بۇۋاقلارنىڭ سۈت پاراشوكىنى كۆپ ئالماشتۇرمىغان ياخشى نۆۋەتتە، تۈرلۈك سەۋەبلەر تۈپەيلىدىن بۇۋاقنى ئانا سۈتى بىلەن بېقىش ۋاقتى بارغانچە قىسقىراۋاتىدۇ. ھاۋا ئىسسىق ياز كۈنلىرى بۇۋاقلارنىڭ ئانا سۈتى ياكى سۈت پاراشوكىغا بولغان ئېھتىياجى ئاشىدۇ. ھازىر ئاتا-ئانىلار بوۋاقلىرىغا ھەرخىل سۈت پاراشوكلىرىنى ئىچۈرىدىغان بولدى. سۈت پاراشوكىنى خالىغانچە، تېز ئالماشتۇرۇش بۇۋاقلارنىڭ ھەزىم قىلىش سىستېمىسىنى قالايمىقانلاشتۇرۇپ، نورمال ئۆسۈپ يېتىلىشىگە تەسىر كۆرسىتىدۇ. بۇۋاقلاردىكى ئىچ سۈرۈشكە سەل قارىماڭ ئىچ سۈرۈش ئالتە ئايلىقتىن ئىككى ياشقىچە بولغان بۇۋاقلاردا كۆپ كۆرۈلىدىغان، پەسىل خاراكتېرلىك كېسەللىكلەرنىڭ بىرى. ئۇ يەنە ‹‹ھەزىم قىلىش ناچارلىشىش››دەپمۇ ئاتىلىدۇ. مەملىكىتىمىزدە ئىچ سۈرۈشنىڭ بىر ياشقا توشمىغان بۇۋاقلاردا كۆرۈلۈش نىسبىتى %50كە يېتىدۇ. ئىچ سۈرۈش چوڭلارغا نىسبەتەن ئادەتتىكى ئاغرىق ھېسابلىنىدۇ، بىراق بۇۋاقلارنىڭ ھاياتىغا بىۋاستە خەۋپ ئېلىپ كېلىدىغان كېسەلدۇر. بۇۋاقلاردا چوڭ تەرەت قېتىم سانىنىڭ كۆپ بولۇشى، سۇيۇق كېلىشى، شىلىمشىق بولۇشى قاتارلىق ئەھۋاللار كۆرۈلسە، ۋاقتىدا تەكشۈرتۈش كېرەك. ئۇنداق بولمىغاندا، ئوزۇقلۇق يېتىشمەسلىك سەۋەبىدىن ئۆسۈپ يېتىلىشى توسالغۇغا ئۇچراش، مىكروبلارنىڭ قاننى مىكروبلاندۇرۇشى، ئېغىرلىقى تۇيۇقسىز تۆۋەنلىشى، ھەتتا ئۆلۈپ كېتىشىدەك يامان ئاقىۋەتلەرنى كەلتۈرۈپ چىقىرىدۇ. بالىڭىزنى كىچىك تەرەت قىلىشقا ئىككى ياشتىن كېيىن كۆندۈرۈڭ ئادەتتە كىچىك بالىلارنىڭ زاكىسى تۆت، بەش سائەتتىن ئارتۇق ۋاقىت قۇرۇق تۇرسا، بالىلارنى ئۆزى كىچىك تەرەت قىلىشقا كۆندۈرسەك بولىدۇ.دېمەك، ئىككى ياشتىن ئىككى يېرىم ياشقىچە بالىلارنىڭ دوۋسىقىنىڭ سۈيدۈكنى كونترول قىلىش ئىقتىدارى يېتىلىدۇ. كۆندۈرۈشكە باشلىغان دەسلەپكى مەزگىللەردە، بالىڭىزنىڭ كىچىك تەرەت قىلغۇسى بار-يوقلۇقىنى بىر، ئىككى سائەتتە بىر سوراپ تۇرۇشىڭىز كېرەك. ئاستا-ئاستا بالىڭىز مەقسىتىنى ئىپادىلەشكە باشلىغاندا، ئۇنىڭ كىچىك تەرەت قىلىشىنى ئېسىگە سېلىشنى ئۈچ، تۆت سائەتكە سۈرسىڭىز ياكى بۇ ئىشنى ئۆزىگە قويۇپ بەرسىڭىزمۇ بولىدۇ.
ئۈرۈمچى كەچلىك گېزىتىدىن ئېلىندى
|
