پائالىيەت ئىشتىراكچىلىرى خاتىرە سۈرەتكە چۈشمەكتە.
ئىختىيارىي مۇخبىرىمىز ئابلىمىت سوپىھاجى خەۋىرى ، فوتوسى: 24-ئىيۇن چۈشتىن كېيىن ، قەشقەر شەھىرى ۋە قەشقەر يېڭىشەھەر ناھىيەسىدىكى ئەدىبلەر قەشقەر شەھىرىدىكى ‹ ‹يامبۇ ›› رېستورانىغا جەم بولۇپ ، ئاتاقلىق مەدەنىيەت تەتقىقاتچىسى ، شائىر ئىمىن ئەھمىدى ئىجادىيىتى ئىلمىي مۇھاكىمە پائالىيىتى ئۆتكۈزدى .
پائالىيەتتە قەشقەر شەھەرلىك پارتكومنىڭ مۇئاۋىن شۇجىسى ، شەھەر باشلىقى ئەنۋەر تۇرسۇن قاتناشتى ، ھەمدە قەشقەر شەھەرلىك پارتكوم ، خەلق ھۆكۈمىتى ، شۇنداقلا قەشقەر شەھىرىدىكى 700 مىڭدىن ئارتۇق ھەر مىللەت خەلق ئاممىسىغا ۋاكالىتەن ئىمىن ئەھمىدىنىڭ قەشقەرنىڭ مەدەنىيەت ، تارىخ ، ئەدەبىيات-سەنئەت ئىشلىرى ۋە ‹‹ قەشقەر مەدەنىيىتى ›› ژۇرنىلىنىڭ نەشر قىلىنىش ، تارقىتىلىشىغا يېقىندىن كۆڭۈل بۆلگەنلىكىگە رەھمەت ئېيتتى . شەھەر باشلىقى ئەنۋەر تۇرسۇن شائىر ئىمىن ئەھمىدىگە ھۆرمەت تونى كىيدۈردى . پائالىيەتكە قەشقەر شەھىرى ۋە قەشقەر يېڭىشەھەر ناھىيەسىدىكى 40 تىن ئارتۇق مەدەنىيەت تەتقىقاتچىسى ، ئەدىب ، يازغۇچى-شائىر ، ژۇرنالىست ، ئاخباراتچى قاتناشتى . پائالىيەتكە ‹‹قەشقەر›› ژۇرنىلىنىڭ باش مۇھەرىرى ئەنۋەر ئىبراھىم رىياسەتچىلىك قىلدى .
پائالىيەتتە ئەنۋەر ئىبراھىم ، تاھىر تالىپ ، ھاجى مىرزاھىد كېرىمى ، ئابدۇرېھىم سابىت قاراخان ، ئابلەت ئىسمائىل ئوغلان ، توختىھاجى تۇرسۇن ، مەمتىمىن ھېيت ، مەمتىمىن ئوبۇل ، قۇربان ئەمەت ، ئابلاجان بوۋاقى قاتارلىق مەدەنىيەت تەتقىقاتچىلىرى ۋە ئەدىب ، يازغۇچى-شائىر ، ژۇرنالىست ، ئاخباراتچى خادىملار ئىمىن ئەھمىدىنىڭ ئىجادىيەت ھاياتىنى ئەسلەپ ئۆتتى ، ھەمدە ئىمىن ئەھمىدىنىڭ نادىر شېئىرلىرىنى دېكلاماتسىيە قىلدى ، ئىمىن ئەھمىدىگە ئاتاپ يازغان شېئىرلىرىنى ئوقۇدى . شائىرغا تون كىيدۈرۈپ ، كۆڭۈللىرىنى ئىزھار قىلىشتى.
قەشقەر شەھەرلىك پارتكومنىڭ مۇئاۋىن شۇجىسى ، شەھەر باشلىقى ئەنۋەر تۇرسۇن (ئوڭدا) شائىر ئىمىن ئەھمىدىگە تون كەيدۈردى.
شائىر ئىمىن ئەھمىدى سۆز قىلماقتا.
ئەدىبلەر شائىر ئىمىن ئەھمىدى بىلەن سۈرەتكە چۈشمەكتە.
