ئامېرىكا «ساغلام كۈنلەر» تور بېتىنىڭ خەۋىرىگە قارىغاندا، ئامېرىكا بۆرەك كېسەللىكلىرى ئىلمىي جەمئىيىتىنىڭ يىللىق يىغىنىدا ئېلان قىلىنغان بىر تۈرلۈك يېڭى تەتقىقات نەتىجىسىدە، شېكەر تەركىبى بار بولغان گازلىق ئىچىملىكلىرىنى ئىچىشكە ئامراق كىشىلەرنىڭ بۆرەك كېسىلىگە گىرىپتار بولۇش خېيىم-خەتىرىنىڭ ناھايىتى يۇقىرى بولىدىغانلىقى ئىسپاتلانغان. ئالىملار ياپونىيەنىڭ مەلۇم بىر ئۇنىۋېرسىتېتىدىكى ئىشچى-خىزمەتچىلەرنى تەكشۈرگەندىن كېيىن، ھەر كۈنى ئىككى ئىستاكاندىن ئارتۇق، تەركىبىدە شېكەر بولغان گازلىق ئىچىملىكلەرنى ئىچىدىغانلارنىڭ سۈيدۈكىدىكى ئاقسىل مىقدارى بۇ خىل ئىچىملىكلەرنى ئاز ئىچىدىغان ياكى ئىچمەيدىغانلارنىڭكىگە قارىغاندا يۇقىرى بولىدىغانلىقىنى بايقىغان، ھەمدە سۈيدۈكىدە ئاقسىل پەيدا بولغانلىقى بۆرىكىنىڭ زىيانغا ئۇچرىغانلىقىنىڭ دەسلەپكى بەلگىسى، دەپ قارىغان.
چاشقاننى تەجرىبە ئوبيېكتى قىلغان يەنە بىر تەتقىقاتتا كۆرسىتىلىشىچە، مېۋە شېكىرىنى كۆپ ئىستېمال قىلغاندا بۆرەكتىكى تۇز تەركىبىنى تەڭشەيدىغان ئاقسىلنىڭ سەزگۈرلۈكىنى ئاشۇرۇۋېتىدىكەن، بۇنىڭ بىلەن بۆرەكتىكى ھۈجەيرىنىڭ تۇز تەركىبىنى قايتا قوبۇل قىلىش مىقدارىنىڭ ئېشىشى كېلىپ چىقىدىكەن. بۇ ياشانغانلارنىڭ تەركىبىدە شېكەر ماددىسى بار بولغان گازلىق ئىچىملىكلەرنى ئىچىشى بىلەن ئۇلاردىكى دىيابېت كېسەللىكى، سېمىزلىك كېسەللىكى، بۆرەك ئىقتىدارى ئاجىزلىشىش ۋە يۇقىرى قان بېسىمنىڭ ئوتتۇرىسىدا باغلىنىشلىق مۇناسىۋەتنىڭ مەۋجۇت ئىكەنلىكىنى چۈشەندۈرۈپ بېرىدۇ.
:::توربىكىتىمىزنى ئۇلىنىش قىلىۋىلىڭ :::