندەك، گۈلدۈرلەپ كىلىشكە باشلىدى. ئۇلارغا تېلىفۇن قىلىشقا پەقەت خوش ياقمىدى. شۇڭا ئۇلارغا تېلىفۇن قىلغاننىڭ ئورنىغا باشقىلارغا تېلىفۇن قىلىپ ‹‹پوپوتاڭ›› چايناي ، دەپ ئويلاپ خىيالىمنى ئاۋات بازىرىغا ‹‹مەرەجە››ئىچكىلى ئەۋەتىۋىتىپ، ئۆزۈم خىيالىم يوق ھالدا دوستۇمنىڭ نومۇرىنى باستىم. بىراق خىيالىمنى قايتۇرۇپ ئويلىسام، بىر خانە نومۇر خاتا بېسىلىپ قاپتۇ. شۇنىڭ بىلەن قارشى تەرەپتىن تېلىفۇن كىلىشكە باشلىدى.پەقەتتىن-پەقەت ئالغۇم كەلمەي ئۇنىڭغا مۇنداق ئۇچۇر يوللىدىم:-‹‹نەلىك نىمىسىز، نەدىن بولىسىز، نەدىن كىلىسىز، نىمە ئىش قىلىسىز، نىمە بىلىسىز؟ تىز جاۋاب بىرىڭ! بولمىسا سىزنى جياگۇڭ قىلىمەن(پىششىقلاپ ئىشلەيمەن) ››. قارشى تەرەپ مىنىڭ بۇ ئۇچۇرۇمنى كۆرۈپ قاتتىق قورقۇپ ھوشىدىن كەتتىمۇ، ياكى بارغان ئۇچۇرغا قارىماي مۈشۈك باقتىمۇ، ئىشقىلىپ مەنمۇ بىلمىدىم، خېلىغىچە جاۋاب قايتۇرمىدى.بۇ ئاداشتىنى كىلىدىغان ئۇچۇرنى خۇددى ئەسىرىنىڭ ئىلان قىلىنىشىنى كۈتۈپ تازا بوغۇلۇپ كەتكۈچە تەقەززا بولغان ، يىتىلىۋاتقان،ئەمدىلەتتىن ئۆگىنىۋاتقان ، يېزىقچىلىقنى تېخى ئۈچ يېرىم كۈن ئىلگىرىلا باشلىغان ئاپتوردەك كۈتۈشكە باشلىدىم.خېلىدىن كىيىن مۇنداق مەزمۇندا ئۇچۇر كەلدى:
-مەن نېرىقى ناھىيسى يېقىنقى بازىرى ئىشىك بوسۇغىسى كەنتى ئۆي ئىچى مەھەللىسىدە ئولتۇرۇشلۇق نىمىماخۇن بولىمەن،شۇ يەردىن بولىمەن،نەدىن كەلدىم، ئاپلا كەچۈرىسىز، شۇنى ئۇنتۇپ قاپتىمەن.مەن شۇ خوتۇن كىشى قېشىغا قويىدىغان ئوسما تېرىيمەن.كۈز ۋە قىش كۈنلىرى ئىش خوشياقماي يىغىپ دۆۋىلەپ قويغان قۇرۇق مەدەك غاجاپ كۈن ئۆتكۈزىمەن. نىمە بىلىدىغانلىقىمنى ئېنىق بىلمەيمەن. مەن ئۇنىڭغا: كىچەمۇ-كۈندۈز كۆرۈشۈپ تۇرايلى،يىراقتىكى دوستلاردىن بولۇپ قالايلى، دەپ ئۇچۇر يوللىدىم. شۇنىڭ بىلەن ھەر كۈنى پەقەت ئۇچۇر ئارقىلىق ئۆز-ئارا كۆرۈشۈپ تۇرۇشتۇق. كۈندە تاماق يىدىڭىزمۇ؟ تاماق تاپالماي شاپاق بىلەن مەدەك غاجىدىڭىزمۇ، دىيىشىپ شىرىن-شىكەر سۆزلىرىمىزنى گوياكى ئۆتكۈنچى يامغۇر ياغقاندەك ياغدۇرۇۋىتىشتۇق(قىسقىسى ئۇچۇر ئارقىلىق ئۆز-ئارا مۇھەببەتلەشتۇق).تېلىفۇنىمىزمۇ يەتكۈچە قەرزگە بوغۇلۇپ، توڭرا پاتاڭغا كۆتۈرەلمىگۈدەك دەرىجىدە ئارتىلدى. شۇنداقتىمۇ يەنە پاراڭلاشتۇق.تېلىفۇن بىچارە بولسا  يەنە ئامالسىز ‹‹غىڭ-پىڭ ›› قىلماي قەرزگە بوغۇلىۋەردى.شۇنداق قىلىپ ئۇچۇردىكى مۇھەببەت ۋاقىتنىڭ ئۆتۈشى بىلەن بىر يەرگە باردى.بىر كۈنى كىچىك بىر ئىش سەۋەبىدىن تۇيۇقسىز ئۆز-ئارا تىللىشىپ كەتتۇق.‹‹ئاچاڭدىن باشلاپ ئاناڭدا›› توختاشتۇق.تېلىفۇن بىچارە بۇ بىر-بىرىدىن كارامەت ئىسىل ، ساز، نوچى گەپلەرنى ئاڭلاپ نومۇس قىلغىنىدىن، ئىزا تارتقىنىدىن يۈزلىرى توختىماي يورۇپ تۇراتتى. بىز بىر پەس تىللىشىپ بولغاندىن كىيىن گېلىم قۇرۇپ كىتىپ،بىرسىگە يىراقتىن ئىسپىرت ئارلاشتۇرمىغان گازلىق سۇ، سۈت ئارلاشتۇرمىغان پىچىنە، يېغى يوق سەي ئەكىرگۈزۈپ قورساقنى ئوبدان ئەستەرلىگەندىن كىيىن ئۇنى ئۇچۇر ئارقىلىق قايتا تىللاش ئۈچۈن ھۇجۇمغا، ئاتاكىغا ئۆتتۈم. ئەپسۇسكى، بۇ ئەبلەخمۇ قېرى قانجۇق ئىتتەك قاۋاپ بولالماي ھېرىپ قېلىپ تاماق يەۋاتقان بولسا كىرەك،ئۇچۇر قايتۇرمىدى.ئۇنىڭغا يەنە ئۇچۇر يوللىدىم، بىراق ئۇ تۈكباش ئەبلەختىن يەنە ئۇچۇر كەلمىدى.مەن ئويلىدىم: بۇ ئەبلەخ تىللىغان گەپلىرىم، سۆزلىگەن نوتۇقلىرىمغا، ئوقۇغان شىئىر-قوشاق ۋە پوۋىستلىرىمغا بەرداشلىق بىرەلمەي ئۆلۈپ قالدىمۇ نىمە، دەپ ئويلاپ تۇرۇشۇمغا  ئۇنىڭدىن ئۇچۇر كەلدى.بىر يەنە بىر مەيدان ئۆز-ئارا تىللىشىش جېڭىگە چۈشۈشتۇق.مەن تىللىشىشنىڭ ئالدىنقى سىپىدە كىينكى ئۈچ كۈنىدە ئاش-تاماقسىز، سۇسىز  قېلىپ جاپالىق كۈرەش قىلىپ، يەنە مىنى بىھۇدە  تىللىسا قوڭىغا بورا يۆگەپ ئوت قويۇش شەرتى بىلەن ئاخىرى ئۇ ئەبلەخنى يەڭدىم، ھەمدە بىزنىڭ ئۇچۇردىكى جېڭىمىز مىنىڭ غالىبلارچە يېڭىشىم، ئۇنىڭ مەيداندىن قاچقان توخۇدەك يېڭىلىشى بىلەن ئەڭ ئاخىرقى قېتىم غەلبىلىك ،تولۇق مۇۋەپپىقيەتلىك ھالدا ئاخىرلاشتى. بىزنىڭ بۇنداق بولۇشىمىزدىكى ئاساسلىق سەۋەب بولسا – بىز ئۆز-ئارا تىللىشىش جېڭىگە  ئاتلانغۇچە ئۆز-ئارا كۆرۈشمەي تۇرۇپ ئۇچۇر ئارقىلىق مۇھەببەتلىشىش ۋە مەن ئۇنى ئەمدى 18ياشقا كىرگەن  ئەرگە تەگمىگەن گۈزەل قىز- ئۇ بولسا مىنىمۇ ئەرگە تەگمىگەن 18ياشقا كىرگەن گۈزەل قىز، دەپ ئويلاپ قالغانلىقتىن باشقا ئىش ئەمەس ئىدى.

ئاپتور:مارالبېشى ناھىيە سېرىقبۇيا يېڭى بازار ئىجتىمائى رايونى(3-ئاھالە كومىتىت)دىن
2013-يىل 2-ئاي 25-كۈنى يېزىلىشقا باشلاپ 3-ئاي 13-كۈنى تۈزىتىلىپ تاماملاندى.3-ئاي 23-كۈنى قايتا تۈزىتىلىپ
كومپىيوتىردا ئۇرۇلدى

نادىرلار تورىدىن ئېلىندى.
مەنبە:ئۆز ئىجادىيتىم

زەپەر

    خەنجىرى  ئەپەندىم  ياخشىمۇ سىز  بۇ تىمىنى نادىرلار تورىدىن ئېلىندى دەپسىز . يەنە كىلىپ ئاخىرغا مەنبەسى مەن دەپسىز . قايسى توغىرا ، مىنى بىر ئاز گاڭگىرتىپ قويدى

خەنجىرى

ئەسەرنى مەن ئۆزۈم يازغان بولۇپ،ئەڭ دەسلەپ نادىرلار تورىغا يوللىغان ئىدىم.شۇ توردىن كۆچۈرۈپ بايقاش تورىغا قايتا يوللىدىم

★parixta★

بۇ ھېكايە راستىنلا بەك قىزىقارلىككەن،شۇنداق بولسىمۇ بىر ئاچچىق ھەقىقەت نى يورۇتۇپسىز .رەخمەت سىزگە !