ئەنگلىيە «كۈندىلىك پوچتا گېزىتى» 26-ئاۋغۇستتىكى خەۋىرىدە ئېيتىلىشىچە، ھىندىستاندىكى بۇ يىل ئەمدىلا 14 ياشقا كىرگەن ئالى ئىسىملىك بىر ئوغۇل بالا ئاز ئۇچرايدىغان ئىرسىيەت كېسەللىكى بالدۇر قېرىش كېسىلىگە گىرىپتار بولغان بولۇپ، بەدىنى 110 ياشلىق بوۋاينىڭكىدەك قېرىپ كەتكەن. ئۇنىڭ ئىككى ئاكسى ۋە ئۈچ ئاچىسىمۇ مۇشۇ كېسەل بىلەن تۈگەپ كەتكەن. مەلۇماتلارغا قارىغاندا ھازىر پۈتۈن دۇنيادىكى 80 كىشى بالدۇر قېرىش كېسىلى سەۋەبىدىن ئازاب تارتىۋېتىپتۇ.
مەلۇماتلارغا قارىغاندا، بالدۇر قېرىش كېسىلىگە گىرىپتار بولغانلارنىڭ قېرىش سۈرئىتى باشقىلارنىڭ سەككىز ھەسسىسىگە توغرا كېلىدىكەن، تېز سۈرئەتتىكى قېرىش ئۇلاردا ئاسانلا بوغۇم ياللۇغى، كۆز كېسەللىكى، يۈرەك كېسىلى ۋە تاقىرباشلىق قاتارلىق كېسەللىكلەرنى كەلتۈرۈپ چىقىرىدىكەن، ئادەتتە بۇ كېسەللگە گىرىپتار بولغانلار ئارانلا 14 يىل ئۆمۈر كۆرەلەيدىكەن. بۇ خىل ئاز ئۇچرايدىغان ئىرسىيەت كېسەللىككە قارىتا دوختۇرلارمۇ ئامالسىز ئىكەن. ھازىر ئالى ئۆيدىكى بىردىنبىر ھايات قالغان بالدۇر قېرىش كېسىلىگە گىرىپتار بولغان بالا بولۇپ، ئۇ بۇ كېسەلدىن ساقىيىش ئۈمىدىدىن ئەسلا ۋاز كېچىپ باقمىغان. ئۇ مۇنداق دەيدۇ: «مەن ھايات تۇرۇشنى بەكمۇ ئارزۇ قىلىمەن، نورمال كىشىلەرگە ئوخشاش ئۆگىنىش قىلىپ ئوينىسامكەن دەيمەن. مەن بۇ كېسەللىكنى ساقايتقىلى بولىدىغان دورىنىڭ بالدۇر دۇنياغا كېلىشنى ئۈمىد قىلىمەن، مېنىڭ ئەمدى ئاتا-ئانامنى ئەنسىرەتكۈم يوق».
خەۋەردە ئېيتىلىشىچە، ئالىنىڭ ئاتا-ئانىسى نەۋەرە تۇغقانلاردىن بولۇپ، توي قىلغىنىغا 32 يىل بولغان. بۇ جەرياندا ئىككىيلەن جەمئىي سەككىز پەرزەنتلىك بولغان بولسىمۇ، ئۇلار ئارىسىدىكى ئىككى قىزلا ساغلام چىققان، قالغان ئالتەيلەننىڭ ھەممىسى بالدۇر قېرىش كېسىلىگە گىرىپتار بولۇپ، بەش بالا قازا قىلغان. ھازىر ئالىنىڭ ئاتا-ئانىسى شۇ يەرلىك خەير -ساخاۋەت ئورگانلىرىنىڭ ياردىمىگە ئېرىشكەن، SB Devi تەشكىلاتى ئالىنىڭ بارلىق داۋالىنىش چىقىمىنى ئۆز ئۈستىگە ئالغان.
