شىنخۇا تورى خەۋىرى، نۇر تورى تەرجىمىسى: رۇسىيە «كومپارتىيە ھەقىقىتى گېزىتى» تور بېكىتىنىڭ 23 يانۋاردىكى خەۋىرىگە ئاساسلانغاندا، ئادەتتە كىشىلەرنىڭ 30 ياشتىن كېيىنكى تۇغۇلغان كۈنى ئانچە خوشال ئۆتمەيدۇ، ھەتتا تۇغۇلغان كۈنىدە كۆز يېشى قىلىشىدۇ، ئەمەلىيەتتىمۇ بۇ دۇنيا يەنىلا ئىنتايىن ئادىل ھېسابلىنىدۇ.
بۇ تۈرلۈك تەتقىقاتقا قارىتا ئامېرىكىدا تەكشۈرۈش ئېلىپ بېرىلغان بولۇپ، تەتقىقاتچىلار ئامېرىكىنىڭ ھەرقايسى جايلىرىدىكى ئەر-ئاياللارنى زىيارەت قىلغان. تەكشۈرۈش نەتىجىسىدىن مەلۇم بولىشىچە ئاياللارنىڭ ئەڭ چىرايلىق مەزگىلى 30 ياش بولۇپ، 41 ياشتىن كېيىن ئاندىن قېرىشنىڭ ئالامەتلىرى گەۋدىلىنىشكە باشلايدىكەن، 53 ياشقا كىرگەندە ئاندىن ئۇنچىۋالا چىرايلىق بولماي قالىدىكەن، 55 ياشتىن كېيىن بولسا «موماي» دەپ قاراشقا بولىدىكەن.
بۇ تۈرلۈك تەكشۈرۈش يەنە ئەرلەر توغرىسىدىمۇ ئېلىپ بېرىلغان بولۇپ، ئەرلەرنىڭ ئەڭ جەلپ قىلىش كۈچى بولغان يېشى بولسا 34 ياش ئىكەن، 43 ياشتىن كېيىن قېرىشنىڭ ئالامەتلىرى كۆرۈلۈشكە باشلايدىكەن، 58 ياشقا كىرگەندە ئاندىن ئۇنچىۋالا كېلىشكەن بولماي قالىدىكەن، 59 ياشتىن كېيىنلا «بوۋاي» غا ئايلىنىدىكەن.
ئۇنىڭدىن باشقا «ئېزىقتۇرۇش» ناملىق خانىم-قىزلار ژورنىلى يەنە ئەرلەر بىلەن ئاياللارنىڭ نەزىرىدىكى قارشى تەرەپنىڭ ئەڭ چىرايلىق بولىدىغان ۋاقتى توغرىسىدىكى تەكشۈرۈشكىمۇ دىققەت قىلغان بولۇپ، تەكشۈرۈشتىن مەلۇم بولىشىچە، ئەرلەرنىڭ نەزىرىدە ئاياللار 29 ياشتا ئەڭ چىرايلىق بولىدىكەن، ئاياللارنىڭ نەزىرىدە بولسا ئەرلەر 31 ياشتا ئەڭ كېلىشكەن بولىدىكەن.
ئومۇمىي جەھەتتىن قارىغاندا ئەرلەر بىر قەدەر تەلەيلىك بولۇپ، ئۇلارنىڭ «بوۋاي» دەپ قارىلىدىغان يېشىمۇ ئاياللارنىڭكىدىن تۆت ياش كېيىن بولغان، ئۇنىڭدىن باشقا ئەرلەرنىڭ چېچىغا ئاق كىرسە تېخىمۇ ئىسكەتلىك، جەلىپ قىلارلىق بولىدۇ دەپ قارالغان، بىراق ئاياللارنىڭ چېچىغا ئاق كىرسە ئىسمى-جىسمىغا لايىق مومايغا ئايلىنىدۇ دېيىلگەن.
تەكشۈرۈشتىن مەلۇم بولىشىچە، 37 ياشتىن باشلاپ كۆپ ساندىكى ئەرلەر ۋە ئاياللار بىر قىسىم گىرىم بويۇملىرى ۋە ئاسراش بويۇملىرى ئارقىلىق ئۆزىنى ياش كۆرسىتىشكە تىرىشىشقا باشلايدىكەن. %42 ئايال ۋە %18 ئەر ئۆزىنىڭ ھۆسن تۈزەش ئوپىراتسىيەسى ياكى ھورمۇن ئۇرغۇزۇش ئارقىلىق ياشلىقىنى ساقلاپ قېلىش ئويىنىڭ بارلىقىنى بىلدۈرگەن.
:::توربىكىتىمىزنى ئۇلىنىش قىلىۋىلىڭ :::